22nd Feb2022

ກະຊວງປ້ອງກັນປະເທດ ເຊື່ອມຊືມ 2 ວາລະແຫ່ງຊາດ

by Peaung Thanonkeo

ກະຊວງປ້ອງກັນປະເທດ ໄດ້ຈັດກອງປະຊຸມເຜີຍແຜ່ເຊືອມຊຶມ  ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການສະກັດກັ້ນ, ແກ້ໄຂບັນຫາຢາເສບຕິດ, ໃນວັນທີ 22 ກຸມພາ 2022, ເຜີຍແຜ່ໂດຍ ພົທ ປອ ທອງລອຍ ສີລິວົງ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນປະເທດ

ຫົວໜ້າກົມໃຫຍ່ການເມືອງກອງທັບ ແລະ ພົທ ກົງທອງ ພົງວິຈິດ ກຳມະການສູນກາງພັກ ຮອງລັດຖະມົນຕີ ກະຊວງປ້ອງກັນຄວາມສະຫງົບ ມີຄະນະພັກ-ຄະນະນໍາ ບັນດາ ກົມໃຫຍ່, ຫ້ອງວ່າການກະຊວງ, ຫ້ອງການ ປກຊ-ປກສ ສູນກາງ ແລະ ກົມວິທະຍາສາດ-ປະຫວັດສາດການທະຫານ, ກອງບັນຊາການທະຫານອາກາດ, ວິທະຍາຄານ, ໂຮງໝໍ, ກົມ, ຫ້ອງການ, ກອງພັນໃຫຍ່ ອ້ອມຂ້າງກະຊວງປ້ອງກັນປະເທດເຂົ້າຮ່ວມ.

ພົທ ປອ ທອງລອຍ ສີລິວົງ ໄດ້ຍົກໃຫ້ເຫັນເນື້ອໃນສຳຄັນ ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານ ເສດຖະກິດ-ການເງິນໄລຍະປີ (2021-2023) ແມ່ນໂຄງການຈຳເປັນຮີບດ່ວນລະດັບຊາດທີ່ລັດຖະບານກຳນົດອອກ ເພື່ອລະດົມກຳລັງແຮງສັງລວມຂອງທົ່ວສັງຄົມ ເຂົ້າໃນການແກ້ໄຂບັນຫາດັ່ງກ່າວຢ່າງຕັ້ງໜ້າ, ຈຳກັດຄວາມສ່ຽງທີ່ຈະນໍາໄປສູ່ວິກິດການເສດຖະກິດຢ່າງຮ້າຍແຮງ, ທັງສ້າງບັນດາປັດໄຈອັນຈຳເປັນໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX. ໃນນີ້, ທັດສະນະຊີ້ນໍາ ກອງປະຊຸມໃຫຍ່ຄັ້ງທີ XI ຂອງພັກ ໄດ້ກຳນົດທັດສະນະຂອງພັກກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນຢ່າງຖືກຕ້ອງ ແລະ ຈະແຈ້ງໂດຍໄດ້ກຳນົດວ່າ ຖືເອົາການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງີນ ແລະ ບັນຫາໜີ້ສິນສາທາລະນະເປັນໜ້າທີ່ໃຈກາງ ຂອງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນໃນໄລຍະປັດຈຸບັນ, ຖືເອົາການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ໜີ້ສິນສາທາລະນະ ເປັນໂອກາດໃນການສ້າງ ປະຖົມປັດໄຈຍູ້ແຮງຂະບວນການພັດທະນາເສດຖະກິດ-ສັງຄົມໃຫ້ຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ; ຖືເອົາການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ໜີ້ສິນສາທາລະນະ ເປັນການຍູ້ແຮງຂະບວນການປັບປຸງ ແລະ ຍົກສູງປະສິດທິພາບໃນການຄຸ້ມຄອງລັດດ້ວຍກົດໝາຍໃຫ້ມີຄວາມສັກສິດ ແລະ ເຂັ້ມງວດກວ່າເກົ່າ ແລະ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຕ້ອງຮັບປະກັນສະເຖຍລະພາບທາງດ້ານການເມືອງ ແລະ ຄວາມໝັ້ນຄົງຂອງຊາດ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ.

ໂອກາດນີ້, ພົທ ກົງທອງ ພົງວິຈິດ ໄດ້ເຜີຍແຜ່ເນື້ອໃນ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະປີ (2021-2023) ແມ່ນການສຸມທຸກກຳລັງແຮງສັງລວມ ເຂົ້າໃສ່ການແກ້ໄຂບັນຫາສຳຄັນ, ຈຳເປັນ ແລະ ຮີບດ່ວນຂອງຊາດ ທີ່ໄດ້ສະສົມມາຫຼາຍປີໃຫ້ຫຼຸດລົງຢ່າງຈະແຈ້ງໃນກໍານົດເວລາທີ່ແນ່ນອນ ໂດຍຖືເອົາການແກ້ໄຂບັນຫາດັ່ງກ່າວເປັນໜ້າທີ່, ພັນທະ ແລະ ຄວາມຮັບຜິດຊອບ ຂອງທຸກພາກສ່ວນໃນສັງຄົມ, ໃນນີ້ພາກທີ II ໄດ້ລະບຸຫຼັກການຂອງການຈັດຕັ້ງປະຕິບັດວາລະແຫ່ງຊາດ ນອກຈາກຕ້ອງຍຶດໝັ້ນຕາມຫຼັກການນຳພາຂອງພັກແລ້ວ ຍັງຈະຕ້ອງສຸມໃສ່ 3 ຫຼັກການຕົ້ນຕໍ ເພື່ອເປັນທິດທາງໃນການຈັດຕັ້ງຜັນຂະຫຍາຍບັນດາມາດຕະການທີ່ໄດ້ກຳນົດໄວໃນວາລະແຫ່ງຊາດໃຫ້ມີຜົນສຳເລັດ ຄື: ຄວາມເດັດຂາດ, ຄວາມໂປ່ງໃສ່ ແລະ ຄວາມເປັນມືອາຊີບ.

ຈຸດປະສົງການເຊື່ອມຊືມຄັ້ງນີ້, ເພື່ອຮັບປະກັນໃຫ້ວຽກງານດັ່ງກ່າວຖືກຈັດຕັ້ງປະຕິບັດຢ່າງມີປະສິດທິຜົນສູງ, ພ້ອມກັນຍົກສູງຄວາມຮັບຜິດຊອບ ຮີບຮ້ອນນຳເອົາເນື້ອໃຈຈິດໃຈ 2 ວາລະແຫ່ງຊາດດັ່ງກ່າວ, ໄປຈັດຕັ້ງເຜີຍແຜ່ເຊື່ອມຊຶມໃຫ້ພະນັກງານ, ສະມາຊິກພັກ, ນາຍ ແລະ ພົນທະຫານ ຢູ່ໃນກົມກອງຂອງຕົນ  ຜັນຂະຫຍາຍເນື້ອໃນຈິດຂອງວາລະແຫ່ງຊາດ ເຂົ້າສູ່ຂະບວນການ-ວຽກງານຕົວຈິງຂອງກົມກອງໃຫ້ເຂົ້າໃຈຢ່າງເລິກເຊິ່ງ, ທົ່ວເຖິງ, ເປັນຂະບວນກວ້າງຂວາງ ແລະ ກາຍເປັນຮູບປະທຳ.

Off

Comments are closed.