04th Mar2022

ຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ປກສ ແຂວງ ສະຫຼຸບຜົນງານ ປະຈໍາປີ 2021 ແລະວາງທິດທາງແຜນການປະຈໍາປີ 2022.

by somda phoneor

ໃນວັນທີ 01 ມີນາ 2022 ຫ້ອງສໍາມະໂນຄົວ ແລະ ກໍ່ສ້າງຮາກຖານ ປກສ ແຂວງສະຫວັນນະເຂດ ໄດ້ເປີດກອງປະຊຸມສະຫຼຸບຜົນງານປະຈໍາປີ 2021 ແລະ ວາງທິດທາງແຜນການ ປີ 2022 ໂດຍເປັນກຽດເຂົ້າຮ່ວມຂອງ ພັອ ສັງທອງ ສີປະເສີດ ຮອງຫົວຫນ້າກອງບັນຊາການ ປກສ ແຂວງ, ຄະນະຫ້ອງອ້ອມຂ້າງ, ກອງບັນຊາການ ປກສ ເມືອງ 14 ຕົວເມືອງ 01 ນະຄອນ, ພະນັກງານ-ນັກຮົບ ແລະ ແຂກຖືກເຊີນເຂົ້າຮ່ວມ.

ພັທ ຈັນມີໄຊ ພຸດທະວົງ ຮອງຫ້ອງຄຸ້ມຄອງສາມະໂນຄົວ ແລະ ກໍ່ສ້າງຮາກຖານ ປກສ ແຂວງໄດ້ຜ່ານບົດສະຫຼຸບ ການເຄື່ອນໄຫວ ວຽກງານວິຊາສະເພາະ ໃນ 01ປີ ເຫັນວ່າຄະນະພັກ-ຄະນະບັນຊາຂັ້ນຕ່າງໆ ພາຍໃນຫ້ອງໄດ້ເອົາໃຈໃສ່ ເຮັດວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານນາຍແລະພົນຕໍາຫຼວດມີຄວາມ ເຂັ້ມແຂງຫນັກແຫນ້ນ, ມີສະຕິຕໍ່ການຈັດຕັ້ງ, ຮັບຮູ້ເຊື່ອມຊືມແນວທາງນະໂຍບາຍຂອງພັກ, ລະບຽບກົດຫມາຍຂອງລັດ, ມີລະບຽບວິໄນເຂັ້ມງວດ ບຸກບືນເຮັດສໍາເລັດ ຫນ້າທີ່ຕາມການມອບຫມາຍ ຂອງຫນ້າທີ່ ວຽກງານວິຊາສະເພາະ ເຊັ່ນ: ວຽກງານຂະບວນການປະຈໍາການ 08 ຄັ້ງ, ມີ432 ເທື່ອຄົນ, ອະນາໄມໄດ້ 11 ຄັ້ງ, ມີ 957 ຄົນ, ສ້າງບ້ານ ປກສ ດີ ໃນທົ່ວແຂວງໄດ້ 1,025 ບ້ານເປົ້າຫມາຍ, ປະກາດສ້າງແລ້ວ 1,024 ບ້ານ, ຖືກຮັບຮອງເປັນບ້ານ ປກສ ດີມີ 890ບ້ານ, ມີ 148,601 ຄອບຄົວ, ມີຄອບຄົວ ປກສ ດີ 141,039ຄອບຄົວ, ເກັບກູ້ອາວຸດລ່າເນື້ອທົ່ວແຂວງໄດ້ທັງຫມົດ 1,656 ກະບອກ, ອາວຸດເສິກ 04 ກະບອກ, ໃນທົ່ວແຂວງມີ 1,025 ບ້ານ, ມີ166,467 ຫຼັງຄາເຮືອນ, ມີ 174,548 ຄອບຄົວ , ຈໍານວນພົນທັງຫມົດ 1,013,438 ຄົນ, ອາຍຸ 15ປີ ຂຶ້ນໄປມີ 653,706 ຄົນ, ຊາວຕ່າງດ້າວມີ 538 ຄອບຄົວ, ໄດ້ຂຶ້ນທະບຽນສໍາມະໂນຄົວແລ້ວ 1,007,667ຄົນ, ອອກບັດປະຈໍາຕົວໄດ້ທັງຫມົດ 6,706 ຄົນ ແລະອື່ນໆ ພ້ອມນີ້ຜູ້ເຂົ້າຮ່ວມຍັງໄດ້ແລກປ່ຽນປະກອບຄໍາຄິດຄໍາ ເຫັນ ຢ່າງກົງໄປກົງມາແລະເລິກເຊິ່ງເຂົ້າໃນບັນດາວຽກງານວິຊາສະເພາະໃຫ້ດີຂຶ້ນເປັນກ້າວໆ.

ໃນໂອກາດດຽວກັນ ກໍ່ໄດ້ມີພິທີມອບ-ຮັບ ອາວຸດລ່າເນື້ອ(ປືນແກັບ) ຈາກບັນດາກອງບັນຊາການ ປກສ ເມືອງ ຈໍານວນ 94ກະບອກ, ເຊິ່ງກ່າວມອບໂດຍຕ່າງຫນ້າ ປກສ ເມືອງນອງ, ປກສ ເມືອງ ຊົນນະບູລີ ແລະ ປກສ ເມືອງຈໍາ ພອນ, ກ່າວຮັບໂດຍ ທ່ານ ພັອ ສັງທອງ ສີປະເສີດ ຮອງກອງບັນຊາການ ປກສ ແຂວງ.

Off

Comments are closed.