01st Mar2022

ປກສ ເມືອງໜອງບົກ ຕັ້ງໜ້າເສີມຂະຫຍາຍວາລະແຫ່ງຊາດ ມ້າງຄະດີຢາເສບຕິດໄດ້ 195 ເລື່ອງ.

by somda phoneor

ພັທ ບົວພາ ອຸລະມະນີ ຫົວໜ້າກອງບັນຊາການ ປກສ ເມືອງໜອງບົກ ແຂວງຄໍາມ່ວນ ໃຫ້ສໍາພາດໃນວັນທີ 22 ກຸມພາ 2022 ວ່າ: ເພື່ອສະກັດກັ້ນທຸກບັນຫາປະກົດການຫຍໍ້ທໍ້ທີ່ອາດຈະເກີດຂຶ້ນພາຍໃນເມືອງໜອງບົກ ແຂວງຄໍາມ່ວນ ທັງເປັນການຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ກອງບັນຊາການ ປກສ ເມືອງ ໜອງບົກ ໄດ້ນໍາພາກໍາລັງວິຊາສະເພາະສຸມໃສ່ຈັດຕັ້ງປະຕິບັດໜ້າທີ່ຮອບດ້ານ ເພື່ອເກັບກໍາຂໍ້ມູນ ແລະ ເປົ້າໝາຍທີ່ເຄື່ອນໄຫວພົວພັນຄ້າຂາຍ ແລະ ມົ້ວສຸມຢາເສບຕິດ ສາມາດມ້າງຄະດີຢາເສບຕິດໄດ້ 195 ເລື່ອງ, ຢຶດຂອງກາງຢາບ້າ, ຢາໄອສ໌ ແລະ ພາຫະນະທີ່ ກ່ຽວຂ້ອງໄດ້ຈໍານວນໜຶ່ງ.

ຫົວໜ້າກອງບັນຊາການ ປກສ ເມືອງໜອງບົກ ໃຫ້ຮູ້ວ່າ: ພາຍຫຼັງທີ່ ແຂວງຄຳມ່ວນ ໄດ້ເປີດກອງປະຊຸມຈັດຕັ້ງປະຕິບັດເຊື່ອມຊຶມກ່ຽວກັບວາ ລະແຫ່ງຊາດ ວ່າດ້ວຍການແກ້ໄຂບັນາຢາເສບຕິດ ຢູ່ຂັ້ນເມືອງ ໂດຍສະເພາະໃນການຈັດຕັ້ງໂຄສະນາເຜີຍແຜ່ ໃຫ້ບັນດາພະນັກງານການນຳຂັ້ນເມືອງ, ພະນັກງານ-ນັກຮົບ ພາຍໃນກອງບັນຊາການ ປກສ ເມືອງໜອງບົກ ໃນການຈັດຕັ້ງປະຕິບັດວາລະແຫ່ງຊາດນີ້; ໂດຍໄດ້ເພີ່ມທະວີໃນການໂຄສະນາປຸກລະດົມໃຫ້ການຈັດຕັ້ງບ້ານ, ເຈົ້າໜ້າທີ່ພະນັກງານ, ທະຫານ-ຕຳຫຼວດ, ຕ້ອງໄດ້ຮັບຮູ້ ແລະ ເຂົ້າໃຈຕໍ່ກັບການປະຕິບັດວາລະແຫ່ງຊາດເຂົ້າໃນການປະຕິບັດໜ້າທີ່ຕົວ ປະສານສົມທົບ ລະຫວ່າງເຈົ້າໜ້າທີ່ຂັ້ນເມືອງກັບເຈົ້າໜ້າທີ່ຂັ້ນແຂວງ ແລະ ອົງການປົກຄອງບ້ານພ້ອມກັນແກ້ໄຂບັນຫາຢາເສບຕິດ, ພາຍຫຼັງທີ່ສະພາແຫ່ງ ຊາດໄດ້ຮອງຮັບເອົາວາລະແຫ່ງຊາດ ວ່າດ້ວຍການແກ້ໄຂບັນາຢາເສບຕິດ ກອງບັນຊາການ ປກສ ເມືອງໜອງບົກ ແມ່ນໄດ້ເລີ່ມຈັດຕັ້ງປະຕິບັດ ສາມາດມ້າງລາຍຄະດີການຄ້າ ຂາຍ-ຂົນສົ່ງຄັນຊາອັດແທ່ງຢູ່ຈຸດແຄມແມ່ນໍ້າຂອງ. ໃນນີ້, ຢຶດຂອງກາງຄັນຊາໄດ້ ຈຳນວນ 380 ກິໂລກຼາມ.

ຕໍ່ກັບບັນຫາການຄ້າຂາຍ-ຂົນສົ່ງຢາເສບຕິດປະເພດຢາບ້າ ສາມາດມ້າງໄດ້ 195 ເລື່ອງ, ກັກຜູ້ຖືກຫາໄດ້ຈຳນວນໜຶ່ງ ພ້ອມຂອງກາງຢາບ້າ 9.280 ເມັດ, ຢາໄອສ໌ ຈຳນວນ 4 ຖົງ, ລົດໃຫຍ່ 3 ຄັນ ແລະ ຫຼ້າສຸດໃນວັນທີ 12 ມັງ ກອນ 2022, ເຈົ້ົ້າໜ້າທີ່ວິຊາສະເພາະ ປກສ ເມືອງໜອງບົກ ໄດ້ສາມາດມ້າງຄະດີຢາເສບຕິດໄດ້ 1 ເລື່ອງຢຶດຂອງກາງຢາບ້າໄດ້ 2.000 ເມັດ.

ຫົວໜ້າກອງບັນຊາການ ປກສ ເມືອງໜອງບົກ ໃຫ້ຮູ້ຕື່ມວ່າ: ຈາກຜົນງານທີ່ກ່າວມານັ້ນ, ໄດ້ ສະແດງເຖິງຜົນງານທີ່ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ສະນັ້ນ, ເພື່ອເຮັດ ໃຫ້ວຽກງານດັ່ງກ່າວນີ້ ກາຍເປັນພາລະໜ້າທີ່ຂອງປວງຊົນຮອບດ້ານ ຈຶ່ງຮຽກຮ້ອງມາຍັງທຸກພາກ ສ່ວນຈົ່ງໄດ້ມີສ່ວນຮ່ວມກັບເຈົ້າໜ້າທີ່່ ເພື່ອພ້ອມກັນແກ້ໄຂບັນຫາຢາເສບຕິດໃຫ້ຫຼຸດໜ້ອຍຖອຍລົງ ແລະ ໝົດໄປຈາກ ສັງຄົມ ໂດຍສະເພາະພາຍໃນ ເມືອງໜອງບົກ ເພື່ອຮັບປະກັນໄດ້ຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ.

 

Off

Comments are closed.