27th Jan2022

ພິທີເປີດ ສາຍຣູບເງົາລະຄອນເວທີ ການແກ້ໄຂຄວາມທຸກຍາກ ແລະ ມອບ-ຮັບອຸປະກອນການແພດ

by Peaung Thanonkeo

ເພື່ອເປັນການຈັດຕັ້ງປະຕິບັດຕາມຄວາມຮັບຮູ້ທີ່ເປັນເອກະພາບກັນ ລະຫວ່າງ ການນຳສູງສຸດ ຂອງ ສອງພັກ, ຂອງສັດ ລາວ-ຈີນ ແລະ ຈັດຕັ້ງຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກຳ ລາວ-ຈີນ ດ້ານ ວັດທະນະທໍາ ແລະ ບົດຮຽນໃນການແກ້ໄຂຄວາມທຸກຍາກຂອງປະຊາຊົນ, ໃນວັນທີ 26 ມັງກອນ 2022 ນີ້, ຄະນະ ໂຄສະອົບຮົມສູນກາງພັກ ປະຊາຊົນປະຕິວັດ ລາວ, ຄະນະພົວພັນຕ່າງປະເທດສູນກາງພັກ ປ ລາວ ແລະ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ສົມທົບກັບ ຄະນະພັກແຂວງຫູນານ ຮ່ວມກັນຈັດພິທີສາຍຮູບເງົາ ລະຄອນເວທີ ການແກ້ໄຂຄວາມທຸກຍາກ “ເພງສັນລະເສີນແຜ່ນດິນ” (ຂີ້ຊົງກີນ ແລະ ພິທີມອບ-ຮັບ ເຄື່ອງ ຊ່ວຍເຫຼືອຕ້ານພະຍາດໂຄວິດ-19 ຜ່ານລະບົບວິດີໂອທາງໄກຂຶ້ນຢ່າງເປັນທາງການ ທີ່ ນະຄອນຫຼວງວຽງຈັນ, ສປປ ລາວ ແລະ ນະຄອນສາງຊາ, ແຂວງຫູນານ, ສປ ຈີນ.

ເຂົ້າຮ່ວມພິທີຢູ່ນະຄອນຫຼວງວຽງຈັນ ມີ  ສຈ.ປອ ກິແກ້ວ ໄຂຄຳພິທູນ, ກຳມະການກົມການເມືອງ ສູນກາງພັກ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອຕ້ານ, ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ຂັ້ນສູນກາງ, ສະຫາຍ ລາວຂ່າວຊົງ ມະວົງໄຊ, ກຳມະການສູນກາງພັກ, ຮອງຫົວໜ້າຄະນະ ໂຄສະນາອົບຮົມສູນກາງພັກ ຕາງໜ້າຝ່າຍລາວ ກ່າວຄຳເຫັນຕໍ່ພິທີ ເຊິ່ງ ສະຫາຍ ໄດ້ຕີລາຄາສູງ ຕໍ່ ຜົນສຳເລັດໃນການ ລົບລ້າງຄວາມທຸກຍາກຂອງແຂວງຫູນານ ທີ່ໄດ້ກາຍເປັນຕົວແບບທີ່ໂດດເດັ່ນໜຶ່ງ ໃນທົ່ວປະເທດຈີນ, ໂດຍສະເພາະ ແມ່ນການລົບລ້າງຄວາມທຸກຍາກຢູ່ບ້ານ 18 ຖ້ຳ ທີ່ ສະຫາຍເລຂາທິການໃຫຍ່, ປະທານປະເທດ ສີ ຈິ້ນຜິງ ເຄີຍຊີ້ນຳ ນຳພາໂດຍກົງ ແລະ ສະຫາຍ ບຸນຍັງ ວໍລະຈິດ, ອະດີດເລຂາທິການໃຫຍ່, ອະດີດປະທານປະເທດ ແຫ່ງ ສປປ ລາວ ກໍ ໄດ້ໄປຢ້ຽມຢາມບ້ານດັ່ງກ່າວ ໃນປີ 2018 ຜ່ານມາ, ການຖ່າຍທອດຜົນສຳເລັດດັ່ງສົ່ງຜ່ານຮູບເງົາລະຄອນເວທີ ຢູ່ ສປປ ລາວ ໃນຄັ້ງນີ້ ຈະເປັນບົດຮຽນອັນປະເສີດໃຫ້ແກ່ ພັກ, ລັດຖະບານ ແລະ ປະຊາຊົນລາວ ທີ່ພວມສູ້ຊົນແກ້ໄຂ ຄວາມທຸກຍາກໃຫ້ແກ່ປະຊາຊົນ, ເຊິ່ງເປັນວຽກໃນບູລິມະສິດໜຶ່ງ ຂອງ ພັກ ແລະ ລັດຖະບານລາວ, ສະຫາຍ ຍັງໄດ້ ແຈ້ງໃຫ້ຝ່າຍຈີນ ຊາບກ່ຽວກັບ ວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນລາວ ແລະ ຕີລາຄາສູງ ຕໍ່ ການແລກປ່ຽນບົດຮຽນໃນວຽກງານດັ່ງກ່າວ ລະຫວ່າງ ສປປ ລາວ ແລະ ສປ ຈີນ ກໍຄືກັບແຂວງຫຼ ນານ, ເຊິ່ງເປັນການປະກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນອັນເປັນມູນເຊື້ອ ແບບຄູ່ຮ່ວມຍຸດ ທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ກໍຄື ການສ້າງຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍຄື ລະຫວ່າງ ສປປ ລາວ ກັບ ແຂວງຫູນານ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.ໃນພິທີ ສະຫາຍ ຈຽງ ຈ່າຍຕົງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ ຍັງໄດ້ຕາງໜ້າຄະນະພັກແຂວງຫູນານ ມອບອຸປະກອນການແພດ ມູນຄ່າ 1 ລ້ານຢວນ ໃຫ້ແກ່ ສປປ ລາວ ເພື່ອນໍາໃຊ້ເຂົ້າໃນວຽກງານຕ້ານ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19.

ໃນພິທີເປີດສາຍຮູບເງົາໃນຄັ້ງນີ້, ຍັງມີ ສະຫາຍເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ ສະຖານກົງສຸນໃຫຍ່ ແຫ່ງ ສປປ ລາວ ປະຈຳ ນະຄອນສາງຊາ ແຂວງຫູນານ ສະຫາຍການນຳ ຂອງ ນະຄອນຫຼວ ວຽງຈັນ, ແຂວງສະຫວັນນະເຂດ, ອຸດົມໄຊ ແລະ ຫຼວງພະບາງ ທີ່ເປັນແຂວງແຮກສ່ຽວກັບແຂວງຫູນານ ເຂົ້າຮ່ວ ຜ່ານວິດີໂອທາງໄກ ໃນພິທີດັ່ງກ່າວ.

ການຕົກ ລົງເປັນເອກະພາບ ຂອງການນຳສູງສຸດ ຂອງສອງພັກ, ສອງລັດ ໂດຍສະເພາະ ການເປັນຄູ່ ຮ່ວມມືຍຸດທະສາດຮອບດ້ານ, ໝັ້ນຄົງ, ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ- ຈີນ, ຈີນ-ລາວ ໃຫ້ເກີດ ດອກອອກຜົນ ແນໃສ່ ນຳເອົາຜົນປະໂຫຍດຕົວຈິງມາສູ່ປະຊາຊົນສອງ ຊາດຢ່າງແທ້ຈິງ.

Off

Comments are closed.