22nd Feb2022

ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ລົງຊີ້ນຳວຽກງານຢູ່ເມືອງຄຳ ແຂວງຊຽງຂວາງ

by Peaung Thanonkeo

ໃນອາທິດທີ່ຜ່ານມານີ້ ທ່ານ ຈັນທະເນດ ບົວລະພາ ຄະນະປະຈໍາພັກກະຊວງ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍທີມງານໄດ້ລົມຢ້ຽມຢາມພົບປະພະນັກງານລັດ ຖະກອນຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງຄຳ ແຂວງຊຽງຂວາງ  

ໂດຍເປັນກຽດຕ້ອນຮັບຂອງ ທ່ານ ວັນນາ ເຮືອງແກ່ນທານ ກຳມະການພັກເມືອງ ຮອງເຈົ້າເມືອງ ເມືອງຄຳ ມີຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງພ້ອມດ້ວຍພະນັກງານລັດຖະກອນ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ, ພ້ອມດ້ວຍພະນັກງານລັດຖະກອນ ເມືອງຄຳ ແລະ ເມືອງແປກ ແຂວງ ຊຽງຂວາງເຂົ້າຮ່ວມ.

ໃນໂອກາດດັ່ງກ່າວ ທ່ານ ສາຍລົມ ເອີນທະວັນ ຫົວໜ້າຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງຄຳ  ໄດ້ລາຍງານ ໃຫ້ຮູ້ວ່າ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ກໍ່ເປັນໜ່ວຍພັກໜຶ່ງທີ່ເອກະລາດທີ່ຂື້ນກັບຄະນະພັກເມືອງໂດຍກົງ ຜ່ານການຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ ຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງຄຳ ໄດ້ເອົາໃຈໃສ່ເຮັດວຽກງານສືກສາອົບຮົມການເມືອງແນວຄິດ ໃຫ້ແກ່ພະນັກງານລັດຖະກອນຢ່າງເປັນປົກກະຕິ ແລະ ປັບປຸງແບບແຜນວິທີການເຮັດວຽກ ຕາມພາລະບົດບາດ ໜ້າທີ່ຂອງວຽກງານວິຊາສະເພາະ ທີ່ຂັ້ນເທິງມອບໝາຍໃຫ້ ໄດ້ຮັບຜົນສຳເລັດຫຼາຍດ້ານ ເຊິ່ງ ສະແດງອອກເຊັ່ນ ການອອກໃບຕາດິນ, ເກັບລາຍຮັບເຂົ້າງົບປະມານໃຫ້ໄດ້ຕາມແຜນທີ່ວາງອອກ ຕິດຕາມເອກະສານຂາຂົ້າໄດ້ 169 ສະບັບ, ຈັດສົ່ງເອກະສານຂາອອກໄດ້ 192 ສະບັບ, ປົກປັກຮັກສາບໍາລຸງພາຫະນະ ແລະ ບັນດາຊັບສິນຂອງລັດໄດ້ເປັນຢ່າງດີ, ຕິດຕາມກວດກາການເຄື່ອນໄຫວ ພະນັກງານຢູ່ພາຍໃນຫ້ອງການ, ຕິດຕາມແຜນລາຍຈ່າຍງົບປະມານປະຈໍາສົກປີ 2021 ສຳຫຼວດວັດແທກທີ່ດິນໄດ້ທັງໝົດ 709 ຕອນ ເນື້ອທີ່ທັງໝົດ 3,660,007 ຕາແມັດ ທຽບໃສ່ແຜນປີ 1000 ຕອນ ກວມເອົາ 71% ພ້ອມນີ້ຍັງໄດ້ຕິດຕາມກວດກາ ການເກັບມ້ຽນຂີ້ເຫຍື້ອ ຈູດຂີ້ເຫຍື້ອຊະຊາຍຕາມເສັ້ນທາງຫຼວງ, ພ້ອມທັງເພີ່ມທະວີຊຸກຍູ້ວຽກງານສິ່ງແວດລ້ອມຢູ່ໂຮງຈັກໂຮງງານພາຍໃນເມືອງ ແລະ ໂຮງງານຂ້າສັດ 4 ຄັ້ງ, ອອກໃຍຢັ້ງຢືນສິ່ງແວດລ້ອມໃຫ້ແກ່ບັນດາຫົວໜ່ວຍທຸລະກິດໄດ້ ແລະ ວຽກງານອື່ນໆ ກໍ່ໄດ້ຮັບການປັບປຸງໄດ້ດີຢ່າງຕໍ່ເນື່ອງ ພ້ອມນັ້ນກໍ່ຍັງໄດ້ຕີລາຄາຈຸດດີ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ທີ່ສໍາຄັນ ຈາກນັ້ນຜູ້ແທນກໍ່ໄດ້ຄົ້ນຄວ້າລຽກປ່ຽນບົດຮຽນເຊິ່ງກັນແລະກັນຕື່ມອີກ.

ທ່ານ ຈັນທະເນດ ບົວລະພາ ຄະນະປະຈຳພັກກະຊວງ ຮອງລັດຖະມົນຕີປະຈຳພັກກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍ່ໄດ້ມີຄຳຄິດເຫັນໂອ້ລົມ ກ່ອນອື່ນໝົດທ່ານກໍ່ໄດ້ກ່າວຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະຜ່ານມາພ້ອມທັງໄດ້ແໜ້ນໜັກບາງໜ້າວຽກກ່ຽວກັບວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມທັງຮຽກຮ້ອງມາຍັງ ພະນັກງານລັດຖະກອນຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງຄຳ ແລະ ເມືອງແປກ ພ້ອມກັນສືບຕໍ່ຍົກສູງການເມືອງແນວຄິດ ໃຫ້ຖັນແຖວພະນັກງານລັດຖະກອນ  ພໍ່ແມ່ປະຊາຊົນ ໃຫ້ໄດ້ຮັບຮູ້ແລະເຂົ້າໃຈຢ່າງເລິກເຊິ່ງ

Off

Comments are closed.