04th Mar2022

ເມືອງຫົງສາ ເຊື່ອມຊຶມມະຕິ ກອງປະຊຸມໃຫຍ່ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI.

by somda phoneor

ໂດຍປະຕິບັດຕາມຜົນສໍາເລັດຂອງກອງປະຊຸມໃຫຍ່ ຜູ້ແທນແນວລາວສ້າງຊາດທົ່ວປະເທດ ຄັ້ງທີ XI ແລະ ຂໍ້ ຕົກລົງຂອງປະທານແນວລາວສ້າງຊາດແຂວງໄຊຍະບູລີ ໃຫ້ລົງເຜີຍແຜ່ເຊື່ອມຊຶມຜົນສໍາເລັດກອງປະຊຸມດັ່ງກ່າວ ຢູ່ ບັນດາເມືອງໃຫ້ສໍາເລັດ. ດັ່ງນັ້ນ, ໃນວັນທີ 3 ມີນາ 2022 ນີ້, ຢູ່ທີ່ເມືອງຫົງສາ ແຂວງໄຊຍະບູລີ ພະນັກງານຫຼັກແຫຼ່ງຂອງເມືອງໄດ້ຮັບຟັງການເຜີຍແຜ່ເຊື່ອມຊຶມມະຕິກອງປະຊຸມໃຫຍ່ຜູ້ແທນແນວລາວສ້າງ ຊາດທົ່ວປະເທດ ຄັ້ງທີ XI. ໂດຍການເຂົ້າຮ່ວມຂອງທ່ານ ເຕີ່ຍ ສົມສັກ ກໍາມະການສູນກາງແນວລາວສ້າງຊາດ ຮອງປະທານແນວລາວສ້າງຊາດ ແຂວງ ໄຊຍະບູລີ ສະມາຊິກສະພາປະຊາຊົນແຂວງເຂດເລືອກຕັ້ງ ເມືອງເງິນ ປະທານ ບໍລິສັດ ທີທີພາວເວີ ໂຕ່ໂທ່ ຈໍາກັດ, ມີທ່ານ ທອງສາ ພົມມະຈັນ ຮອງປະທານແນວລາວສ້າງຊາດ ແຂວງໄຊຍະບູລີ, ຮອງເລຂາພັກເມືອງ ປະທານກວດກາພັກ-ລັດເມືອງຫົງສາ ມີຄະນະປະຈໍາພັກເມືອງ, ກໍາມະການພັກເມືອງ, ສະມາຊິກສະພາປະຊາຊົນແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມກໍ່ໄດ້ເຜີຍແຜ່ ມະຕິກອງປະຊຸມໃຫຍ່ຄັ້ງທີ XI ຜູ້ແທນແນວລາວສ້າງຊາດທົ່ວປະເທດ ,ກົດລະບຽບແນວລາວສ້າງຊາດສະໄຫມທີ XI, ມະຕິກອງປະຊຸມສາມັນຄົບຄະນະກໍາມະການແນວລາວສ້າງຊາດແຂວງໄຊຍະບູລີ ຄັ້ງທີ 2 ສະໄຫມທີ VI, ມະຕິຕົກລົງ ຂອງຄະນະປະຈໍາພັກແຂວງໄຊຍະບູລີ ວ່າດ້ວຍການຮັບຮອງເອົາຄະນະກໍາມະການ, ຄະນະທີ່ປຶກສາ ແລະ ຮອງປະທານ ທີ່ບໍ່ປະຈໍາການຂອງແນວລາວສ້າງຊາດແຂວງ.

ໃນຕອນທ້າຍ ທ່ານ ເຕີ່ຍ ສົມສັກ ຄະນະປະທານກອງປະຊຸມ ໄດ້ມີຄໍາເຫັນສັງລວມຊີ້ນໍາ ໃຫ້ຄະນະພັກ, ຄະນະນໍາ, ກໍາມະການແນວລາວສ້າງຊາດແຕ່ລະຂັ້ນ ຕະຫລອດເຖິງທຸກພາກສ່ວນທີ່ເຂົ້າຮ່ວມ. ຈົ່ງພ້ອມກັນເອົາໃຈໃສ່ ສືບຕໍ່ຈັດຕັ້ງຜັນຂະຫຍາຍເນື້ອໃນຈິດໃຈຂອງມະຕິກອງໃຫຍ່ຄັ້ງທີ XI ຜູ້ແທນແນວລາວສ້າງຊາດທົ່ວປະເທດຄັ້ງນີ້, ໃຫ້ເຂົ້າສູ່ລວງເລິກ, ສອດຫ້ອຍເຂົ້າສູ່ວຽກງານຕົວຈິງຢູ່ທ້ອງຖິ່ນຮາກຖານຂອງຕົນໃຫ້ຫຼາຍຂື້ນ, ພ້ອມກັນເສີມຂະຫຍາຍ ມູນເຊື້ອອັນດີງາມຂອງແນວລາວສ້າງຊາດ, ເພີ້ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມ ສ້າງກ້ອນກໍາລັງແຮງທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາ ບ້ານເມືອງ ໃຫ້ມີຄວາມຈະເລີນກ້າວຫນ້າດີຂື້ນ.

Off

Comments are closed.