23rd Feb2022

ລັກຊັບແມ່ນຄະດີພົ້ນເດັ່ນ ທີ່ເກີດຂຶ້ນໃນ ກຸ່ມວັງຊາຍ 1 ປີຜ່ານມາ

by Peaung Thanonkeo

ພັທ ຊືວ່າງ ກ່າລໍ່ ຫົວໜ້າ ປກສ ກຸ່ມວັງຊາຍ ເມືອງໄຊເສດຖາ ນວ ໃຫ້ສໍາພາດ ໃນວັນທີ 17 ກຸມພາ 2022 ວ່າ: ໃນ 1 ປີຜ່ານມາ ປກສ ກຸ່ມວັງຊາຍ ມີປະກົດການຫຍໍ້ທໍ້ເກີດຂຶ້ນທັງໝົດ 64 ລາຍ; ໃນນີ້ ເກີດຂຶ້ນສ່ວນຫຼາຍແມ່ນຄະດີລັກຊັບ, ມີ 45 ລາຍ; ຜົນເສຍຫາຍມີ ລົດຈັກ 17 ຄັນ, ລົດໃຫຍ່ 1 ຄັນ, ເງິນກີບ 7 ລ້ານກວ່າກີບ, ເງິນບາດ 6 ພັນບາດ, ເງິນໂດ 180 ໂດລາ ແລະ ຊັບສິນອື່ນໆຈໍານວນໜຶ່ງ ລວມມູນຄ່າ 130 ລ້ານກວ່າກີບ.

ໃນການຈັດຕັ້ງປະຕິບັດວຽກງານວິຊາສະເພາະ ໃນ 1 ປີຜ່ານມາ ປກສ ກຸ່ມ ວັງຊາຍ ສາມາດເກັບກູ້ລົດຈັກຄືນມາໄດ້ 5 ຄັນ, ລົດໃຫຍ່ 1 ຄັນ, ເງິນ 50 ລ້ານກວ່າກີບ ແລະ ກັກເປົ້າໝາຍໄດ້ 10 ຄົນ, ສົ່ງໃຫ້ ປກສ ເມືອງໄຊເສດຖາ ດໍາເນີນຄະດີ 9 ຄົນ ແລະ ສົ່ງ ປກສ ນວ ດໍາເນີນ 1 ຄົນ; ໄດ້ລົງແກ້ໄຂຈຸດມົ້ວສຸມຢາເສບຕິດ ຢູ່ພາຍໃນກຸ່ມ 9 ຈຸດ, ກັກຕົວເປົ້າໝາຍໄດ້ 49 ຄົນ, ຍິງ 25 ຄົນ ແລະ ຢຶດຂອງກາງຢາບ້າໄດ້ ຈໍານວນ 372 ເມັດ,  ເປົ້າໝາຍມົ້ວສຸມ 39 ຄົນ, ຍິງ 25 ຄົນ ແມ່ນມອບໃຫ້ອໍານາດການປົກຄອງບ້ານ ແລະ ຜູ້ປົກຄອງ ສືບຕໍ່ສຶກສາອົບຮົມ; ນອກນີ້ ຍັງສົມທົບກັບ ປກສ ເມືອງ ໄຊເສດຖາແກ້ໄຂຈຸດມົ້ວສຸມຢາເສບຕິດອີກ 4 ຄັ້ງ ຢຶດຢາບ້າໄດ້ 328 ເມັດ, ກັກຕົວເປົ້າໝາຍໄດ້ 4 ຄົນ, ຍິງ 1 ຄົນ ມອບໃຫ້ໜ່ວຍງານວິຊາສະເພາະ ສືບຕໍ່ດໍາເນີນຄະດີຕາມລະບຽບກົດໝາຍ.

ສໍາລັບທິດທາງແຜນການໃນປີ 2022, ປກສ ກຸ່ມວັງຊາຍ ຈະສຸມໃສ່ສຶກສາອົບຮົມການເມືອງແນວຄິດ ໃຫ້ພະນັກງານ ມີແນວຄິດອຸ່ນອ່ຽງທຸ່ນທ່ຽງ; ສືບຕໍ່ປະຕິບັດວຽກງານວິຊາສະເພາະ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ສືບຕໍ່ວຽກງານກໍ່ສ້າງຮາກຖານການເມືອງ ຕິດພັນກັບການປະເມີນບ້ານ ແລະ ຄອບຄົວປ້ອງກັນຄວາມສະຫງົບດີ ຢູ່ຂອບເຂດຄວາມຮັບຜິດຊອບຂອງຕົນໃຫ້ສໍາເລັດ, ແກ້ໄຂສໍາມະໂນຄົວ, ປັບປຸງກໍາລັງ ປກສ ບ້ານ ເປັນວຽກງານບຸລິມະສິດທີ່ຕ້ອງສືບຕໍ່ປະຕິບັດ, ຄຸ້ມຄອງຄົນຕ່າງປະເທດ, ເກັບກໍາການເຂົ້າ-ອອກ, ຄົນລັກລອບປະກອບອາຊີບຕ່າງໆ ແລະ ສືບຕໍ່ແກ້ໄຂປະກົດການຫຍໍ້ຕ່າງໆເປັນຕົ້ນແມ່ນ ບັນຫາຢາເສບຕິດ ໃຫ້ຫຼຸດໜ້ອຍຖອຍລົງເລື້ອຍໆ.

Off

Comments are closed.