18th Feb2022

ປກສ ເມືອງ ໄຊທານີ ຈັບຕົວຄົນລັກງົວ ໄດ້ 1 ຄົນ.

by somda phoneor

ໃນວັນທີ 13 ກຸມພາ 2022 ນີ້ ປກສ ເມືອງ ໄຊທານີ ໄດ້ຮັບແຈ້ງຄວາມຈາກ ທ້າວ ສຸດາເພັດວ່າ ໄດ້ມີຄົນຮ້າຍມາລັກງົວຂອງຕົນເອງ ທີ່ລ່າມໄວ້ຢູ່ເຂດ ບ້ານໂນນສະອາດ ຈາກນັ້ນເຈົ້າຫນ້າທີ່ຈື່ງໄດ້ຕິດຕາມກວດກາ ຮອດເວລາ 13 ໂມງຂອງວັນດຽວກັນຈື່ງສາມາດກັກຕົວຄົນຮ້າຍທີ່ກໍ່ເຫດໄດ້ 1 ຄົນ ຄື ທ້າວ ຄວາຍ  ອາຍຸ 34 ປີ ອາຊີບຄ້າຂາຍ ຢູ່ບ້ານໄຮ່ ເມືອງໄຊທານີ ນະຄອນຫລວງວຽງຈັນ.

ຜ່ານການສືບສວນ – ສອບສວນ ທ້າວ ຄວາຍ ໄດ້ໃຫ້ການຕໍ່ເຈົ້າຫນ້າທີ່ວ່າ ຕົນເອງ ແມ່ນເຮັດອາຊີບ ຊື້ – ຂາຍງົວ, ຄວາຍ ນຳຜູ້ເປັນພໍ່ ມາໄດ້ 16 ປີແລ້ວ ຕົກມາຮອດກາງປີ 2021ຕົນເອງແມ່ນຕິດເກມອອນລາຍທາງມືຖື ຈົນເຖີງຂັ້ນກູ້ຢືມເງີນນຳຄົນອື່ນ ຕໍ່ມາເຈົ້າຂອງເງີນໄປທວງຖາມແຕ່ຕົນເອງບໍ່ມີເງີນໃຫ້ຈື່ງເກີດມີແນວຄິດຊອກຫາລັກງົວຂອງປະຊາຊົນມາຂາຍ ດ້ວຍຮູບການຂີ່ລົດຊອກຊື້ງົວ – ຄວາຍ ຢູ່ແຕ່ລະບ້ານ ຕົກມາຮອດວັນທີ 13 ກຸມພາ 2022 ຕົນເອງຈື່ງໄດ້ຂັບຂີ່ລົດຮຸນໃດ ສີຂາວຫມາຍເລກທະບຽນ ກສ 8579 ກຳແພງນະຄອນ ໄປຕາມເສັ້ນທາງຕັດໃຫມ່ລັດອອກໄປຫາບ້ານດົງຫມາກຄາຍ ພໍຂີ່ໄປຮອດເຂດບ້ານ ໂນນສະອາດ ພົບເຫັນງົວແມ່ສີໂມກແດງທີ່ລ່າມໄວ້ຢູ່ແຄມທາງຫ່າງຈາກເຮືອນປະຊາຊົນ ປະມານ 100 ແມັດ ຈື່ງມີແນວຄິດລັກເອົາ ຈື່ງໄດ້ຈອດລົດ ລົງດືງງົວຂື້ນລົດ ແລ້ວຂັບຂີ່ມາເຮືອນ ເພື່ອລໍຖ້ານຳງົວໄປໂຮງຂ້າສັດ ຮອດເວລາ 13 ໂມງຈື່ງຖືກເຈົ້າຫນ້າທີ່ກັກຕົວໄດ້.

ປະຈຸບັນ ເຈົ້າຫນ້າທີ່ພວມດຳເນີນຄະດີຕາມຂັ້ນຕອນຂອງກົດຫມາຍ.

Off

Comments are closed.