22nd Feb2022

ຫ້ອງການກວດກາ ແລະ ຄວບຄຸມຢາເສບຕິດ ສະຫຼຸບຕີລາຄາການຈັດຕັ້ງປະຕິບັດໜ້າທີ່ວຽກງານວິຊາສະເພາະ.

by somda phoneor

ພັທ ວົງໄຊ ພັນທະວົງ ຮອງຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ໄດ້ສະຫຼຸບຕີລາຄາໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະໃນກອງປະຊຸມສະຫຼຸບວຽກງານກວດກາ ແລະ ຄວບຄຸມຢາເສບຕິດ ປະຈໍາປີ 2021 ແລະ ວາງທິດທາງແຜນການວຽກງານ ປີ 2022 ເຊິ່ງທ່ານໄດ້ກ່າວວ່າ: ໂດຍຈັດຕັ້ງປະຕິບັດຕາມພາລະບົດບາດ, ຂອບເຂດສິດໜ້າທີ່,

ທີ່ໄດ້ຮັບມອບໝາຍ 1 ປີ ທີ່ຜ່ານມາ ຄະນະພັກ, ຄະນະຫ້ອງການກວດກາ ແລະ ຄວບຄຸມຢາເສບຕິດແມ່ນສ້າງໄດ້ຜົນງານ, ຜົນສໍາເລັດຫຼາຍດ້ານ ສະແດງອອກ: ວຽກງານການເມືອງນໍາພາແນວຄິດ ຄະນະພັກ-ຄະນະບັນຊາ ຫ້ອງການກວດກາ ແລະ ຄວບຄຸມຢາເສບຕິດ ໄດ້ສຸມໃສ່ເຮັດວຽກງານສຶກສາອົບຮົມການເມືອງແນວຄິດ ໃຫ້ແກ່ພະນັກງານ-ນັກຮົບເປັນປົກກະຕິ ດ້ວຍຫຼາຍຮູບການ ໂດຍຖືເອົາການຮ່ວມຊີວິດຂັ້ນຫ້ອງການກວດກາ ແລະ ຄວບຄຸມຢາເສບຕິດ, ຂັ້ນພະແນກ, ຈຸໜ່ວຍພັກ, ຄຽງຄູ່ກັບການຈັດຕັ້ງເຜີຍແຜ່ເຊື່ອມຊືມມະຕິຄໍາສັ່ງຂອງຂັ້ນເທິງ ເຊິ່ງເຮັດໃຫ້ພະນັກງານ-ນັກຮົບເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດຫມາຍຂອງລັດມີແນວຄິດອຸ່ນອ່ຽນ ທຸ່ນທ່ຽງ ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມຕື່ນຕົວຫ້າວຫັນຍົກສູງສະຕິຄວາມຮັບຜິດຊອບ, ຕັ້ງໜ້າປະຕິບັດທຸກມະຕິຄໍາສັ່ງຂອງການຈັດຕັ້ງຂັ້ນເທິງ. ພ້ອມດຽວກັນນີ້, ກໍ່ໄດ້ສຸມໃສ່ປ້ອງກັນ, ສະກັດກັ້ນ, ຕີຖອຍ ແລະ ຕ້ານປະກົດການຫຍໍ້ທໍ້ທີ່ເກີດຂຶ້ນຢູ່ໃນຖັນແຖວພະນັກງານ-ນັກຮົບ ໄດ້ຮັບຜົນດີຕະຫຼອດມາ. 1 ປີ ຜ່ານມາ ໄດ້ໂຄສະນາເຜີຍແຜ່ຜົນຮ້າຍຂອງຢາເສບຕິດຢູ່ວິທະຍາໄລ, ໂຮງຮຽນ, ບ້ານລຽບຕາມຊາຍແດນໄດ້ 13 ຄັ້ງ, ມີຜູ້ເຂົ້າຮ່ວມຮັບຟັງ 3,197 ຄົນ, ໄດ້ສົມທົບກັບຂະແໜງການທີ່ກ່ຽວຂ້ອງ ຄົ້ນຄວ້າອອກແບບຄໍາຂວັນໄດ້ 8 ຄໍາຂວັນ, ແຕ້ມຮູບຕາມຄໍາຂວັນເພື່ອເຮັດປ້າຍຂະໜາດໃຫຍ່ 7 ຮູບແບບ,ສ້າງສະປອດໂຄສະນາ 2 ເລື່ອງ, ສ້າງລະຄອນດວງໃຈແມ່ 1 ເລື່ອງ, ແຕ່ງບົດເພງຕ້ານຢາເສບຕິດ 2 ບົດ ໄດ້ລົງສໍາຫຼວດເນື້ອທີ່ການລັກລອບປູກຝິ່ນຢູ່ 8 ແຂວງພາກເໜືອ ປະຈໍາສົກປີ 2020-2021 ມີ 156 ຈຸດ, ພົບເຫັນສວນຝິ່ນ 1.278 ຕອນ, ເນື້ອທີ່ 90 ເຮັກຕາ, ໄດ້ລົງທໍາລາຍສວນຝິ່ນ 569 ເຮັກຕາ,ທໍາລາຍສວນຄັນຊາ 4,2 ເຮັກຕາ, ໄດ້ສ້າງບົດບັນທຶກຢຸດເຊົາການປູກຝິ່ນກັບປະຊາຊົນໄດ້ 12.859 ຄອບຄົວ, ເກັບສະຖິຕິຜູ້ທີ່ມີຄວາມສ່ຽງຕໍ່ການໄປພົວພັນກັບຢາເສບຕິດທົ່ວປະທດປີ 2021 ມີປະມານ 65,000 ຄົນ, ໄດ້ເກັບກໍາສະຖິຕິ 13 ສູນທົ່ວປະເທດ ປີ 2021 ມີຜູ້ເຂົ້າຮັບການບໍາບັດປິ່ນປົວທັງໝົດ 4,978 ຄົນ, ຍິງ 160 ຄົນ, ປິ່ນປົວດີແລ້ວກັບບ້ານ 2,806 ຄົນ/ຍິງ 112ຄົນ, ສຶບຕໍ່ປິ່ນປົວ 2.172 ຄົນ/ຍິງ 48 ຄົນ, ນອກນີ້ໜ່ວຍງານບໍລິການປິ່ນປົວ ແລະ ໃຫ້ຄໍາປຶກສາຜູ້ຕິດຢາເສບຕິດຂັ້ນຊຸມຊົນ ຢູ່ໂຮງໝໍ 28 ແຫ່ງ ປີ 2021 ມີຜູ້ຕິດຢາເສບຕິດເຂົ້າມາປິ່ນປົວ ແລະ ໃຫ້ຄໍາປຶກສາທັງໝົດ 501 ຄົນ, ພໍ່ແມ່ມາໃຫ້ຄໍາປຶກສາ 317ຄົນ, ມີຈໍານວນ 2.067 ຄັ້ງ ແລະ ອື່ນໆ.

Off

Comments are closed.