05th Feb2022

ຫົວໜ້າ ກອງບັນຊາການ ປກສ ແຂວງຫົວພັນ ພົບປະຢ້ຽມຢາມ ໂຮງຮຽນ ການເມືອງ-ການປົກຄອງ ແຂວງຫົວພັນ.

by somchan

ໃນວັນທີ 03 ກຸມພາ 2022 ພົຈວ ແອນ ອຸ່ນອານົງນຸດ ຫົວໜ້າ ກອງບັນຊາການ ປກສ ແຂວງຫົວພັນ ພ້ອມດ້ວຍຄະນະ ໄດ້ລົງພົບປະ ຢ້ຽມຢາມ ໂຮງຮຽນ ການເມືອງ – ການປົກຄອງ ແຂວງຫົວພັນ. ເຊິ່ງໄດ້ຮັບກຽດຕ້ອນຮັບ ໂດຍ ທ່ານ ນາງ ແຍງເພັດ ບຸນມີໄຊ ຫົວໜ້າໂຮງຮຽນ ການເມືອງ-ການປົກຄອງແຂວງ ພ້ອມດ້ວຍຄະນະ ຕະຫຼອດຮອດຄູ-ອາຈານ ແລະ ນັກສຶກສາຮຸ້ນທີ 13, ຮຸ້ນທີ່ 14 ເຂົ້າຮ່ວມ.

ການລົງພົບປະ ແລະ ຢ້ຽມຢາມຄັ້ງນີ້ ໄດ້ຮັບຟັງການລາຍງານສະພາບລວມ ໂດຍຫຍໍ້ຫຍໍ້ກ່ຽວກັບ ການນຳ-ພາຊີ້ນຳ ປະຕິບັດການຮຽນ-ການສອນ ຂອງໂຮງຮຽນ ຈາກທ່ານ ນາງ ແຍງເພັດ ບຸນມີໄຊ ຫົວໜ້າໂຮງຮຽນ ການເມືອງ-ການປົກຄອງແຂວງ ໃນປະຈຸບັນມີພະນັກງານ-ຄູອາຈານທັງໝົດ 28 ສະຫາຍ, ຍິງ 10 ສະຫາຍ, ນັກສຶກສາຊັ້ນກາງ 15 ເດືອນ, ຮຸ້ນທີ 13 ມີ 50 ສະຫາຍ, ຍິງ 08 ສະຫາຍ,​ ຮຸ້ນທີ 14 ມີ 50 ສະຫາຍຍິງ 17 ສະຫາຍ, ການຮຽນການສອນໃນໄລຍະຜ່ານມາ ໄດ້ຈັດຕັ້ງປະຕິບັດການຄົ້ນຄວ້າ ທາງດ້ານທິດສະດີ ແລະ ພຶດຕິກຳ ຮັບໃຊ້ເຂົ້າໃນການຮຽນການສອນ, ສະໜອງຂໍ້ມູນວິທະຍາສາດ ໃຫ້ການວາງແນວທາງນະໂຍບາຍຄະນະບໍລິຫານງານພັກ ແລະ ອົງການປົກຄອງແຂວງ.

ໃນໂອກາດທີ່ ພົຈວ ແອນ ອຸ່ນອານົງນຸດ ໄດ້ເນັ້ນໜັກໃຫ້ຄະນະອຳນວຍການໂຮງຮຽນ, ຄູ-ອາຈານ ຕ້ອງເປັນເຈົ້າການ ແລະ ເປັນແບບຢ່າງໃນວຽກງານຂອງຕົນ, ມີລະບຽບວິໄນເຂັ້ມງວດ,​ ເອົາໃຈໃສ່ຄົ້ນຄວ້າແຕ່ງບົດສອນຂອງຕົນ ຊອກວິທີການຖ່າຍທອດຄວາມຮູ້ ໃຫ້ສອດຄ່ອງກັບເປົ້າຫມາຍ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ກາຍເປັນຄູສອນດີ-ສອນເກັ່ງ, ນັກສຶກສາ ຕ້ອງເອົາໃຈໃສ່ຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານສືບທອດ        ທີ່ມີຄຸນທາດການເມືອງໜັກແໜ້ນ, ມີອຸດົມການທີ່ຖືກຕ້ອງ.

ນອກນີ້, ພົຈວ ແອນ ອຸ່ນອານົງນຸດ ພ້ອມດ້ວຍຄະນະ ຍັງໄດ້ຕ່າງໃຫ້ກອງບັນຊາການ ປກສ ແຂວງຫົວພັນ ໄດ້ມອບເຄື່ອງຮັບໃຊ້ ການຮຽນ-ການສອນ ໃຫ້ໂຮງຮຽນ ການເມືອງ-ການປົກຄອງແຂວງຫົວພັນ ລວມມູນຄ່າ 10.150.000 ກີບ.

Off

Comments are closed.