18th Feb2022

ປະກາດແຕ່ງຕັ້ງຫົວຫນ້າຫ້ອງການຄະນະກໍາມະການ ປກຊ-ປກສ ແຂວງ ບໍລິຄໍາໄຊ.

by somda phoneor

ວັນທີ 17 ກຸມພາ 2022 ນີ້, ແຂວງ ບໍລິຄໍາໄຊ ໄດ້ມີພິທີປະກາດການແຕ່ງຕັ້ງຫົວຫນ້າຫ້ອງການຄະນະກໍາມະການ ປກຊ-ປກສ ແຂວງ ບໍລິຄໍາໄຊ ເປັນກຽດເຂົ້າຮ່ວມໂດຍ ທ່ານ ກອງແກ້ວ ໄຊສົງຄາມ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ບໍລິຄໍາໄຊ ປະທານຄະນະກໍາມະການປ້ອງກັນຊາດ-ປ້ອງກັນຄວາມສະຫງົບແຂວງ, ມີພົນຈັດຕະວາ ບຸນເດື່ອ ພັນສົດໃສ ຮອງຫົວຫນ້າຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບສູນກາງ, ມີຫົວຫນ້າກອງບັນຊາການທະຫານແຂວງ, ກອງບັນຊາການ ປກສ ແຂວງ, ພະນັກງານ-ນັກຮົບຫ້ອງການ ປກຊ-ປກສ ແຂວງ ເຂົ້າຮ່ວມ.

ພັນໂທ ສົມຈັນ ພົມມະລາ ຫົວຫນ້າພະແນກພະນັກງານ ຫ້ອງການເມືອງ ກອງບັນຊາການ ທະຫານແຂວງ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ນາຍ ທະຫານຢູ່ກອງບັນຊາການທະຫານແຂວງ ບໍລິຄໍາໄຊ ພັກການເມືອງກຽມຮັບບໍານານ ເຊິ່ງໄດ້ອະນຸມັດໃຫ້ ພັນເອກ ດວງສີ ພັນທະວົງ ຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫງົບ ເເຂວງ ບໍລິຄໍາໄຊ ພັກການເພື່ອກຽມຮັບບໍານານ, ໃນໂອກາດດັ່ງກາວ ພັນເອກ ດວງສີ ພັນທະວົງ ຫົວຫນ້າຫ້ອງການປ້ອງກັນຊາດ-ປ້ອງກັນຄວາມສະຫງົບ ແຂວງ ບໍລິຄໍາໄຊ ຜູ້ເກົ່າກໍ່ໄດ້ລາຍງານການນໍາພາຈັດຕັ້ງປະຕິບັດວຽກງານ ແລະ ເຮັດສໍາເລັດຫນ້າທີ່ໃນໄລຍະຜ່ານມາ, ພ້ອມກັນນັ້ນກໍ່ໄດ້ກ່າວມອບຫມາຍຫນ້າທີ່ໃຫ້ຫົວຫນ້າຫ້ອງການປ້ອງກັນຊາດ-ປ້ອງກັນຄວາມສະຫງົບ ແຂວງ ບໍລິຄໍາໄຊ ຜູ້ໃຫມ່ສືບຕໍ່ນໍາພາຈັດຕັ້ງປະຕິບັດ, ຈາກນັ້ນ ພົຈວ ບຸນເດື່ອ  ພັນສົດໃສ ຮອງຫົວຫນ້າຫ້ອງການຄະນະກໍາມະການ ປ້ອງກັນຊາດ-ປ້ອງກັນຄວາມສະຫງົບສູນກາງ ໄດ້ຜ່ານຂໍ້ຕົກລົງ ຂອງຄະນະກຳມະການປ້ອງກັນຊາດ-ປ້ອງກັນຄວາມສະຫງົບສູນກາງ ວ່າດ້ວຍການແຕ່ງຕັ້ງຫົວຫນ້າຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫງົບ ແຂວງ ບໍລິຄໍາໄຊ ເຊິ່ງໄດ້ແຕ່ງຕັ້ງ  ພັນໂທ ເພັດສະໄໝ ໂຮມຂະສິດ ຮອງຫົວຫນ້າຫ້ອງການຄະນະກໍາມະການ ປກສ-ປກສ ແຂວງ ເປັນຫົວຫນ້າຫ້ອງການຄະນະກໍາມະການປກຊ-ປກສ ແຂວງ ບໍລິຄໍາໄຊ, ໃນພິທີຍັງໄດ້ເຊັນບົດບັນທຶກມອບ-ຮັບຫນ້າທີ່ ລະຫ່ວາງ ພັນເອກ ດວງສີ ພັນທະວົງ ຫົວຫນ້າຫ້ອງການປ້ອງກັນຊາດ-ປ້ອງກັນຄວາມສະຫງົບ ແຂວງ ບໍລິຄໍາໄຊ ຜູ້ເກົ່າ ແລະ ພັນໂທ ເພັດສະໄຫມ ໂຮມຂະສິດ ຫົວຫນ້າຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫົງບ ແຂວງ ບໍລິຄໍາໄຊ ຜູ້ໃຫມ່.

ໃນໂອກາດທີ່ມີຄວາມຫມາຍຄວາມສໍາຄັນນີ້ ທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄໍາໄຊ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ, ເຊິ່ງທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດໃນການນໍາພາຈັດຕັ້ງປະຕິບັດຫນ້າທີ່ວຽກງານຂອງຫົວຫນ້າຫ້ອງການຄະນະກໍາມະການ ປ້ອງກັນຊາດ-ປ້ອງກັນຄວາມສະຫົງບ ແຂວງ ບໍລີຄໍາໄຊ ຜູ້ເກົ່າ ທີ່ສາມາດເຮັດສໍາເລັດຫນ້າທີ່ທີ່ພັກ-ລັດ ແລະ ປະຊາຊົນ ມອບຫມາຍໃຫ້ໃນໄລຍະຜ່ານມາ, ພ້ອມກັນນັ້ນທ່ານຍັງໄດ້ເນັ້ນຫນັກໃຫ້ຫົວໜ້າຫ້ອງການຄະນະກໍາມະການປ້ອງກັນຊາດ-ປ້ອງກັນຄວາມສະຫົງບ ແຂວງ ບໍລິຄໍາໄຊ ຜູ້ໃຫມ່ຈົ່ງສືບຕໍ່ນໍາພາຈັດຕັ້ງປະຕິບັດຫນ້າທີ່ວຽກງານການເມືອງ ແລະ ວຽກງານວິຊາສະເພາະໃຫ້ໄດ້ຮັບຜົນ ສໍາເລັດ, ບໍ່ເປັນເສນາທິການໃຫ້ແກ່ຄະນະພັກ, ຄະນະບັນຊາແຕ່ລະຂັ້ນໃນການສ່ອງແສງລາຍງານສະພາບການຕ່າງໆຢ່າງເປັນປົກກະຕິ ແລະ ທັນການ, ສືບຕໍ່ປະສານສົມທົບກັບທຸກພາກສ່ວນຈັດຕັ້ງຜັນຂະຫຍາຍແນວທາງວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ກາຍເປັນວຽກງານຂອງທົ່ວປວງຊົນຮອບດ້ານຢ່າງກ້ວາງຂວາງ.

 

Off

Comments are closed.