31st Jan2022

ກອງບັນຊາການປ້ອງກັນສູນກາງ ໄດ້ປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ.

by somchan

ໃນວັນທີ 31 ມັງກອນ 2022 ກອງບັນຊາການປ້ອງກັນສູນກາງ ໄດ້ປາຖະກະຖາວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ. ໂດຍການປະຖະກະຖາຂອງ ພັທ ສູນເພັງ ສິນທະວອນ ຮອງຫົວໜ້າກອງບັນຊາການປ້ອງກັນສູນກາງ, ມີຄະນະພັກ-ຄະນະບັນຊາ, ພະນັກງານຫຼັກແຫຼ່ງ ແລະ ພະນັກງານ-ນັກຮົບເຂົ້າຮ່ວມ.

     ໂອກາດດັ່ງກ່າວ ພັທ ສູນເພັງ ສິນທະວອນ ໄດ້ຍົກໃຫ້ເຫັນ ປະຫວັດສາດການກຳເນີດ ຂອງກອງ ທັບປະຊາຊົນລາວ ໂດຍສະເພາະ ສະພາບແວດລ້ອມ ກ່ອນການສ້າງຕັ້ງກອງທັບປະຊາຊົນລາວ, ຄວາມໝາຍຄວາມສຳຄັນ, ຜົນງານ-ໄຊຊະນະ ແລະ ການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ  ໃນໄລຍະຕໍ່ສູ້ກູ້ຊາດ, ລວມທັງ ໄລຍະປະຕິ ບັດພາລະກິດ ປົກປັກຮັກສາ ແລະ ສ້າງສາພັດທະນາ ປະເທດຊາດ ຂອງກອງທັບປະຊາຊົນລາວ ໃນໄລຍະໃໝ່ ໂດຍຜ່ານໄລຍະ ແຫ່ງການສ້າງຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ ພາຍໃຕ້ການນຳພາ ອັນປີຊາສາມາດ ແລະ ສະຫຼາດສ່ອງໃສ ຂອງພັກປະຊາຊົນ ປະຕິວັດລາວ, ກອງທັບປະຊາຊົນລາວ ໄດ້ຜ່ານຜ່າອຸປະສັກນາໆປະການ, ເຮັດສຳເລັດພາລະກຳ ປະຫວັດສາດ ທີ່ພັກ ແລະ ປະຊາຊົນ ມອບໝາຍໃຫ້ ຢ່າງມີໄຊ, ສາມາດຕີເອົາຊະນະ ຈັກກະພັດລ່າເມືອງ ທັງເກົ່າ ແລະ ໃຫມ່ ຜູ້ຮຸກຮານ ພ້ອມດ້ວຍລູກແຫຼ້ງຕີນມື ຂອງພວກເຂົາ, ສາມາດປົດປ່ອຍປະເທດຊາດ ໄດ້ຢ່າງສົມບູນ. ພ້ອມນີ້, ທ່ານຍັງຍົກໃຫ້ເຫັນ ປະຫວັດມູນເຊື້ອ ອັນສະຫງ່າງາມ ຂອງກອງທັບປະຊາຊົນລາວ ໂດຍສະເພາະ ທາດແທ້, ມູນເຊື້ອຄວາມຈົງຮັກພັກດີ ຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ຕໍ່ອຸດົມການສັງຄົມນິຍົມ; ນໍ້າໃຈຕໍ່ສູ້ພິລະອາດຫານ, ເສຍສະຫຼະ, ກ້າແກ່ນ, ໜຽວແໜ້ນ, ມີໄຫວພິບ, ມີຄວາມດຸໝັ່ນຂະຫຍັນພຽນ, ມີນໍ້າໃຈປະຢັດມັດທະຍັດ, ມີຄວາມສາມັກຄີ ແລະ ມີລະບຽບວິໄນທີ່ເຂັ້ມງວດ. ດັ່ງນັ້ນ, ຜ່ານພຶດຕິກໍາຕົວຈິງ ຈາກການຕໍ່ສູ້ກູ້ຊາດ ຍືດເຍື້ອຍາວນານ ໄດ້ຢັ້ງຢືນຢ່າງຈະແຈ້ງວ່າ: ກອງທັບປະຊາຊົນລາວ ແມ່ນມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ ພາຍໃຕ້ການນຳພາເດັດຂາດ, ໂດຍກົງ ແລະ ຮອບດ້ານ ຂອງພັກ ປະຊາຊົນປະຕິວັດລາວ.​

   ໃນພິທີຍັງໄດ້ຜ່ານຂໍ້ຕົກລົງ ວ່າດ້ວຍການແຕ່ງຕັ້ງນາຍຕຳຫຼວດ ອ້ອມຂ້າງກອງບັນຊາການປ້ອງກັນສູນກາງ. ໃນນີ້ໄດ້ແຕ່ງຕັ້ງ ຫົວໜ້າ ແລະ ຮອງພະແນກ, ສຳນັກງານກອງຮ້ອຍ, ຫົວໜ້າ ແລະ ຮອງໝວດ, ຫົວໜ້າ ແລະ ຮອງໝູ່ ທີ່ຂຶ້ນກັບຫ້ອງ, ກອງພັນ ອ້ອມຂ້າງກອງບັນຊາການປ້ອງກັນສູນກາງ. ທັງນີ້ເພື່ອເປັນການປັບປຸງກົງຈັກການຈັດຕັ້ງ ໃຫ້ມີຄວາມເຂັ້ມແຂງ, ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ.

Off

Comments are closed.