23rd Feb2022

ກົມສ່ວຍສາອາກອນ ກະຊວງການເງີນ ຈັດກອງປະຊຸມ ວຽກງານໂຄສະນາ – ຂ່າວສານການເງີນ

by Peaung Thanonkeo

ກົມສ່ວຍສາອາກອນ ກະຊວງການເງີນ ຈັດກອງປະຊຸມ ວຽກງານໂຄສະນາ – ຂ່າວສານການເງີນ ແລະ ການຈັດຕັ້ງປະຕິບັດວ່າລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ – ການເງີນຮ່ວມກັບບັນດາສື່ຕ່າງໆຢູ່ສູນກາງ ໃນວັນທີ 22 ກຸມພາ 2022 ນີ້ ໂດຍການ ເຂົ້າຮ່ວມຂອງ ທ່ານບຸນປອນ ວັນນະຈິດ ຮອງລັດຖະມົນຕີ ກະຊວງການເງີນ ມີທ່ານ ສົມຈິດ ຄຳມຸງຄຸນ ຮອງຫົວຫນ້າຫ້ອງການ ກະຊວງການເງີນ ພ້ອມດ້ວຍພາກສ່ວນທີ່ກ່ຽວຂອງ ແລະ ສື່ມວນຊົນອ້ອມຂ້າງສູນກາງເຂົ້າຮ່ວມ.

ທ່ານບຸນປອນ ວັນນະຈິດ ຮອງລັດຖະມົນຕີ ກະຊວງການເງີນໄດ້ກ່າວຕໍ່ກອງປະຊຸມວ່າ :ກອງປະຊຸມໃນຄັ້ງນີ້ຈະໄດ້ພ້ອມກັນສະຫຼຸບຕີລາຄາການຈັດຕັ້ງປະຕິບັດວຽກງານ ໂຄສະນາ ແລະ ຂ່າວສານ ຂອງຂະແໜງການເງິນ ຊື່ງໃນໂອກາດນີ້ພວກເຮົາໄດ້ພ້ອມກັນປຶກສາຫາລືບັນດາວຽກງານ ໂຄສະນາ ແລະ ຂ່າວສານ ຂະແໜງການເງີນຕິດພັນກັບວາລະແຫ່ງຊາດ ບົນເນື້ອໃນຈິດໃຈທີ່ຖອດຖອນໄດ້ໃນໄລຍະຜ່ານມາ,ປີ 2020 ພວກເຮົາໄດ້ປະເຊີນສະພາບຄວາມຫຍຸ້ງຍາກທາງດ້ານການເງິນ-ງົບປະມານ ໃນຂອບເຂດທົ່ວປະເທດ ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດ COVID-19 .ຈາກບັນຫາດັ່ງກ່າວ, ພວກເຮົາໄດ້ພ້ອມກັນສູ້ຊົນຈັດຕັ້ງປະຕິບັດວຽກງານໂຄສະນາ ແລະ ຂ່າວສານ ຂອງຂະແໜງການເງິນ ໃນປີ 2020 ຈົນເຖີງປະຈຸບັນ ດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງ, ການມີສ່ວນຮ່ວມຂອງບັນດາຂະແໜງການ ອ້ອມຂ້າງກະຊວງ,    ທີ່ໄດ້ໃຫ້ຄວາມສໍາຄັນ ແລະ ໃຫ້ການຮ່ວມມືຕໍ່ວຽກງານໂຄສະນາ ແລະ ຂ່າວສານ ; ນອກນັ້ນຍັງໄດ້ສະໜອງຂໍ້ມູນຂ່າວຕ່າງໆເພື່ອໃຫ້ພະແນກໂຄສະນາ ແລະ ຂ່າວສານ ໄດ້ໄປເຜີຍແຜ່ໂຄສະນາຜ່ານໜັງສືພີມ, ເວັບໄຊ, ເພັຈ-ເຟດສບຸກ, ຍູທູບ (You Tube) ຂອງກະຊວງການເງິນ ແລະ ບັນດາສື່ໂຄສະນາລາຍວັນທີ່ກ່ຽວຂ້ອງອື່ນໆ ໄດ້ປັບປຸງກົນໄກການໂຄສະນາ-ຂ່າວສານໃຫ້ມີຄວາມວ່ອງໄວ, ປັບປຸງກົນໄກທາງດ້ານລະບົບໄອທີໃຫ້ມີຄວາມທັນສະໄໝ, ແກ້ໄຂບັນຫາການເຜີຍແຜ່ໂຄສະນາທີ່ຍັງຊັກຊ້າ, ສຸມໃສ່ວຽກງານໂຄສະນາ ແລະ ຂ່າວສານຕ່າງໆ ດ້ວຍຄວາມຮັບຜິດດຊອບສູງ  ແນໃສ່ເພື່ອເຮັດວຽກງານການໂຄສະນາມີຄວາມໂປ່ງໃສ ແລະ ສອດຄອງກັບນະໂຍບາຍ ກໍ່ຄືລະບຽບກົດໝາຍຂອງສື່ມວນຊົນວາງອອກ.

 ຜ່ານມາສາມາດຜະລິດຂ່າວອອກສື່ຂອງຂະແໜງການເງິນໄດ້ທັງໝົດມີ ຜະລິດໜັງສືພີມການເງິນລາຍສັບປະດາ 729 ສະບັບ,ພີມຂ່າວລົງເວັບໄຊ1,650 ຄັ້ງ ມີຜູ້ເຂົ້າຊົມ 960,957 ເທື່ອຄົນ,ເພ໌ຈ-ເຟດສບຸກ ກະຊວງການເງິນ 53,979 ຄົນ, ຊ່ອງຢູທູບ ຂ່າວສານການເງິນ 442 ວິດິໂອ ແລະ ມີຜູ້ຕິດຕາມ 731ຄົນ ເຫັນໄດ້ວ່າຕະຫລອດໄລຍະການສ້າງຕັ້ງວຽກໂຄສະນາ ແລະ ຂ່າວສານຂອງຂະແໜງການເງິນ ຈົນເຖີງປະຈຸບັນ ມີການພັດທະນາດີຂື້້ນເທື່ອລະກ້າວ ແລະ ສ້າງຜະລິດຕະພັນສື່ຮັບໃຊ້ສັງຄົມຕາມຍຸກສະໄໝ ເພື່ອໃຫ້ເຂົ້າເຖິງກຸ່ມຄົນໄດ້ສະະດວກ ແລະ ວ່ອງໄວຂຶ້ນ.

ຈາກນັ້ນ ຜູ້ເຂົ້າຮ່ວມ ກອງປະຊຸມ ກໍ່ໄດ້ປະກອບຄຳຄິດຄຳເຫັນ ແລກປ່ຽນບົດຮຽນເຊີ່ງກັນ ແລະ ກັນພ້ອມທັງຕອບຄຳຖາມເຈາະຈີ້ມທີ່ສື່ມວນຊົນຂະແຫນງການຕ່າງໆໃຫ້ຄວາມສົນໃຈຕໍ່ວຽກງານສື່ຂະແຫນງການເງີນ ເພື່ອປັບປຸງແກ້ໄຂວຽກງານດັ່ງກ່າວໃຫ້ກ້າວຂື້ນຢ່າງບໍ່ຢຸດຢັ້ງ.

Off

Comments are closed.