19th Jan2022

ຮ່ວມກັນລັກສາຍໄຟຢູ່ສະຖານີລົດໄຟ ລາວ-ຈີນ ຈຸດດົງໂພສີ ໜີບໍ່ລອດເຈົ້າໜ້າທີ່ຈັບໄດ້

by somda phoneor

ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນ ຊາການ ປກສ ເມືອງ ຫາດຊາຍຟອງ ໄດ້ໃຫ້ຮູ້ໃນວັນທີ 18 ມັງກອນນີ້ ວ່າ: ເລີມແຕ່ວັນທີ 6 – 15 ມັງກອນ 2022 ໄດ້ມີຄົນຮ້າຍເຂົ້າໄປລັກຕັດສາຍໄຟຢູ່ສະຖານີລົດໄຟລາວ-ຈີນ ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ຈໍານວນຫຼາຍຄັັ້ງ ເຊິ່ງມີມູນຄ່າຄວາມເສຍຫາຍທັງໝົດ 83.426.000 ກີບ ຕາມການແຈ້ງຂອງບໍລິສັດຮັກສາຄວາມປອດໄພ ສະຖານີລົດໄຟລາວ-ຈີນ ຈຸດບ້ານດົງໂພສີ, ມາຮອດວັນທີ15 ມັງກອນ 2022 ເວລາ 23:00 ໂມງ ພະນັກງານບໍລິສັດຮັກສາຄວາມປອດໄພສະຖານີລົດໄຟລາວ-ຈີນ ຈຸດບ້ານ ດົງໂພສີ ສາມາດຈັບຕົວຄົນຮ້າຍໄດ້ 1 ຄົນ ຊື່ທ້າວ ວັງ ອາຍຸ 25 ປີ, ກໍາມະກອນ ບ້ານຂັນເທີງ ເມືອງນໍ້າບາກ ແຂວງຫຼວງພະບາງ ພັກເຊົາຢູ່ ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ທີ່ຜູ້ກ່ຽວກຳລັງຈະເຂົ້າໄປລັກຕັດສາຍໄຟຟ້າເພື່ອເອົາທອງ, ດັ່ງນັ້ນບໍລິສັດຮັກສາຄວາມປອດໄພສະຖານີລົດໄຟລາວ-ຈີນ ຈຶ່ງໄດ້ສົ່ງຕົວຜູ້ກ່ຽວໃຫ້ເຈົ້າໜ້າທີ່ຕຳຫຼວດລົດໄຟລາວ-ຈີນ ປກສ ເມືອງຫາດຊາຍຟອງ ແລະ ໜ່ວຍງານສືບສວນ-ສອບສວນຄະດີອາຍາ-ເສດຖະກິດ.

ຜ່ານການການສືບສວນ-ສອບສວນ ຂະຫຍາຍຜົນສາມາດຈັບຕົວຜູ້ຮ່ວມຂະບວນການໄດ້ອີກ 4 ຄົນຄື: ທ້າວ ມີ ອາຍຸ 38 ປີ,ອາຊີບກຳມະກອນຢູ່ບ້ານນໍ້າລິດ ເມືອງ ປາກລາຍ ແຂວງ ໄຊຍະບູລີ; ທ້າວ ມາເລ  ອາຍຸ 29 ປີ,ກຳມະກອນ ຢູ່ບ້ານປຸງທາງ ເມືອງຊໍາໃຕ້ ແຂວງຫົວພັນ; ທ້າວ ສີງ ອາຍຸ 28 ປີ,ກຳມະກອນ ຢູ່ບ້ານເມືອງວັນ ເມືອງແອດ ແຂວງຫົວພັນ ແລະ ທ້າວ ພຸດທະສັກ ອາຍຸ 31 ປີ ກຳມະກອນ ຢູ່ບ້ານທ່ານາແລ້ງ ເມືອງຫາດຊາຍຟອງ ນະຄອນຫຼວງວຽງຈັນ, ທັງ 4 ຄົນ ແມ່ນພັກເຊົາຢູ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ. ເຈົ້າໜ້າທີ່ສາມາດຢືດຂອງກາງປະເພດອຸປະກອນຕັດສາຍໄຟ ແລະ ເຄື່ອງຢາມກະແສໄຟຟ້າ ໄດ້ຈຳນວນໜຶ່ງ.

ຜ່ານການສືບສວນ-ສອບສວນ ພວກກ່ຽວໄດ້ສາລະພາບໃນເບື້ອງຕົ້ນວ່າ: ໄດ້ມາເຮັດວຽກເປັນກຳມະກອນກໍ່ສັ້າງຢູ່ໃນສະຖານີລົດໄຟດັ່ງກ່າວ.ຕໍ່ມາການກໍ່ສ້າງໄດ້ສຳເລັດແລ້ວ, ແຕ່ພວກກ່ຽວຍັງບໍ່ທັນໄດ້ກັບບ້ານຂອງຕົນ ໄດ້ພັກເຊົາຢູ່ແຄັມກໍ່ສ້າງເຂດໃກ້ຄຽງ ຈືຶ່ງພາກັນເຂົ້າໄປລັກຕັດສາຍໄຟຟ້າແຮງສູງເພື່ອປອກເອົາທອງຢູ່ສະຖານີລົດໄຟລາວ-ຈີນ ຈຸດບ້ານດົງໂພສີ ຈຳນວນ 09 ຄັັ້ງ, ແລ້ວນຳໄປຂາຍໃຫ້ຮ້ານຮັບຊື້ເຫຼັກເສດເປັນກິໂລ, ເມື່ຶອໄດ້ເງິນມາກໍເອົາໄປຊື້ຢາບ້າມາເສບ ແລະ ຫຼິ້ນເກມຫມົດ.

ປະຈຸບັນເຈົ້າໜ້າທີພວມດຳເນີນຄະດີພວກກ່ຽວຕາມກົດໝາຍ.

Off

Comments are closed.