19th Feb2022

ບໍລິສັດລົດໄຟ ລາວ-ຈີນ ຊີ້ແຈງການຊື້ປີ້ຍາກ ແລະ ປີ້ບໍ່ພຽງພໍ.

by somda phoneor

ໃນວັນທີ 18 ກຸມພາ 2022 ນີ້, ທ່ານ ວົງທອງ ສຸວັນທອງ ຮອງວິສະວະກອນເອກບໍລິສັດທາງ ລົດໄຟລາວ-ຈີນ ຈໍາກັດ ໄດ້ໃຫ້ຄວາມກະຈ່າງແຈ້ງ ແລະ ຊີ້ແຈງບາງບັນຫາຕໍ່ສັງຄົມ ກ່ຽວກັບບໍລິການ ຂົນສົ່ງທາງລົດໄຟລາວ-ຈີນ ໃນກໍລະນີການຊື້ປີ້ຍາກ ແລະ ປີ້ລົດໄຟ ບໍ່ພຽງພໍ ວ່າ: ປັດຈຸບັນ ເພື່ອອໍານວຍຄວາມສະດວກໃຫ້ແກ່ຜູ້ທີ່ມາຊື້ປີ້ຍາກ ຫລື ມາຊື້ປີ້ບໍ່ໄດ້, ປີ້ບໍ່ພຽງພໍ ໂດຍທາງບໍລິສັດ ໄດ້ເພີ່ມ ຖ້ຽວລົດໄຟໃນມື້ວັນເສົາ-ທິດ ທີ່ມີຜູ້ໂດຍສານເປັນຈໍານວນຫລວງຫລາຍ ຫລື ຖ້າຍັງບໍ່ພຽງພໍ ທາງ ບໍລິສັດຈະນໍາເອົາລົດ EMU ລົດໄຟທີ່ມີ 2 ຂະບວນໃນປັດຈຸບັນຕໍ່ໃສ່ກັນ, ເຊິ່ງປັດຈຸບັນ ຖ້ຽວຫນຶ່ງ ສາມາດຂົນສົ່ງຜູ້ສານໄດ້ 700 ຄົນຕໍ່ຖ້ຽວ ເມື່ອຕໍ່ລົດໄຟ 2 ຂະບວນໃສ່ກັນ ຈະສາມາດຂົນສົ່ງ ຜູ້ໂດຍສານໄດ້ເຖິງ 1.400 ຄົນຕໍ່ຖ້ຽວ. ພ້ອມນີ້, ຍັງຈະມີລົດໄຟຂົນສົ່ງຄວາມໄວທໍາມະດາ ທີ່ສາມາດ ຂົນສົ່ງຜູ້ໂດຍສານໄດ້ 1 ພັນກວ່າຄົນ, ເຊິ່ງຈະເປີດໃຫ້ບໍລິການລົດໄຟຄວາມໄວທໍາມະດາໃນເດືອນ ມີນາ ທີ່ຈະມາເຖິງນີ້.

ທ່ານ ວົງທອງ ສຸວັນທອງ ໃຫ້ຮູ້ວ່າ: ເພື່ອອໍານວຍຄວາມສະດວກໃຫ້ແກ່ຜູ້ທີ່ຈະໄປຊື້ປີ້ລົດໄຟ ປັດຈຸບັນ ທາງບໍລິສັດທາງລົດໄຟລາວ-ຈີນ ມີແຜນທີ່ຈະເປີດບໍໍລິການຂາຍປີ້ ຢູ່ສູນການຄ້າວຽງຈັນເຊັນເຕີ ໂດຍຈະເປີດໃຫ້ບໍລິການໃນໄວໆນີ້, ປັດຈຸບັນກໍາລັງກະກຽມສະຖານທີ່ ເພື່ອເປີດບໍລິການຂາຍປີ້. ຕໍ່ກັບບັນຫາ ການຊື້ປີ້ລົດໄຟ ແລ້ວໄປຂາຍຕໍ່ໃນລາຄາທີ່ເເພງກວ່າ ທາງບໍລິສັດ ແມ່ນມີການຕໍ່ຕ້ານທີ່ສຸດຕໍ່ກັບບັນຫານີ້, ເຊິ່ງທາງບໍລິສັດລົດໄຟລາວ-ຈີນ ກໍໄດ້ສົມທົບກັບພາກສ່ວນກ່ຽວຂ້ອງ ໂດຍສະເພາະແມ່ນກົມຕໍາຫລວດທາງລົດໄຟ ທີ່ມີເຈົ້າຫນ້າທີ່ປະຈໍາຢູ່ແຕ່ລະສະຖານີ ໃຫ້ຕິດຕາມກວດກາ ລວມທັງສັງລວມຂໍ້ມູນຂ່າວສານ ແລະ ນໍາເອົາຜູ້ທີ່ກະທຳຜິດຕໍ່ລະບຽບ ຖ້າເປັນພະນັກງານພາຍໃນ ບໍລິສັດລົດໄຟລາວ-ຈີນ ກໍຕ້ອງໄດ້ປະຕິບັດລະບຽບຕໍ່ຜູ້ກຽວ.ສຳລັບການຂາຍປີ້ອອນລາຍ ທາງບໍລິສັດ ເຫັນໄດ້ເຖິງຄວາມສໍາຄັນສູງ ເເລະ ເຫັນໄດ້ເຖິງຄວາມຫຍຸ້ງຍາກຂອງປະຊາຊົນ ທີ່ຕ້ອງມາລໍຖ້າຊື້ປີ້ ລົດໄຟເເຕ່ເຊົ້າໆ ເຊິ່ງທາງບໍລິສັດກໍໄດ້ມີການປຶກສາຫາລືກັນກັບຜູ້ຊຽວຊານໃນດ້ານນີ້ສະເພາະ, ໄດ້ມີການຄົ້ນຄວ້າປະສານສົມທົບກັນ ແລະ ໄດ້ ມີຮູບແບບໃນເບື້ອງຕົ້ນແລ້ວ ເປົ້າຫມາຍໃນອານາຄົດ ແມ່ນຈະມີລະບົບການຂາຍປີ້ແບບອອນລາຍເແນ່ນອນ. ປັດຈຸບັນ ບໍລິສັດລົດໄຟລາວ-ຈີນ ໄດ້ເປີດໃຫ້ບໍລິການຂົນສົ່ງຜູ້ໂດຍສານ 7 ສະຖານີແລ້ວ ຄື: ສະຖານີນະຄອນຫຼວງວຽງຈັນ, ສະຖານີໂພນໂຮງ, ສະຖານີວັງວຽງ, ສະຖານີຫລວງພະບາງ, ສະຖານີເມືອງ ໄຊ, ສະຖານີບໍ່ເຕັນ ແລະ ສະຖານີນາເຕີຍ.

Off

Comments are closed.