21st Feb2022

ເມືອງປາກງື່ມ ສະຫຼຸບການປະຕິບັດວາລະແຫ່ງຊາດ ວ່າດ້ານການແກ້ໄຂບັນຫາຢາເສບຕິດ ຢູ່ບ້ານດອນແຍງ

by somda phoneor

ບ້ານ ດອນແຍງ ເມືອງ ປາກງື່ມ ນະຄອນຫຼວງວຽງຈັນ ສະຫຼຸບຂະບວນການວຽກງານກໍ່ສ້າງວຽກງານການເມືອງ ເພື່ອຈັດຕັ້ງປະຕິບັດວາລະແຫ່ງຊາດ ວ່າດ້ານການແກ້ໄຂບັນຫາຢາເສບຕິດ ແລະ ສ້າງຄອບຄົວ, ບ້ານປ້ອງກັນຄວາມສະຫງົບດີ, ໃນວັນທີ 18 ກຸມພາ ນີ້, ພາຍຫຼັງທີ່ໄດ້ຈັດຕັ້ງປະຕິບັດມາແຕ່ວັນທີ 10-18 ກຸມພາ 2022 ເຂົ້າຮ່ວມໂດຍ ພັທ ອາທອນ ລິດປັນຍາ ຮອງກອງບັນຊາການ ປກສ ເມືອງ ປາກງື່ມ ມີພະນັກງານກໍ່ສ້າງຮາກຖານ ປກສ ກຸ່ມ II ບ້ານ ໂດນ ແລະ ນາຍບ້ານ ບ້ານດອນແຍງ, ພ້ອມດ້ວຍປະຊາຊົນພາຍໃນບ້ານດອນແຍງເຂົ້າຮ່ວມ.

ທ່ານ ນັນ ຫານຊະນະ ນາຍບ້ານໆ ດອນແຍງ ໄດ້ລາຍງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ສ້າງຄອບຄົວ, ບ້ານປ້ອງກັນຄວາມສະຫງົບດີ ນັບແຕ່ມື້ຈັດຕັ້ງປະຕິບັດວັນທີ 10-18 ກຸມພາ 2022 ບ້ານດອນແຍງ ແມ່ນບ້ານໜຶ່ງທີ່ຢູ່ໃນ 53 ບ້ານ ຂອງເມືອງ ປາກງື່ມ ທີ່ຕັ້ງຢູ່ລຽບຕາມແຄມແມ່ນ້ຳຂອງ, ການດຳລົງຊີວິດຂອງປະຊາຊົນສ່ວນໃຫ່ຍແມ່ນປູກຝັງ, ລ້ຽງສັດເປັນຕົ້ນຕໍ ແລະ ເຮັດອາຊີບຄ້າຂາຍເປັນສຳຮອງ.

ໃນການຈັດຕັ້ງປະຕິບັດແມ່ນໄດ້ສຸມໃສ່ 4 ແຜນວຽກເປັນຕົ້ນຕໍ, ສຳຄັນແມ່ນວຽກງານວາລະແຫ່ງຊາດກ່ຽວກັບການຕ້ານຢາເສບຕິດ, ໄດ້ຕິດຕາມປ້ອງກັນເວນຍາມ, ຕິດຕາມແກ້ໄຂໝໍ່ແໝງທີ່ສ້າງຄວາມບໍ່ສະຫງົບໃນສັງຄົມເຊັ່ນ: ເປົ້າໝາຍຢາເສບຕິດ, ຂີ້ລັກງັດແງະອາລະວາດຕີກັນ ແລະ ອື່ນໆ, ເຊິ່ງໄດ້ປຸກລະດົມປະຊາຊົນໃຫ້ມີສ່ວນຮ່ວມເປັນເຈົ້າການໃນການແກ້ໄຂບັນຫາຢາເສບຕິດ, ປຸກລະດົມຜູ້ທີ່ມີການພົວພັນກັບຢາເສບຕິດມາສຶກສາອົບຮົມ ພ້ອມຜູ້ປົກຄອງ, ປະຊາຊົນແມ່ນໄດ້ໃຫ້ການຮ່ວມມືເປັນຢ່າງດີ. ຜ່ານການຈັດຕັ້ງປະຕິບັດສາມາດເກັບກຳເປົ້າໝາຍຄ້າຂາຍຢາເສບຕິດໄດ້ 9 ຄົນ, ຍິງ 1 ຄົນ. ວຽກງານຄຸມຄອງສຳມະໂນຄົວແມ່ນໄດ້ເກັບກຳສັງລວມຄອບຄົວທີ່ຍັງບໍ່ທັນໄດ້ຂື້ນສຳມະໂນຄົວ, ວຽກງານປັບປຸງ ປກສ ບ້ານແມ່ນໄດ້ປັບປຸງຄືນ ໜ້າທີ່ຄວາມຮັບຜິດຊອບ ປກສ ເພື່ອໃຫ້ສອດຄ່ອງກັບໜ້າທີ່ໃນໜ່ວຍຂອງຕົນ ແລະ ວຽກງານຄຸມຄອງຄົນຕ່າງປະເທດແມ່ນໄດ້ເກັບກຳຂື້ນບັນຊີຄົນຕ່າງປະເທດທີ່ມາສ້າງຄອບຄົວໄດ້ 2 ຄົນ ແລະ ມີໃບແຕ່ງງານຖືກຕ້ອງ.

ໃນໂອກາດດຽວກັນນີ້ ພັທ ຄຳນ້ອຍ ຂຸນອິນທາ  ຫົວໜ້າ ປກສ ກຸ່ມ II ບ້ານ ໂດນ ໄດ້ລາຍງານການຈັດຕັ້ງປະຕິບັດວຽກງານວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ສ້າງຄອບຄົວ, ບ້ານປ້ອງກັນຄວາມສະຫງົບດີຂອງ ບ້ານດອນແຍງ ເມືອງ ປາກງື່ມ.

Off

Comments are closed.