02nd Feb2022

ກອງປະຊຸມເປີດກວ້າງຄະນະພັກກົມໃຫຍ່ຕໍາຫຼວດ

by Peaung Thanonkeo

ກອງປະຊຸມເປີດກວ້າງຄະນະພັກກົມໃຫຍ່ຕຳຫຼວດ ກະຊວງ ປກສ ໄດ້ຈັດຂຶ້ນໃນວັນທີ 2 ກຸມພາ 2022, ເປັນປະທານໂດຍ ສະຫາຍ ພົຕ ຄຳກິ່ງ ຜຸຍຫຼ້າມະນີວົງ ຄະນະປະຈຳພັກກະຊວງ, ເລຂາຄະນະພັກກົມໃຫຍ່, ຫົວໜ້າກົມໃຫຍ່ຕຳຫຼວດ ມີບັນດາຄະນະພັກ, ເລຂາໜ່ວຍພັກກົມ, ຫ້ອງ, ສູນ ເຂົ້າຮ່ວມ.

ພົຈວ ນີລະວົງ ເຈືອງຕະວະລາດ ຮອງເລຂາຄະນະພັກ, ຮອງຫົວໜ້າກົມໃຫຍ່ຕຳຫຼວດ ໄດ້ຂຶ້ນຜ່ານບົດສະຫຼຸບການເຄື່ອນໄຫວຊີ້ນຳ-ນຳພາ ປະຈຳປີ 2021 ແລະ ທິດທາງແຜນການ ປີ 2022 ວ່າ: ຄະນະພັກກົມໃຫຍ່ຕໍາຫຼວດ ໄດ້ຍົກສູງຄວາມຮັບຜິດຊອບການເມືອງຂອງຕົນ ໃນການຊີ້ນຳ-ນຳພາບັນດາໜ່ວຍພັກກົມ, ຫ້ອງ ແລະ ສູນ ເຄື່ອນໄຫວເຮັດໜ້າທີ່ວຽກງານວິຊາສະເພາະຕາມພາລະບົດບາດຂອງຕົນ ເປັນຕົ້ນແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ VI ສຸມໃສ່ຈັດຕັ້ງປະຕິບັດໃນ 1 ແຜນງານ, 2 ແຜນຍຸດທະສາດ, 4 ໂຄງການ, 17 ວຽກຈຸດສຸມ ຂອງກົມໃຫຍ່ຕຳຫຼວດວາງອອກຫັນມາເປັນແຜນງານ, ໂຄງການວຽກງານຈຸດສຸມ, ພົ້ນເດັ່ນແມ່ນການນຳພາຈັດຕັ້ງຜັນຂະຫຍາຍຍຸດທະສາດຕ້ານຢາເສບຕິດ ມາເປັນວ່າລະແຫ່ງຊາດວ່າ ດ້ວຍການແກ້ໄຂບັນຫາຢາເສບຕິດແຕ່ປີ 2021-2023 ສຸມໃສນໍາພາການດໍາເນີນແກ້ໄຂຄະດີຕາມກົດໝາຍ ແລະ ຫຼັກການວິຊາສະເພາະໃນ 1 ປີ ຜ່ານມາ, ມີຄະດີເກີດຂຶ້ນທັງໝົດ 6.581 ເລື່ອງ, ໃນນີ້ດຳເນີນສຳເລັດ 1.681 ເລື່ອງ ແລະ ກໍາລັງສືບຕໍ່ດໍາເນີນ 4.900 ເລື່ອງ.

ນອກນັ້ນໄດ້ເອົາໃຈໃສ່ນຳພາວຽກງານກຳສະພາບແຫຼ່ງຂ່າວ, ຕິດຕາມເປົ້າໝາຍອາດຊະຍາກຳປະເພດຕ່າງໆ ໄດ້ 45 ເປົ້າໝາຍ, ສືບຄົ້ນຫາຄຸ້ມຄອງເປົ້າໝາຍຊັນນະສູດເປົ້າໝາຍໄດ້ 214 ເປົ້າໝາຍ, ໄດ້ຄົ້ນຄ້ວາສ້າງລະບົບຖານຂໍ້ມູນຕ້ານອາຊະຍາກຳ, ສ້າງແຜນແກ້ໄຂຕູ້ເກມ, ຫວຍອອນລາຍ, ການແລກປ່ຽນເງິນຕາບໍ່ຖືກຕ້ອງຕາມກົດໝາຍ, ນຳພາມ້າງຄະດີກຸ່ມແກ້ງຄ້າ-ຂາຍຢາເສບຕິດ ຈຳນວນ 3.407 ລາຍ ມີຜູ້ຖືກຫາ 4,759/ ຄົນ ຍິງ 484 ຄົນ ສາມາດຍຶດຂອງກາງປະເພດຢາບ້າ 5,896.84 Kg, ເຮໂຣອິນ 21,9 Kg, ຍາອິ 4.4g, ໄອສ 1,566,9 Kg, ຝິ່ນ 900g, ແປ້ງຝຸ່ນປະສົມຢາເສບຕິດ 179.30 Kg, ລົດຈັກ 6 ຄັນ, ລົດໃຫຍ່ 8 ຄັນ ແລະ ອື່ນໆ. ພ້ອມທັງໄດ້ຂຶ້ນບັນຊີເປົ້າໝາຍເຄື່ອນໄຫວຄ້າຂາຍຢາເສບຕິດລາຍໃຫຍ່ 1.888 ຄົນ ຍິງ 173 ຄົນ ແລະ ລົງໂຄສະນາເຜີຍແຜ່ຜົນຮ້າຍຂອງຢາເສບຕິດຕາມຈຸດຫຼໍ່ແຫຼມຕ່າງໆ.

ໃນຕໍ່ໜ້າ, ຄະນະພັກກົມໃຫຍ່ຕໍາຫຼວດ ຈະສືບຕໍ່ຕັ້ງໜ້າປະຕິບັດ 4 ຄາດໝາຍ 41 ໂຄງການຂອງອົງຄະນະພັກກະຊວງປ້ອງກັນຄວາມສະຫງົບ ແລະ 1 ແຜນງານ, 2 ແຜນຍຸດທະສາດ, 17 ວຽກຈຸດສຸມຂອງກົມໃຫຍ່ຕຳຫຼວດໃຫ້ມີປະສິດຕິພາບສູງ ໂດຍສະເພາະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຢ່າງແຂງແຮງ.

Off

Comments are closed.