02nd Feb2022

ຫ້ອງການຄຸມຄອງ ແລະ ບໍລິຫານຕົວເມືອງນະຄອນຫຼວງວຽງຈັນ ຖະແຫຼງກ່ຽວກັບການແກ້ໄຂສະພາບໄຟໄໝ້ ຢູ່ສູນບຳບັດຂີ້ເຫຍືອ ຫຼັກ 32

by Peaung Thanonkeo

ທ່ານ ບຸນຈັນ ແກ້ວສີທໍາມະ ຫົວໜ້າຫ້ອງ ການຄຸ້ມຄອງ ແລະ ບໍລິຫານຕົວເມືອງ ນະຄອນຫລວງວຽງຈັນ ພ້ອມດ້ວຍຜູ້ຕາງໜ້າ ຈາກພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ນະຄອນຫລວງວຽງຈັນ ແລະ ອົງການປົກຄອງເມືອງໄຊທານີ


ໄດ້ໃຫ້ສຳພາດຕໍ່ກັບສື່ມວນຊົນໃນວັນທີ 1 ກຸມພາ 2022 ຢູ່ສະຖານີວິທະຍຸ-ໂທ ລະພາບ ນະຄອນຫລວງວຽງຈັນ ກ່ຽວກັບເຫດການໄຟໄໝ້ຢູ່ສູນບຳບັດຂີ້ເຫຍືອຫຼັກ 32ວ່າ: ເຫດການໄຟໄໝ້ດັ່ງກ່າວ ເກີດຂຶ້ນເວລາປະມານ 12:00 ໂມງ ວັນທີ 29 ມັງກອນ 2022, ເຊິ່ງສະໜາມຂີ້ເຫຍື້ອດັ່ງກ່າວ ມີເນື້ອທີ່ ກວ້າງປະມານ 48 ເຮັກຕາ. ໃນນີ້ ເນື້ອທີ່ຖືກໄຟໄໝ້ກວມເອົາປະມານ 70% ຂອງເນື້ອທີ່ທັງໝົດ, ເຊິ່ງສາເຫດອາດເກີດຈາກປະກາຍໄຟຂອງ ແກ້ສ ຢູນີເທນ ເຊິ່ງເປັນອາຍແກ້ສທໍາມະຊາດ ທີ່ເກີດຈາກການສະສົມຂອງເສດຂີ້ເຫຍື້ອເປັນເວລາດົນ. ຈາກນັ້ນ, ຂະແໜງການຮັບຜິດຊອບສະໜາມຂີ້ເຫຍື້ອ ໄດ້ສົມທົບກັບພາກສ່ວນດັບເພີງນະຄອນຫລວງ ເພື່ອນໍາໃຊ້ລົດດັບເພີງຫລາຍຄັນມາສີດນໍ້າດັບໄຟ, ພ້ອມທັງນໍາໃຊ້ລົດດ້າມ, ລົດຈົກ ຈໍານວນໜຶ່ງ ຂົນດິນມາຖົມບໍລິເວນຖືກໄຟໄໝ້ ແລະ ມາຮອດວັນທີ 1 ກຸມພາ 2022 ຖືວ່າການແກ້ໄຂສະພາບໄຟໄໝ້ຢູ່ສະໜາມຂີ້ເຫຍື້ອຄັ້ງນີ້ແມ່ນສໍາເລັດ ແລະ ສະຫງົບລົງເປັນປົກກະຕິແລ້ວ. ສ່ວນຜົນເສຍຫາຍຕໍ່ຊີວິດ ແລະ ຊັບສິນຕ່າງໆແມ່ນບໍ່ມີ ແລະ ນີ້ເປັນເຫດການໄຟໄໝ້ ສະໜາມກໍາຈັດຂີ້ເຫຍື້ອຄັ້ງທີ 2, ເຊິ່ງຄັ້ງທໍາອິດໄໝ້ໃນປີ 2018 ໂດຍໃຊ້ເວລາຫລາຍ 10 ວັນ ຈຶ່ງສາມາດສະກັດກັ້ນໄຟໄວ້ໄດ້ເຊີ່ງບາງຕອນທ່ານໄດ້ກ່າວວ່າ.

ພ້ອມນີ້ ທ່ານ ແອງພອນ ແພງສຸກັນ ຮອງຫົວໜ້າພະແນກຊັບພະຍາກອນ ທໍາມະຊາດ ແລະ ສິ່ງແວດລ້ອມ ນະຄອນຫລວງວຽງຈັນຍັງ ໃຫ້ຮູ້ຕື່ມອີກວ່າ: ພາຍຫລັງມີສະພາບໝອກຄວັນ ປົກຄຸມເປັນບໍລິເວນກວ້າງຢູ່ຫລາຍພື້ນທີ່ໃນນະຄອນຫລວງວຽງຈັນ ທີ່ເກີດຈາກເຫດໄຟໄໝ້ຄັ້ງນີ້, ໃນວັນທີ 30-31 ມັງກອນ 2022 ໜ່ວຍງານກ່ຽວຂ້ອງດ້ານສິ່ງແວດ ລ້ອມ ໄດ້ລົງຕິດຕາມສະພາບໝອກຄວັນຢ່າງໃກ້ຊິດ, ພ້ອມທັງໄດ້ຕິດຕັ້ງເຄື່ອງວັດແທກຄຸນນະພາບອາກາດ ແລະ ເກັບກໍາພາບຖ່າຍມູມສູງ ໂດຍໄດ້ຕິດຕັ້ງເຄື່ອງວັດແທກຄວາມເຂັ້ມຂຸ້ນຂອງ ລະອອງຝຸ່ນໃນອາກາດ ຢູ່ 3 ຈຸດຄື: ຈຸດທີ 1 ຢູ່ບ້ານຜາສຸກ (ບໍລິເວນສະໜາມຂີ້ເຫຍື້ອ) ເຫັນວ່າຄວາມເຂັ້ມຂຸ້ນຂອງລະອອງຝຸ່ນນ້ອຍກວ່າ 2,5 (PM 2,5) ມີຄ່າຕໍ່າສຸດລະດັບ 8,3 ແລະ ສູງສຸດ 1.488 ໄມຄຣອນ ແລະ ຄ່າສະເລ່ຍໃນ 24 ຊົ່ວໂມງຢູ່ໃນລະດັບ 101 ໄມຄຣອນ; ຈຸດທີ 2 ຕິດຕັ້ງເຄື່ອງກວດຢູ່ບ້ານປາກຊາບເກົ່າ ເຫັນວ່າຄວາມເຂັ້ມຂຸ້ນຂອງລະອອງຝຸ່ນ PM 2,5 ຕໍ່າສຸດລະດັບ 80 ແລະ ສູງສຸດ 110 ໄມຄຣອນ. ນອກນີ້ໃນຈຸດດັ່ງກ່າວຍັງມີ ປະລິມານຄ່າຄວາມເຂັ້ມຂຸ້ນຂອງ ແກ້ສຊັນເຟີໄດອອກຊາຍ ແມ່ນ 0,15 ppm ຕໍ່ຊົ່ວໂມງ, ເຊິ່ງເຫັນວ່າສູງກວ່າມາດຕະຖານສິ່ງແວດລ້ອມກໍານົດໄວ້ລະດັບ 0,13 ppm ຕໍ່ຊົ່ວໂມງ. ນອກນີ້ ຍັງພົບປະລິມານ ແກ້ສຄາບອນໂມນອກໄຊ ມີຄວາມເຂັ້ມຂຸ້ນລະດັບ 6 ppm ຕໍ່ຊົ່ວໂມງ, ເຊິ່ງຕໍ່າກວ່າມາດຕະຖານສິ່ງແວດລ້ອມກໍານົດໄວ້ໃນລະດັບ 30 ppm ຕໍ່ຊົ່ວໂມງ ແລະ ຈຸດທີ 3 ໄດ້ຕິດຕັ້ງເຄື່ອງກວດຢູ່ ບ້ານໂນນສະອາດ ເຫັນວ່າຄວາມເຂັ້ມຂຸ້ນ ຂອງລະອອງຝຸ່ນຕໍ່າສຸດແມ່ນ 16 ແລະ ສູງສຸດແມ່ນ 121 ໄມຄຣອນ ແລະ ຄ່າສະເລ່ຍ 24 ຊົ່ວໂມງ ແມ່ນ 46 ໄມຄຣອນ. ເຊິ່ງໝອກຄວັນດັ່ງກ່າວ ອາດສົ່ງຜົນກະທົບຕໍ່ສຸຂະພາບໂດຍລວມຂອງປະຊາຊົນເລັກໜ້ອຍ ໂດຍສະເພາະຜູ້ມີພະຍາດລະບົບຫາຍໃຈ, ຜູ້ເຖົ້າ ແລະ ເດັກນ້ອຍ.

ນັບແຕ່ວັນທີ 1 ກຸມພາ 2022 ສະພາບໄຟໄໝ້ຄັ້ງນີ້ ໄດ້ສະຫງົບລົງ ແລະ ບັນຫາໝອກຄວັນແມ່ນຈາງຫາຍໄປຫລາຍ, ເຮັດໃຫ້ສະພາບອາກາດໃນຫລາຍພື້ນທີ່ ກໍມີຄວາມປອດໂປ່ງເປັນປົກກະຕິແລ້ວ.

Off

Comments are closed.