17th Jan2022

ເຄື່ອນໄຫວໂຄສະນາເຜີຍແຜ່ຜົນຮ້າຍຂອງຢາເສບຕິດ ແລະ ກົດລະບຽບຈະລາຈອນທາງບົກ ຢູ່ໂຮງຮຽນ ມໍປາຍ ແຂວງເຊກອງ

by somchan

ທ້າຍອາທິດຜ່ານມານີ້ ກອງໂຄສະນາ ພະແນກກວດກາ ແລະ ຄວມຄຸມຢາເສບຕິດ ຮ່ວມກັບ ພະແນກຕຳຫລວດຈະລາຈອນ ກອງບັນຊາການ ປກສ ແຂວງເຊກອງ ລົງເຄື່ອນໄຫວໂຄສະນາເຜີຍແຜ່ຜົນຮ້າຍຂອງຢາເສບຕິດ ແລະ ກົດລະບຽບຈະລາຈອນທາງບົກ ຢູ່ໂຮງຮຽນ ມປາຍ ແຂວງເຊກອງ ໂດຍມີ  ພັນໂທ ສຸລິສັກ ຄໍາພາຊິງອາຢີງ ຫົວໜ້າພະແນກກວດກາ ແລະ ຄວບຄຸມຢາເສບຕິດ ກອງບັນຊາການ ປກສ ແຂວງ, ມີຄະນະອໍານວຍການໂຮງຮຽນ, ຂະແໜງການກ່ຽວຂ້ອງ, ພະນັກງານຄູ-ອາຈານ ແລະ ນ້ອງນັກຮຽນເຂົ້າຮ່ວມຮັບຟັງ.

ພັນຕີ ນາງ ລັງ ໄຊມີວົງ ຮອງຫົວໜ້າພະແນກກວດກາ ແລະ ຄວມຄຸມຢາເສບຕິດ ກອງບັນຊາການ ປກສ ແຂວງ ໃຫ້ຮູ້ວ່າ: ຢາເສບຕິດ ມີຜົນຮ້າຍທີ່ເປັນ ອັນຕະລາຍຕໍ່ຮ່າງກາຍ ແລະ ຊີວິດຂອງຜູ້ເສບ, ເຮັດໃຫ້ບົດບາດກຽດສັກສີ ແລະ ອະນາ ຄົດຂອງຕົນຕົກຕ່ຳ, ສະໝອງຖືກທໍາລາຍກາຍເປັນບ້າ, ເສຍຈິດ, ໃຊ້ຄວາມຮຸນແຮງທໍາລາຍຊີວິດຂອງຕົນເອງ ແລະ ຜູ້ອື່ນໆ; ຜົນຮ້າຍຕໍ່ຄອບຄົວ ແລະ ຜູ້ຕິດຢາເສບຕິດ ຈະເຮັດໃຫ້ຄອບຄົວເກີດມີຄວາມວຸ້ນວາຍ, ແຕກແຍກເສຍຊື່ສຽງຄອບຄົວ ແລະ ວົງຕະກຸນ, ທໍາລາຍສຸຂະພາບ, ຊີວິດ ແລະ ຊັບສິນ; ຜົນຮ້າຍຕໍ່ສັງຄົມ ຜູ້ຕິດຢາເສບຕິດກໍ່ໃຫ້ເກີດມີສິ່ງຫຍໍ້ທໍ້ ແລະ ອາຊະຍາກໍາ ທໍາລາຍ ແລະ ຂົ່ມຂູ່ຄວາມສະຫງົບສຸກ ແລະ ຄວາມເປັນລະບຽບຮຽບຮ້ອຍຂອງສັງຄົມ ແລະ ຜົນຮ້າຍຕໍ່ປະເທດຊາດ ເປັນອັນຕະລາຍຕໍ່ຄວາມໝັ້ນຄົງຂອງຊາດຕໍ່ປາຊາຊົນ ເປັນຕົ້ນ ຊາວໜຸ່ມ, ເຍົາວະຊົນທີ່ເປັນອະນາຄົດຂອງຊາດ, ຜູ້ຕິດຢາເສບຕິດບໍ່ສາມາດປະຕິບັດໜ້າທີ່ປ້ອງກັນຊາດ, ປ້ອງກັນຄວາມສະຫງົບ ແລະ ບໍ່ສາ ມາດເປັນກໍາລັງແຮງໃນການສ້າງສາພັດທະນາປະເທດຊາດໄດ້. ສ່ວນຜູ້ຜະລິດ, ປຸງແຕ່ງ, ຊື້-ຂາຍ, ຈໍາໜ່າຍ, ຄອບຄອງ, ເກັບຮັກສາ, ນໍາເຂົ້າ-ສົ່ງອອກ, ຂົນສົ່ງ, ນໍາຢາເສບຕິດຜ່ານ ສປປ ລາວ ຈະຖືກດໍາເນີນຄະດີ ແລະ ລົງໂທດຕາມກົດໝາຍ.

ພ້ອມກັນນີ້, ທ່ານ ພັນຕີ ນາງ ໂລມຄໍາ ລັດຕິວົງ ຫົວໜ້າໜ່ວຍງານ ກອງໂຄສະນາ ພະແນກຕໍາຫລວດຈະລາຈອນ ກອງບັນຊາການ ປກສ ແຂວງ ກໍໄດ້ເຜີຍແຜ່ກົດລະບຽບຈະລາຈອນ ແລະ ກົດໝາຍຈະລາຈອນທາງບົກ ໃຫ້ພະນັກງານຄູ-ອາຈານ ແລະ ນ້ອງນັກຮຽນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບການໃຊ້ລົດ-ໃຊ້ຖະໜົນໃຫ້ມີຄວາມປອດໄພເປັນ ຕົ້ນແມ່ນ ການກວດກາສະພາບເຕັກນິກລົດ, ການຮຽນຮູ້ເຖິງປ້າຍເຕືອນ, ປ້າຍຫ້າມ ແລະ ອື່ນໆ ຕາມເສັ້ນທາງ, ເພື່ອຫລຸດຜ່ອນການເກີດອຸບັດເຫດ ແລະ ເປັນການເຕືອນສະຕິໃຫ້ກັບຊາວໜຸ່ມ-ໄວໝຸ່ມ ແລະ ເຍົາວະຊົນ ເນື່ອງຈາກເປັນໄວທີ່ມີຄວາມຢາກຮູ້-ຢາກເຫັນ ແລະ ຢາກລອງເປັນຫລັກ ໂດຍບໍ່ໄດ້ຄໍານຶງເຖິງຜົນເສຍຫາຍທີ່ຈະຕາມມາ ເມື່ອເກີດມີຄວາມຜິດພາດ ຫລື ຂັດຂ້ອງແບບກະທັນຫັນ, ອຸບັດເຫດກໍຈະຕາມມາ ເຊິ່ງມັນໄດ້ພາໃຫ້ເກີດຄວາມເສຍຫາຍ ເປັນຕົ້ນ ພາຫະນະເປ່ເພ, ເສຍຊັບສິນ ແລະ ຮ້າຍແຮງກວ່ານັ້ນອາດເສຍຊີວິດໄດ້.

ພັນຕີ ນາງ ໂລມຄໍາ ລັດຕິວົງ ຍັງໃຫ້ຮູ້ອີກວ່າ: ບັນຫາການເກີດອຸບັດເຫດໃນປັດຈຸບັນ ແມ່ນເກີດຂຶ້ນຫລາຍ ຍ້ອນຄວາມປະໝາດໃນການໃຊ້ລົດ-ໃຊ້ຖະໜົນຂອງຜູ້ຂັບຂີ່ເປັນຕົ້ນ ເມົາແລ້ວຂັບ, ບໍ່ມີໃບອະນຸຍາດຂັບຂີ່, ອາຍຸກະສຽນບໍ່ເຖິງ, ຂັບລົດໄວເກີນກໍານົດ, ບໍ່ປ່ອຍສິດເຊິ່ງກັນ ແລະ ກັນ, ລ່ວງໄຟອໍານາດ, ແຊງທາງໂຄ້ງ-ແຊງບໍ່ຮັບປະກັນ. ສະນັ້ນ ຈຶ່ງຮຽກຮ້ອງມາຍັງນັກຂັບຂີ່ ໃຫ້ມີຄວາມລະມັດລະວັງ ແລະ ຕ້ອງໃສ່ໝວກກັນກະທົບທຸກຄັ້ງໃນເວລາຂີ່ລົດຈັກ ເພື່ອຫລີກລ້ຽງການເກີດອຸບັດເຫດ ແລະ ຜົນເສຍຫາຍທີ່ຈະຕາມມາ.

Off

Comments are closed.