04th Mar2022

ລັດຖະມົນຕີກະຊວງອຸດສາຫະກຳ ແລະ ການຄ້າຊີ້ແຈງກ່ຽວກັບການຄຸ້ມຄອງລາຄາສິນຄ້າໃນສະພາບລາຄານ້ຳມັນແພງຂື້ນ.

by somda phoneor

ປອ. ຄຳແພງ ໄຊສົມແພງ ກຳມະການສູນກາງພັກ, ລັດຖະມົນຕີກະຊວງອຸດສາຫະກຳ ແລະ ການຄ້າໄດ້ໃຫ້ສຳພາດຕໍ່ສື່ມວນຊົນ ກ່ຽວກັບການຄຸ້ມຄອງລາຄາສິນຄ້າ ໃນສະພາບລາຄານໍ້າມັນເຊື້ອໄຟ ເໜັງຕີງຂຶ້ນສູງ ໃນວັນທີ 4 ມີນາ 2022ນີ້ວ່າ ດັ່ງທີ່ພວກເຮົາຮັບຮູ້ນໍາກັນແລ້ວວ່າ ສປປ ລາວ ເປັນປະເທດນໍາເຂົ້າ ນ້ຳມັນເຊື້ອໄຟ ​ຈາກຕ່າງປະເທດ 100 ສ່ວນຮ້ອຍ ແລະ ເຖິງວ່າປະຈຸບັນພາຍໃນ ສ ປປ ລາວມີໂຮງງານກັ່ນນໍ້າມັນໃນຂັ້ນຕອນສຸດທ້າຍໄດ້ເອງແລ້ວກໍຕາມ

ແຕ່ວັດຖຸດິບ ກໍແມ່ນນ້ຳມັນທີ່ເກືອບສຳເລັດຮູບ ແລະ ທາດເຄມີທີ່ນໍາໃຊ້ເຂົ້າໃນຂະບວນການກັ່ນນໍ້າມັນເຊື້ອໄຟ ກໍຍັງຕ້ອງນໍາເຂົ້າຈາກຕ່າງປະເທດ 100 ສ່ວນຮ້ອຍ ພຽງແຕ່ສາມາດປະຢັດ ຕົ້ນທຶນລົງ ໃນລະດັບຫນຶ່ງ. ລາຄານໍ້າມັນ ແມ່ນຖືກກໍານົດໂດຍກົນໄກ ລາຄານໍ້າມັນເຊື້ອໄຟໃນຕະຫຼາດໂລກ ເຊິ່ງການ   ເໜັງຕີງຂຶ້ນຂອງລາຄານໍ້າເຊື້ອໄຟໃນຕະຫຼາດໂລກ ສົ່ງຜົນກະທົບຕໍ່ລາຄາຂາຍຍ່ອຍນໍ້າມັນເຊື້ອໄຟ ພາຍໃນປະເທດເຮົາ ຄືກັບບັນດາປະເທດທີ່ນຳເຂົ້ານ້ຳມັນ ຫລື ແມ້ກະທັ້ງປະເທດທີ່ຜະລິດນຳ້ມັນເອງກໍເຊັ່ນດຽວກັນ. ພ້ອມດຽວກັນນັ້ນ, ລາຄາຂອງນໍ້າມັນຍັງຖືກກໍານົດດ້ວຍອັດຕາແລກປ່ຽນ ເພາະການນໍາເຂົ້າຕ້ອງໄດ້ຊື້ເປັນເງິນຕາຕ່າງປະເທດ. ເວົ້າລວມແລ້ວ ການເໜັງຕີງຂຶ້ນ ຂອງລາຄານໍ້າມັນເຊື້ອໄຟ ແມ່ນເປັນບັນລວມຂອງໂລກ ໂດຍສະເພາະຂອງບັນ ດາປະເທດຜູ້ນໍາເຂົ້ານຳເຂົ້າ ລວມທັງ ສປປ ລາວ ຕ້ອງໄດ້ເພີ່ງພານ້ຳມັນເຊື້ອໄຟ ເຂົ້າໃນຂະບວນການຜະລິດ, ການຂົນສົ່ງສິນຄ້າ ແນ່ນອນວ່າ ລາຄານ້ຳມັນເຊື້ອໄຟຂຶ້ນ ກໍ່ເຮັດໃຫ້ຕົ້ນທຶນຂອງສິນຄ້າສູງຂຶ້ນເປັນເງົາຕາມໂຕ.ລາຄານ້ຳມັນເຊື້ອໄຟທົ່ວໂລກສູງຂຶ້ນ ສົ່ງຜົນໂດຍກົງ ເຮັດໃຫ້ລາຄາ ຂາຍຍ່ອຍນ້ຳມັນເຊື້ອໄຟພາຍໃນປະເທດປັບຂຶ້ນ ໂດຍລາຄາຂາຍຍ່ອຍທີ່ເລີ່ມຈັດຕັ້ງປະຕິບັດວັນທີ 25 ກຸມພາ 2022 ຜ່ານມາ ເວົ້າສະເພາະຈຸດນະຄອນຫຼວງວຽງຈັນ: ລາຄານໍ້າມັນແອັດຊັງພິເສດ ແມ່ນ 16.930 ກີບ/ລິດ, ລາຄານໍ້າມັນແອັດຊັງທໍາມະດາ ແມ່ນ 14.950 ກີບ/ລິດ ແລະ ລາຄານໍ້າມັນກາຊວນ ແມ່ນ 12.940 ກີບ/ລິດ ເຊີ່ງເປັນລາຄາທີ່ສູງສຸດໃນຮອບຫຼາຍປີ,ຕະຫຼອດໄລຍະທີ່ຜ່ານມາ, ລັດຖະບານເອງ ກໍໄດ້ສຸມຄວາມພະຍາຍາມ ຊອກວິທີທາງເພື່ອຫຼຸດຜ່ອນຜົນກະທົບຕໍ່ເສດຖະກິດ ຕະຫຼອດຮອດຊີວິດການເປັນຢູ່ ຂອງປະຊາຊົນ ຈາກການເໜັງຕີງຂຶ້ນ ຂອງລາຄານໍ້າມັນເຊື້ອໄຟ ເປັນຕົ້ນແມ່ນນະໂຍບາຍຫັນເຂົ້າສູ່ການນໍາໃຊ້ພະລັງງານທົດແທນ ໂດຍສະເພາະນະໂຍບາຍສົ່ງເສີມການນໍາໃຊ້ພະລັງງານໄຟຟ້ານໍ້າຕົກທີ່ ສປປ ລາວ ມີທ່າແຮງ ເພື່ອຫຼຸດຜ່ອນການນໍາເຂົ້າ ແລະ ການຊົມໃຊ້ນໍ້າມັນເຊື້ອໄຟ ລວມທັງປະກາດໃຊ້ນະໂຍບາຍສົ່ງເສີມການນໍາເຂົ້າ,ຊົມໃຊ້ພາຫະນະໄຟຟ້າ ແລະ ໄດ້ມີນະໂຍບາຍຕ່າງໆເພື່ອດຶງດູດການລົງທຶນຈາກຕ່າງປະເທດ ລົງທຶນເຂົ້າໃສ່ເຕັກໂນໂລຊີ ທີ່ນໍາໃຊ້ພະລັງງານໄຟຟ້ານໍ້າຕົກ, ພະລັງງານສະອາດ ແລະ ພະລັງງານທົດແທນອື່ນໆ.

ໃນໂອກາດ ນີ້, ປອ ຄຳແພງ ໄຊສົມແພງ ກໍຮຽກຮ້ອງມາຍັງພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ຈົ່ງມີສະຕິ, ໃນສະພາບຄວາມຫຍູ້ງຍາກຄືໃຈປະຈຸບັນ ຊ່ວຍກັນຮັບຮູ້ ແລະ ເຂົ້າໃຈສະຖານະການຊ່ວຍກັນປະຢັດມັດທະຍັດໃຊ້ຈ່າຍໃນສິ່ງທີ່ຈໍາເປັນ ໃນຍາມເຂົ້າຍາກຫມາກແພງ ໂດຍສະເພາະແມ່ນການຊົມໃຊ້ຍານພາຫະນະ ຫຼື ຖ້າມີເງື່ອນໄຂ ແມ່ນຫັນໄປໃຊ້ຍານພາຫະນະທາງເລືອກ ເພາະພວກເຮົາຮັບຮູ້ນໍາກັນວ່ານໍ້າມັນເຊື້ອໄຟ ແມ່ນພະລັງງານທີ່ບໍ່ເປັນມິດກັບສິ່ງແວດລ້ອມ ເພາະປ່ອຍມົນລະພິດເຂົ້າສູ່ອາກາດ ແລະ ບໍ່ຍືນຍົງ ແລະ ມີຢູ່ຢ່າງຈຳກັດ.

Off

Comments are closed.