11th Feb2022

ສຳເລັດກອງປະຊຸມສະຫຼຸບການຈັດຕັ້ງປະຕິບັດວຽກງານຄຸມຂັງ-ດັດສ້າງ

by Peaung Thanonkeo

ກອງປະຊຸມສະຫຼຸບການຈັດຕັ້ງປະຕິບັດວຽກງານຄຸມຂັງ-ດັດສ້າງປະຈຳປີ 2021 ແລະ ບາງທິດທາງແຜນການ ປີ 2022 ໄດ້ສໍາເລັດໃນວັນທີ 11 ກຸມພານີ້ . ພາຍຫລັງດໍາເນີນມາເປັນເວລາ 2 ວັນ, ໂດຍການເປັນປະທານຂອງ ພົຈວ ສົມລິດ ດາວຮຸ່ງສຸລິ ຄະນະພັກກະຊວງ ຫົວໜ້າກົມຕຳຫຼວດຄຸມຂັງ-ດັດສ້າງ, ເປັນກຽດເຂົ້າຮ່ວມຂອງ ພົຕ ປອ ທອງເຫຼັກ ມັງໜໍ່ເມກ ຄະນະປະຈຳພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫົງບ , ມີຄະນະກົມ, ພະນັກງານຫຼັກແຫຼ່ງ, ບັນດາຄ້າຍຄຸມຂັງທົ່ວປະເທດເຂົ້າຮ່ວມ.

ໃນວາລະການດໍາເນີນກອງປະຊຸມ ໄດ້ພ້ອມກັນຕີລາຄາຜົນງານການຈັດຕັ້ງປະຕິວັດວຽກງານໃນໄລຍະຜ່ານມາ ພ້ອມທັງຍົກໃຫ້ເຫັນດ້ານດີຜົນງານ ແລະ ຂໍ້ຄົງຄ້າງທີ່ຈະຕ້ອງໄດ້ພ້ອມກັນສືບຕໍ່ແກ້ໄຂໃນຕໍ່ໜ້າ, ໃນກອງປະຊຸມຍັງໄດ້ມີການປະກອບຄຳຄິດຄຳເຫັນຈາກບັນດາຄ້າຍຄຸມຂັງ ທົ່ວປະເທດເພື່ອເຮັດໃຫ້ວຽກງານຄຸມຂັງ-ດັດສ້າງມີຄວາມເຂັ້ມງວດ ແລະ ມີປະສິດທິຜົນ.

ໂອກາດດັ່ງກ່າວ ພົຕ ປອ ທອງເຫຼັກ ມັງໜໍ່ເມກ ຮອງລັດຖະມົນຕີ ກະຊວງປ້ອງກັນຄວາມສະຫົງບ ກໍໄດ້ໂອລົມ ແລະ ເນັ້ນໜັກຄະນະພັກ-ຄະນະບັນຊາ ເອົາໃຈໃສ່ປັບປຸງກໍ່ສ້າງທາງດ້ານການເມືອງແນວຄິດ ຂອງພະນັກງານ-ນັກຮົບໃຫ້ມີຄວາມໜັກແໜ້ນ, ມີຄຸນທາດການເມືອງດີ, ມີຈັນຍາບັນ, ເປັນກຳລັງປະກອບອາວຸດຂອງພັກ, ເປັນກຳລັງຕຳຫຼວດຂອງປະຊາຊົນໂດຍປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ, ສຸມໃສ່ປັບປຸງວຽກງານວິຊາສະເພາະໃຫ້ເຂັ້ມແຂງຂຶ້ນກ່ວາເກົ່າ ໂດຍສະເພາະແມ່ນການຈັດຕັ້ງປະຕິບັດໂຄງການທີ່ກຳນົດ 12 ໜ້າວຽກໃຫ້ງານໜັກແໜ້ນ ໃນນີ້ແມ່ນເລັ່ງໃສ່ວຽກງານປ້ອງກັນຄວາມປອດໄພຢູ່ແຕ່ລະຄ້າຍຄຸມຂັງປະຈຳພາກ, ຄ້າຍດັດສ້າງ, ຄ້າຍກັກຂັງຊົ່ວຄາວ ຂອງສູນກາງ ແລະ ທ້ອງຖິ່ນບໍໃຫ້ມີເຫດການນັກໂທດແຫກຄຸກໂຕນໜີ, ເກີດການປະທ້ວງ ແລະ ອື່ນໆ ເອົາໃຈໃສ່ຄຸ້ມຄອງນັກໂທດ, ຜູ້ຖືກຫາ, ຜູ້ຖືກດັດສ້າງ ໃຫ້ເຂົ້າສູ່ລະບຽບທີ່ຮັດກຸມ, ມີການຈັດສັນເຂດຄຸ້ມຄອງແຕ່ລະເປົ້າໝາຍຢ່າງລະອຽດ.

Off

Comments are closed.