18th Jan2022

ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສ. ຕວັກກີ ປະຈໍາ ສ ປປ ລາວ.

by somchan

ວັນ​ທີ 17 ມັງ​ກອນ 2022, ທ່ານ ທອງສະຫວັນ ພົມວິຫານ ​ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄ​ະ​ນະ​ພົວ​ພັນ ​ຕ່າງ​ປະ​ເທດສູນ​ກາງ​ພັກໄດ້​ຕ້ອນຮັບການ​ເຂົ້າ​ຢ້ຽມ​ຂ່ຳ​ນັບຂອງ​ທ່ານໂອ​ຣ​ຮັນ ເອີ​ເຊິກ    (Orhan Isik), ເອກອັກຄະລັດຖະທູດ ວິ​ສາ​ມັນຜູ້​ມີ​ອຳ​ນາດ​ເຕັມ ແຫ່ງ ສ.ຕວັກກີ ປະຈໍາ ສປປ ລາວ.

ໃນໂອກາດນີ້ ທ່ານ ທອງສະຫວັນ ພົມວິຫານ ໄດ້ສະ​ແດງ​ຄວາມຍິນດີ ຕ້ອນຮັບອັນອົບອຸ່ນ ແລະ ຊົມເຊີຍທ່ານທູດ ທີ່ຖືກແຕ່ງຕັ້ງມາປະຕິບັດໜ້າທີ່ຢູ່ ສປປ ລາວ, ພ້ອມທັງຕີລາຄາສູງ ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ.ຕວັກກີ ຕະຫລອດໄລຍະກວ່າ​ຫົກ​ທົດ​ສະ​ວັດ ​ແຫ່ງ​ການ​ສ້າງ​ສາຍ​ພົວ​ພັນ ​ການ​ທູດ​ນຳ​ກັນຜ່ານມາ. ສະແດງຄວາມເຊື່ອໝັ້ນວ່າ ໃນໄລຍະທ່ານທູດ ມາປະຕິບັດໜ້າທີ່ຢູ່ລາວ ຈະມີການຮ່ວມມືກັນຢ່າງໃກ້ຊິດ ກັບຂະແໜງການຕ່າງໆຂອງ ສປປ ລາວ ເພື່ອສົ່ງເສີມການພົວພັນ ຮ່ວມມືສອງຝ່າຍ ໃຫ້ນັບມື້ກວ້າງຂວາງ ແລະ ເປັນຮູບປະທໍາຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ.

ທ່ານໂອ​ຣ​ຮັນ ເອີ​ເຊິກ  (Orhan Isik) ໄດ້​​ສະແດງຄວາມຂອບ​ໃຈ​ຢ່າງ​ຈິງ​ໃຈ ຕໍ່ ​ການ​ຕ້ອນຮັບ​ອັນ​ອົບ​ອຸ່ນໃນຄັ້ງນີ້, ພ້ອມທັງຊົມເຊີຍ ​ຜົນສຳ​ເລັດຂອງ ສປປ ລາວ ໃນການປົກປັກຮັກສາ ແລະ ການສ້າງສາ​ພັດທະນາ​ປະ​ເທ​ດ ຕະຫລອດໄລຍະ 46 ປີທີ່ຜ່ານມາ, ພິເສດ ແມ່ນການຮັບມື ການແຜ່ລະບາດ ຂອງເຊື້ອພະຍາດໂຄວິດ-19 ຢູ່ ສປປ ລາວ. ພ້ອມນັ້ນ, ທ່ານທູດ ​ໄດ້​ຢືນ​ຢັນ​ວ່າ ຈະສືບຕໍ່ຮ່ວມມືກັບ ພາກສ່ວນຕ່າງໆຂອງລາວ ເພື່ອປະກອບສ່ວນເຂົ້າໃນ ການເສີມຂະຫຍາຍການພົວພັນ ລະຫວ່າງ ສປປ ລາວ ແລະ ສ. ຕວັກກີ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ.

ໃນຕອນທ້າຍ, ທ່ານ ທອງສະຫວັນ ພົມວິຫານ ໄດ້ອວຍ​ພອນ​ໃຫ້​ແກ່ ທ່ານ ທ່ານໂອ​ຣ​ຮັນ ເອີ​ເຊິກ   (Orhan Isik) ຈົ່ງມີສຸຂະພາບແຂງແຮງ ແລະ ປະ​ສົບ​ຜົນສຳ​ເລັດ​ ໃນການປະຕິບັດ​​ໜ້າທີ່ ອັນມີກຽດສູງສົ່ງຂອງທ່ານທູດ ຢູ່ ສປປ ລາວ.

 

Off

Comments are closed.