20th Jan2022

ກອງບັນຊາການ ປກສ ເມືອງຫາດຊາຍຟອງ ຈັບຜູ້ຂາຍຢາບ້າໄດ້ 2 ຄົນ, ຍຶດຂອງກາງໄດ້ຫຼາຍພັນເມັດ.

by somda phoneor

ກອງບັນຊາການ ປກສ ເມືອງຫາດຊາຍຟອງ ນະຄອນຫຼວງວຽງຈັນ ເລັ່ງຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເພື່ອເຮັດໃຫ້ເມືອງຫາດຊາຍຟອງ ມີຄວາມສະຫງົບປອດໄພ. ໜ່ວຍງານວິຊາສະເພາະ ເປັນຕົ້ນແມ່ນພະແນກຕຳຫຼວດ ໄດ້ສົມທົບກັບພາກສ່ວນທີ່ກ່ຽວຂ້ອງ ລົງເຄື່ອນໄຫວຕິດຕາມເປົ້າໝາຍຢາເສບຕິດ ສາມາດຈັບຜູ້ຂາຍຢາເສບຕິດໄດ້ 1 ຄົນ ກ່ອນຂະຫຍາຍຜົນຕາມໄປຈັບຕົວໄດ້ ເພີ່ມອີກ 1 ຄົນ.

ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ເມືອງຫາດຊາຍຟອງ ຜູ້ຊີ້ນຳວຽກງານຕຳຫຼວດ ໃຫ້ຮູ້ວ່າ: ໃນວັນທີ 19 ມັງກອນ 2022, ເວລາ 10:00 ໂມງ, ເຈົ້າໜ້າທີ່ພະແນກຕຳຫຼວດ ປກສ ເມືອງຫາດຊາຍຟອງ ໄດ້ລົງມ້າງເປົ້າໝາຍຄ້າຂາຍຢາເສບຕິດຢູ່ບ້ານທ່າມ່ວງ ເມືອງຫາດຊາຍຟອງ ສາມາດຈັບຕົວຜູ້ຖືກຫາໄດ້ 1 ຄົນຄື: ທ້າວ ອານຸສັກ ຫຼື ລີ້ ອາຍຸ 24 ປີ ກຳມະກອນຢູ່ບ້ານພ້າວ ເມືອງຫາດຊາຍຟອງ ພ້ອມຂອງກາງຢາບ້າ ຈຳນວນ 1.753 ເມັດ, ໂທລະສັບໄອໂຟນ 7 ສີທອງ 1 ເຄື່ອງ ແລະ ລົດຈັກ 1 ຄັນ.

ທ້າວ ອານຸສັກ ສາລະພາບກັບເຈົ້າໜ້າທີ່ວ່າ: ຢາບ້າຈໍານວນດັ່ງກ່າວນັ້ນແມ່ນໄດ້ຊື້ນໍາ ທ້າວ ສຸກຂີ ອາຍຸ 30 ປີ ຢູ່ບ້ານຮ່ອງແກ ເມືອງໄຊເຊດຖາ ໂດຍຊື້ຄັ້ງລະ 1 ມັດ ຫຼື 2.000 ເມັດ ແລະ ນຳໄປຂາຍໃຫ້ກຸ່ມມົ້ວສຸມຢາເສບຕິດຢູ່ແຖວບ້ານທ່າມ່ວງ ຈາກນັ້ນ, ເຈົ້າໜ້າທີ່ພະແນກຕຳຫຼວດ ປກສ ເມືອງຫາດຊາຍຟອງ ຈຶ່ງສົມທົບກັບ ປກສ ກຸ່ມ 3 ສີສັງວອນ ແລະ ອົງການຈັດຕັ້ງບ້ານຮ່ອງແກ ເມືອງໄຊດເສດຖາ ເຂົ້າຈັບຕົວ ທ້າວ ສຸກຂີ ໃນເວລາ 12:40 ຂອງວັນດຽວກັນ ພ້ອມຂອງກາງຢາບ້າ ຈຳນວນ 3.819 ເມັດ, ໂທລະສັບໄອໂຟນ 8 ສີທອງ 1 ເຄື່ອງ, ເງິນກີບ 1.753.000 ກີບ ແລະ ເງິນບາດ 1.000 ບາດ.

ລາຍລະອຽດຂອງຄະດີ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕຳຫຼວດ ປກສ ເມືອງຫາດຊາຍຟອງ ກຳລັງສືບສວນ-ສອບສວນຂະຫຍາຍຜົນຫາກຸ່ມແກ້ງຮ່ວມຂະບວນການມາລົງໂທດຕາມກົດໝາຍ.

ປັດຈຸບັນ, ພັກ-ລັດ ໂດຍສະເພາະກະຊວງປ້ອງກັນຄວາມສະຫງົບ ກຳລັງເລັ່ງຈັດຕັ້ງວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເພື່ອໃຫ້ສຳເລັດຕາມຄາດໝາຍໃນປີ 2023, ດັ່ງນັ້ນ ການແກ້ໄຂບັນຫາຢາເສບຕິດຈິ່ງແມ່ນໜ້າທີ່ຂອງທົ່ວປວງຊົນລາວທັງຊາດ.

Off

Comments are closed.