23rd Feb2022

ເປີດກອງປະຊຸມກໍ່ສ້າງຮາກຖານຜັນຂະຫຍາຍວາລະແຫ່ງຊາດຢູ່ບ້ານດຸງ.

by somda phoneor

ກອງປະຊຸມວຽກງານກໍ່ສ້າງຮາກຖານການເມືອງ ເພື່ອຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ສ້າງ ແລະ ປະເມີນຄອບຄົວບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີ ຢູ່ບ້ານດຸງ ເມືອງໄຊເສດຖາ ນະຄອນຫຼວງວຽງຈັນ ໄດ້ຈັດຂຶ້ນໃນວັນທີ 22 ກຸມພາ 2022, ໂດຍການເປັນປະທານຂອງ ພັທ ສີເພັດ ພິມມະສອນ ຫົວໜ້າກອງບັນຊາການ ປກສ ເມືອໄຊເສດຖາ, ມີນາຍບ້ານດຸງ, ປກສ ກຸ່ມບ້ານ, ປກຊ-ປກສ ບ້ານ ແລະ ແຂກຖືກເຊີນເຂົ້າຮ່ວມ.

ພັທ ສີເພັດ ພິມມະສອນ ກ່າວວ່າ: ການເປີດກອງປະຊຸມຄັ້ງນີ້, ກໍເພື່ອແນໃສ່ຮັບປະກັນເຮັດບ້ານມີຄວາມສະຫງົບສຸກ, ປຸກລະດົມທຸກຄົນພາຍໃນບ້ານໃຫ້ປະກອບສ່ວນເຂົ້າໃນວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ ເຊິ່ງເປັນໜ້າທີ່ ແລະ ພັນທະຂອງພົນລະເມືອງທຸກຄົນທີ່ຕ້ອງໄດ້ເອົາໃຈໃສ່ຕິດຕາມ-ກວດກາຄືນບັນດາສະມາຊິກພາຍໃນຄອບຄົວຂອງຕົນເອງຢ່າງເປັນປົກກະຕິ, ຖ້າຫາກພົບວ່າບຸກຄົນໃດຫາກມີພຶດຕິກຳສົງໄສ ຫຼື ມີສ່ວນພົວພັນກັບຢາເສບຕິດ ໃຫ້ຮີບຮ້ອນແຈ້ງຕໍ່ອໍານາດການປົກຄອງບ້ານ ເພື່ອນໍາຕົວພວກກ່ຽວຂຶ້ນບັນຊີເປົ້າໝາຍ-ຕິດຕາມຄຸ້ມຄອງ. ນອກນັ້ນ, ຍັງຖືເອົາວຽກງານດັ່ງກ່າວ ເປັນການສ້າງ ແລະ ປະເມີນບ້ານປອດຢາເສບຕິດ ໃຫ້ກາຍເປັນຈຸດເລີ່ມຕົ້ນ ແລະ ຕ້ານທຸກປະກົດການຫຍໍ້ທໍ້ໃຫ້ນັບມື້ຫຼຸດໜ້ອຍຖອຍລົງ. ພ້ອມນັ້ນ,​ຍັງເປັນການສໍາຫຼວດກວດກາ ແລະ ເກັບກໍາສະຖິຕິພົນລະເມືອງຂອງແຕ່ລະຄອບຄົວ ທີ່ໄດ້ຈົດທະບຽນສໍາມະໂນຄົວ ຫຼື ຍັງບໍ່ທັນໄດ້ຈົດທະບຽນສໍາມະໂນຄົວ ນັບທັງກວດກາການເໜັງຕີງຂອງພົນລະເມືອງ,​ຄົນເພີ່ມ-ຄົນຫຼຸດ, ຄົນບໍ່ມີໜ້າຊົ່ວຄາວ-ພັກເຊົາຊົ່ວຄາວ ແລະ ການຂໍຍົກຍ້າຍຖິ່ນຖານອື່ນໆ ເພື່ອຮັບປະກັນໄດ້ຄວາມສະຫງົບ-ປອດໄພ ແລະ ກາຍເປັນບ້ານມີຄວາມສະຫງົບສຸກ.

ໂອກາດດຽວກັນ,​ ທ່ານ ອຸທອນ ວິໄລສັກ ນາຍບ້ານດຸງ ກ່າວວ່າ: ບ້ານດຸງ ປະກອບມີ 440 ຫຼັງຄາເຮືອນ ມີ 394 ຄອບຄົວ ມີ 28 ໜ່ວຍ, ມີພົນລະເມືອງທັງໝົດ 1.968 ຄົນ ຍິງ 961 ຄົນ ສໍາລັບການປະກອບອາຊີບສ່ວນຫຼາຍ ແມ່ນກໍາມະກອນ, ປູກຝັ່ງ ແລະ ລ້ຽງສັດ, ​ຕະຫຼອດໄລຍະ 1 ປີຜ່ານມາ ໄດ້ເອົາໃຈໃສ່ນໍາພາຄະນະປົກຄອງບ້ານສືບຕໍ່ສຶກສາອົບຮົບການເມືອງ-ແນວຄິດໃຫ້ພໍ່-ແມ່ປະຊາຊົນຢ່າງເປັນປົກກະຕິ ຄຽງຄູ່ກັບການກວດກາ-ຕິດຕາມບັນດາເປົ້າໝາຍທີ່ກໍ່ຄວາມບໍ່ສະຫງົບພາຍໃນບ້ານ ເຊິ່ງສາມາດຂຶ້ນບັນຊີເປົ້າໝາຍຄຸ້ມຄອງໄດ້ທັງໝົດ 50 ຄົນ ຍິງ 22 ຄົນ ໃນນີ້, ໄດ້ນໍາຕົວມາສຶກສາອົບຮົມແລ້ວ ຈໍານວນ 30 ຄົນ ຍິງ 3 ຄົນ ແລະ ນໍາຕົວໄປດໍາເນີນຄະດີ 3 ຄົນ ແລະ ນໍາສົ່ງຄ້າຍຄຸມຂັງນາໄຫ-ນາໂນ ອີກ 2 ຄົນ. ສໍາລັບການເກັບກໍາສະຖິຕິການເໜັງຕີງຂອງພົນລະເມືອງທີ່ຍັງບໍ່ທັນຂຶ້ນທະບຽນສໍາມະໂນຄົວມີທັງໝົດ 189 ຄົນ ຍິງ 83 ຄົນ ເນື່ອງຈາກບຸກຄົນດັ່ງກ່າວແມ່ນຍົກຍ້າຍຖິ່ນຖານມາຢູ່ໃໝ່, ມາເປັນໄພ້-ເຂີຍ, ເດັກນ້ອຍເກີດໃໝ່ ເກັບກໍາຄົນພັກເຊົາຊົ່ວຄາວພາຍໃນບ້ານ ທັງໝົດ 447 ຄົນ, ຍິງ 204.

Off

Comments are closed.