20th Jan2022

ຄອບຄົວການນຳຂັ້ນສູງ ມອບເຄື່ອງຊ່ວຍເຫລືອໃຫ້ອ້າຍນ້ອງທະຫານ ແລະ ປະຊາຊົນ ເມືອງຮົ່ມ

by somda phoneor

ໃນລະຫວ່າງວັນທີ 17-18 ມັງກອນ 2022 ນີ້, ທ່ານ ນາງ ນາລີ ສີສຸລິດ, ພັນລະຍາຂອງທ່ານປະທານປະເທດ ພ້ອມດ້ວຍຄອບຄົວການນຳ ຮ່ວມກັບ ນັກທຸລະກິດລາວ, ສະມາຄົມຊ່ວຍເຫລືອ ແລະ ບັນເທົາທຸກ ຈາກນະຄອນຫລວງວຽງຈັນ ໄດ້ມອບເຄື່ອງຊ່ວຍເຫລືອ ໃຫ້ແກ່ອ້າຍນ້ອງທະຫານ ແລະ ປະຊາຊົນ ເມືອງຮົ່ມ ແຂວງໄຊສົມບູນ ໂດຍການຕ້ອນຮັບຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ, ມີບັນດາການນຳເມືອງ ແລະ ພາກສ່ວນກ່ຽວຂອງ ເຂົ້າຮ່ວມ.

ເຄື່ອງຊ່ວຍເຫລືອທີ່ນຳມາມອບໃນຄັ້ງນີ້, ປະກອບມີ: ເຄື່ອງອຸປະໂພກ-ບໍລິໂພກ, ເຄື່ອງໃຊ້ຄົວເຮືອນ, ເຄື່ອງນຸງ, ເຄື່ອງບ່ອນນອນ ແລະ ເງິນສົດຈຳນວນໜຶ່ງ ເພື່ອຊຸກຍູ້ອ້າຍນ້ອງທະຫານ ທີ່ພວມປະຕິບັດໜ້າທີ່ ຢູ່ບັນດາປ້ອມເຂດຫາງໄກສອກຫລີກ ທີ່ເຮັດໜ້າທີ່ຮັກສາຄວາມສະຫງົບສຸກໃຫ້ກັບປະຊາຊົນ. ທັງເປັນການຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ ແລະ  ເພື່ອເປັນຂັວນກຳລັງໃຈແກ່ອ້າຍນ້ອງທະຫານ ແລະ ປະຊາຊົນບັນດາເຜົ່າ, ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໃຍ ຂອງຄອບຄົວການນຳຂັ້ນສູງ ຕໍ່ອ້າຍນ້ອງທະຫານ ທີ່ພວມປະຕິບັດໜ້າທີ່ ຢູ່ແຕ່ລະຈຸດ ໃນການຮັກສາເຂດນໍ້າແດນດິນ ແລະ ຄວາມຢູ່ເຢັນເປັນສຸກ ຂອງປະຊາຊົນບັນດາເຜົ່າ ຕະຫລອດມາ.

ໂອກາດດັ່ງກ່າວ,  ພັອ ເພັດລັງສີ ພິຈິດ ຫົວໜ້າຫ້ອງພາລາທິການ, ກອງບັນຊາການ-ທະຫານ ແຂວງໄຊສົມບູນ ໄດ້ສະແດງຄວາມຂອບອົກຂອບໃຈ ເປັນຢ່າງສູງ ມາຍັງ ທ່ານ ນາງ ນາລີ ສີສຸລິດ ພ້ອມດ້ວຍຄອບຄົວການນຳ ກໍຄື ນັກທຸລະກິດລາວ,ສະມາຄົມຊ່ວຍເຫລືອ ແລະ ບັນເທົາທຸກ ພ້ອມດ້ວຍປະຊາຊົນ ຈາກນະຄອນຫລວງວຽງຈັນ ທີ່ໄດ້ປະກອບສ່ວນວັດຖຸ-ປັດໄຈ ຊ່ວຍເຫລືອໃນຄັ້ງນີ້, ເຊິ່ງສະແດງໃຫ້ເຫັນເຖິງຄວາມເປັນຫ່ວງເປັນໃຍ ຕໍ່ຊີວິດການເປັນຢູ່ຂອງອ້າຍນ້ອງທະຫານ ທີ່ໄປປະຈຳຢູ່ແຕ່ລະປ້ອມ ທີ່ມີຄວາມຫຍຸ້ງຍາກລຳບາກ ດ້ານເຄື່ອງອຸປະໂພກ-ບໍລິໂພກ ແລະ ປະຊາຊົນຜູ້ທຸກຍາກຂາດເຂີນ ໃຫ້ໄດ້ມີຊີວິດການເປັນຢູ່ທີ່ດີຂຶ້ນກວ່າເກົ່າ.

Off

Comments are closed.