18th Jan2022

ກະຊວງເຕັກໂນໂລຊີ ແລະ ການສື່ສານ ແລະ ວິທະຍາໄລ ວິທະຍາສາດ ສຸຂະພາບ ເຜີຍແຜ່ເອກະສານ ກ່ຽວກັບວາລະແຫ່ງຊາດ.

by somchan

ກະຊວງເຕັກໂນໂລຊີ ແລະ ການສື່ສານ ໄດ້ເຜີຍແຜ່ບັນດາເອກະສານ ກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ນັບແຕ່ປີ2021-2023 ໃນຕອນເຊົ້າຂອງວັນທີ 18 ມັງກອນ 2022 ນີ້,ໃຫ້ກຽດເຜີຍແຜ່ເອກະສານໂດຍ  ປອ ສັນຕິສຸກ ສິມມາລາວົງ ຮອງລັດຖະມົນກະຊວງເຕັກໂນໂລຊີ ແລະ ການສື່ສານ ແລະ  ພົທ ກົງທອງ ພົງວິຈິດ ກໍາມະການສູນກາງພັກ, ຮອງລັດຖະມົນຕີ ກະຊວງປ້ອງກັນຄວາມ ມີບັນດາຄະນະກົມ/ທຽບເທົ່າ, ຄະນະອໍານວຍການບໍລິສັດ ລັດວິສາຫະກິດທີ່ໃຫ້ບໍລິການດ້ານໂທລະຄົມ ການສື່ສານ ແລະ ພະນັກງານຫຼັກແຫຼ່ງເຂົ້າຮ່ວມ.

ປອ ສັນຕິສຸກ ສິມມາລາວົງ ໄດ້ຂຶ້ນເຜີຍແຜ່ຄໍາສັ່ງຂອງກົມການເມືອງສູນກາງພັກ, ສະບັບເລກທີ 02ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນໍາພາຊີ້ນໍາ ຂອງຄະ ນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ແລະ ຄໍາສັ່ງຂອງນາຍົກລັດຖະມົນຕີ ສະບັບເລກທີ: 19/ນຍ, ລົງວັນທີ 04 ຕຸລາ 2021 ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປີ (2021-2023) ເພື່ອຮັບປະກັນໃຫ້ວາລະແຫ່ງຊາດ ໄດ້ຮັບການຈັດຕັ້ງປະຕິບັດຢ່າງຮີບດ່ວນ, ທັນການ, ມີປະສິດທິພາບ ແລະ ປະສິດທິຜົນ. ໃນມະຕິ ກອງປະຊຸມໃຫຍ່ຜູ້ແທນທົ່ວປະທດ ຄັ້ງທີ XI ຂອງພັກ ໄດ້ກໍານົດອອກວ່າ: “ຕ້ອງຍົກລະດັບການສະກັດກັ້ນ ແລະ ແກ້ໄຂຜົນ ຮ້າຍຈາກບັນຫາຢາເສບຕິດ ໃຫ້ເປັນຫນ້າທີ່ຕົ້ນຕໍ ທາງດ້ານສັງຄົມ ແລະ ເປັນສ່ວນຫນຶ່ງໃນວາລະແຫ່ງຊາດ ເຊິ່ງຕ້ອງປຸກລະດົມ ເຂົ້າຮ່ວມຂອງທົ່ວສັງຄົມໃຫ້ແຂງແຮງຕໍ່ເນື່ອງ ແລະ ເຮັດໃຫ້ 70-80% ຂອງບ້ານໃນທົ່ວປະເທດປອດຢາເສບຕິດຢ່າງແທ້ຈິງ” ເພື່ອຍົກສູງພາລະບົດບາດ, ສ້າງການຫັນປ່ຽນທີ່ແຂງແຮງ, ເລີກເຊິ່ງ ຕໍ່ການແກ້ໄຂບັນຫາຢາເສບຕິດໃຫ້ ເກີດເປັນຮູບປະທໍາຢ່າງແທ້ຈິງ ແລະ ກ້າວໄປສູ່ການກໍາຈັດປັດເປົ່າໃຫ້ຫມົດສິ້ນໄປເປັນກ້າວໆ.

ໃນໂອກາດດຽວກັນ,  ພົທ ກົງທອງ ພົງວິຈິດ ໄດ້ເຜີຍແຜ່ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດນັບແຕ່ປີ2021-2023, ມະຕິຂອງສະພາແຫ່ງຊາດ ສະບັບເລກທີ 04/ສພຊ, ລົງວັນທີ 10 ສິງຫາ 2021 ວ່າດ້ວຍ ການຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ (2021-2023), ພ້ອມນີ້, ພັອ ແກ່ນຈັນ ພົມມະຈັກ ຮອງຫົວຫນ້າກົມໃຫຍ່ຕໍາຫຼວດ, ປກສ ກໍ່ໄດ້ເຜີຍແຜ່ກົດຫມາຍວ່າດ້ວຍການປັບປຸງ ບາງມາດຕາຂອງກົດຫມາຍ ວ່າດ້ວຍຢາເສບຕິດ ສະບັບເລກທີ 02/ສພຊ, ລົງວັນທີ 09 ສິງຫາ 2021 ແລະ ແຜນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ (2021-2023) ສະບັບເລກທີ: 1843/ປກສ, ລົງວັນທີ 05 ຕຸລາ 2021 ຂອງກະຊວງ ປກສ. ໂດຍຍຶດໝັ້ນຕາມຫຼັກການນໍາພາຂອງພັກ ແລະ ສຸມໃສ 03 ຫຼັກການຕົ້ນຕໍຄື: ຄວາມເດັດຂາດ, ຄວາມໂປ່ງໃສ, ຄວາມເປັນມືອາຊີບ ແລະ 06 ວຽກງານຈຸດສຸມຄື: ສ້າງຄວາມຮັບຮູ້ໃນທົ່ວສັງຄົມດ້ວຍການສຶກສາອົບຮົມ, ໂຄສະນາເຜີຍແຜ່ລະບຽບກົຫມາຍ ແລະ ຜົນຮ້າຍຂອງຢາເສບຕິດ, ສ້າງປັບປຸງກົດຫມາຍ ແລະ ນິຕິກໍາໃຕ້ກົດຫມາຍທີ່ກ່ຽວຂ້ອງກັບບັນຫາຢາເສບຕິດ, ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດໃນການເຄື່ອນໄຫວເຮັດໜ້າທີ່ການເມືອງຂອງອົງການສືບສວນ-ສອບສວນ, ອົງການໄອຍະການປະຊາຊົນ, ອົງການສານປະຊາຊົນ, ອົງການປະຕິບັດຄໍາຕັດສິນຂອງສານ ແລະ ພາກສ່ວນທີ່ກ່ຽວຂ້ອງ, ຍົກສູງປະສິດທິພາບດ້ານການຄຸ້ມຄອງ, ຊີ້ນໍາໃນການຈັດຕັ້ງປະຕິບັດຮອບດ້ານ, ປັບປຸງຂີດຄວາມສາມາດການເຄື່ອນໄຫວເຮັດໜ້າາທີ່ຂອງລະບົບການເມືອງແຕ່ລະຂັ້ນໃນຂອບເຂດຄວາມຮັບຜິດຊອບຂອງຕົນ ແລະ ເພີ່ມທະວີວຽກງານການຮ່ວມມືສາກົນ ຄຽງຄູ່ກັນນັ້ນ, ກອງປະຊຸມໄດ້ເຫັນດີຮັບຮອງເອົາການແບ່ງຄວາມຮັບຜິດຊອບໃຫ້ຂະແຫນງການຕ່າງໆ ນັບທັງສູນກາງ ແລະ ທ້ອງຖິ່ນ ຕະຫຼອດຮອດສະຖາບັນຄອບຄົວ, ທຸກຊັ້ນຄົນໃນສັງຄົມ ລວມ 25 ພາກສ່ວນ ແລະ 06 ມາດຕະການຈັດຕັ້ງປະຕິບັດວາລະແຫ່ງຊາດດ້ວຍການ

ແກ້ໄຂບັນຫາຢາເສບຕິດ ແຕ່ປີ 2021-2023 ເພື່ອຍົກສູງບົດບາດ ແລະ ຄວາມສາມາດການນໍາພາຂອງພັກ, ການຄຸ້ມຄອງບໍລິຫານຂອງລັດ ໃນການສ້າງການຫັນປ່ຽນທີ່ແຂງແຮງ, ເລິກເຊິ່ງຕໍ່ການແກ້ໄຂບັນຫາຢາເສບຕິດໃຫ້ເກີດເປັນຮູບປະທໍາຕົວຈິງ ເຮັດໃຫ້ສັງຄົມລາວ ປອດໄພຈາກບັນຫາຢາເສບຕິດ ແລະ ກ້າວໄປສູ່ການກໍາຈັດປັດເປົ່າ ໃຫ້ໝົດສິ້ນໄປ ເປັນກ້າວໆ.

ໃນຕອນທ້າຍ  ພົທ ກົງທອງ ພົງວິຈິດ ໄດ້ເນັ້ນໜັກໃຫ້ການນໍາແຕ່ລະຂັ້ນຂອງຂະແໜງການ ເຕັກໂນໂລຊີ ແລະ ການສື່ສານ ນໍາເອົາ ເນື້ອໃນດັ່ງກ່າວໄປຈັດຕັ້ງເຜີຍແຜ່ໃຫ້ສະມາຊິກພັກ-ພະນັກງານຂອງຕົນໄດ້ຮັບຮູ້, ເຂົ້າໃຈຢ່າງທົ່ວເຖິງ ແລະ ປຸກລະດົມ, ຂົນຂວາຍທຸກກໍາລັງແຮງ ເຂົ້າໃນການແກ້ໄຂບັນຫາຢາເສບຕິດ ທີ່ລະບາດເປັນວົງກວ້າງ ແລະ ຮຸນແຮງໃຫ້ຫຼຸດລົງ ເພື່ອສ້າງໃຫ້ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ-ປອດໄພ, ສ້າງເງື່ອນໄຂໃນການສ້າງສາພັດທະນາເສດ ຖະກິດ, ວັດທະນະທໍາ-ສັງຄົມ ແລະ ກ້າວໄປສູ່ສັງຄົມລາວປອດຢາເສບຕິດ ຕາມຄາດຫມາຍທີ່ວາງໄວ້.

ແລະໃນວັນດຽວກັນນີ້. ຢູ່ທີ ວິທະຍາໄລວິທະຍາສາດສຸຂະພາບ ກະຊວງສາທາລະນະສຸກ ກໍ່ໄດ້ເຜີຍແຜ່ບັນດາເອກະສານກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດເຊັ່ນດຽວກັນ. ໃຫ້ກຽດເຂົ້າຮ່ວມ ແລະ ເຜີຍແຜ່ເອກະສານໂດຍ ປອ ດຣ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ, ພົຕ ປອ ທອງເຫຼັກ ມັງໜໍ່ເມກ ຮອງລັດຖະມົນຕີກະຊວງ ປ້ອງກັນຄວາມສະຫົງບ, ມີຮອງລັດຖະມົນຕີ, ບັນດາກົມ, ພະແນກ, ສູນ, ໂຮງຮຽນ ແລະ ພະນັກງານວິຊາການເຂົ້າຮ່ວມ.

ເອກະສານທີ່ເຜີຍແຜ່ຄັ້ງນີ້ມີ ຄຳສັ່ງ ຂອງກົມການເມືອງສູນກາງພັກ ວ່າດ້ວຍເພີ່ມທະວີການນຳພາຊີ້ນຳຂອງຄະນະພັກແຕ່ລະຂັ້ນຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ, ມະຕິຂອງສະພາແຫ່ງຊາດ ວ່າດ້ວຍການຮັບຮອງເອົາວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ຄຳສັ່ງຂອງນາຍົກ ລັດຖະມົນຕີ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ( 2021-2023), ກົດໝາຍ ວ່າດ້ວຍການປັບປຸງບາງມາດຕາ ຂອງກົດໝາຍ ວ່າດ້ວຍຢາເສບຕິດ ແລະ ແຜນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບ ຂອງກະຊວງປ້ອງກັນຄວາມສະຫົງບ. ຈຸດປະສົງເພື່ອປຸກລະດົມ, ຂົນຂວາຍທຸກກຳລັງແຮງສັງລວມ ເຂົ້າໃນການແກ້ໄຂບັນຫາຢາເສບຕິດ ທີ່ລະບາດເປັນວົງກ້ວາງ ແລະ ຮຸນແຮງ ໃຫ້ຫຼຸດລົງຢ່າງຈະແຈ້ງ ໃນກຳນົດເວລາທີ່ແນ່ນອນ, ເພື່ອແກ້ໄຂສາເຫດ ແລະ ເງື່ອນໄຂພາໃຫ້ເກີດບັນຫາຢາເສບຕິດ, ສ້າງໃຫ້ສັງຄົມມີຄວາມສະຫົງບ, ມີຄວາມເປັນລະບຽບຮຽບຮ້ອຍ, ສ້າງເງື່ອນໄຂໃນການສ້າງສາພັດທະນາເສດຖະກິດ, ວັດທະນະທຳ-ສັງຄົມ, ກ້າວໄປສູ່ສັງຄົມລາວປອດຢາເສບຕິດໃຫ້ໄດ້ໃນທີ່ສຸດ.

 

Off

Comments are closed.