18th Aug2015

ຈັບເປົ້າໝາຍຄ້າ-ຂາຍຢາເສບຕິດ ພ້ອມຂອງກາງຢາບ້າ 5 ພັນກ່ວາເມັດ

by somchan

ໃນວັນທີ 10ສິງຫາ 2015 ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ໄດ້ນຳກຳລັງລົງປິດລ້ອມຈັບເປົ້າໝາຍເຄື່ອນໄຫວ ຄ້າຂາຍຢາເສບຕິດຢູ່ບ້ານຫ້ວຍນາງລີ້ ເມືອງທ່າແຂກແຂວງຄຳມ່ວນ, ສາມາດກັກຕົວຜູ້ຖືກຫາໄດ້ 2 ຄົນຄື:ທ້າວຄອງສະໄໝ ຫຼື ນ້ອຍອາຍຸ 31 ປີ ແລະ ທ້າວຈິນດາ ຫຼືເຕື່ອຍອາຍຸ 20 ປີ ທັງສອງຢູ່ບ້ານຫ້ວຍນາງລີ້ ເມືອງທ່າແຂກ ແຂວງຄຳມ່ວນ ພ້ອມຂອງກາງຢາບ້າ 5.981 ເມັດ ແລະ ລົດຈັກ 2 ຄັນ.

ເຈົ້າໜ້າທີ່ ປກສ ແຂວງຄຳມ່ວນໃຫ້ຮູ້ວ່າ: ພາຍຫຼັງທີ່ໄດ້ຮັບແຫຼ່ງຂ່າວວ່າມີການລັກລອບຄ້າຂາຍຢາເສບຕິດ ຢູ່ເຂດບ້ານຫ້ວຍນາງລີ້ຈຶ່ງໄດ້ລົງເກັບກຳຂໍ້ມູນ ແລະ ຂຶ້ນບັນຊີເປົ້າໝາຍຕິດຕາມການເຄື່ອນໄຫວຂອງຜູ້ກະທຳຜິດ ຜ່ານການຕິດຕາມຈຶ່ງໄດ້ຮູ້ວ່າ ເປົ້າເຄື່ອນໄຫວລັກລອບຄ້າ-ຂາຍ ຢາເສບຕິດ, ເຈົ້າໜ້າທີ່ຈຶ່ງໄດ້ນຳກຳລັງລົງຈັບກຸມຜູ້ກະທຳຜິດດັ່ງກ່າວ ສາມາດກັກຕົວຜູ້ກະທຳຜິດໄດ້ສອງຄົນ. ຜ່ານການສືບສວນ-ສອບສວນ ຂອງເຈົ້າໜ້າທີ່ໃນເບື່ອງຕົ້ນ ພວກກ່ຽວໄດ້ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນໄດ້ຊື້ຢູ່ບ້ານປຸ່ງເໜືອ ເມືອງຫີນບູນ ແຂວງຄຳມ່ວນ, ເພື່ອຈະເອົາມາສົ່ງຢູ່ຫ້ອງເຊົ່າເຂດບ້ານຈອມແກ້ວ, ພໍມາຮອດເຈົ້າໜ້າທີ່ໄດ້ເຂົ້າມາປິດອ້ອມກັກຕົວ ພ້ອມຂອງກາງຢາບ້າຈຳນວນ 5981 ເມັດ. ຜ່ານມາທ້າວ ຈິນດາ ຫຼືເຕື່ອຍເຄີຍຕ້ອງໂທດມາແລ້ວ 1ຄັ້ງໃນຂໍ້ຫາມົ້ວສຸມຢາເສບຕິດ ແລະຖືກດັດສ້າງຢູ່ ປກສ ເມືອງທ່າແຂກເປັນເວລາ 1 ປີ.

ປະຈຸບັນ, ຄະດີດັ່ງກ່າວຢູ່ໃນຂັ້ນຕອນການສືບສວນ-ສອບສວນຂອງເຈົ້າທີ່ເພືອຂະຫຍາຍຜົນຊອກຫາຜູ້ຮ່ວມຂະບວນການ.

Off

Comments are closed.