07th Mar2022

ອົງການກາແດງ ແຂວງ ບໍລິຄໍາໄຊ ລົງຝຶກອົບຮົມການປະຖົມພະຍາບານຂັ້ນຕົ້ນໃຫ້ກັບເຈົ້າໜ້າທີ່ ປກສ ແຂວງ.

by Peaung Thanonkeo

ວັນທີ 04 ມີນາ 2022 ນີ້ ອົງການກາແດງ ແຂວງ ບໍລິຄໍາໄຊ ໄດ້ສົມທົບກັບ ພະແນກເສນາຮັກ ກອງບັນຊາການ ປກສ ແຂວງ ລົງຝຶກອົບຮົມວຽກງານປະຖົມພະຍາບານຂັ້ນຕົ້ນໃຫ້ກັບເຈົ້າໜ້າທີ່ຕໍາຫຼວດຈາລະຈອນ ແລະ ເຈົ້າໜ້າທີ່ຕໍາຫຼວດຄ້າຍຄຸມຂັງ-ດັດສ້າງ ປກສ ແຂວງ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ນາງ ວັນເພັງ ໄຊສົງຄາມ ຫົວໜ້າອົງການກາແດງ ແຂວງ ບໍລິຄໍາໄຊ, ມີ ພັທ ນາງສີວອນ ຈິດຕະວົງ ຮັກສາການຫົວໜ້າພະແນກເສນາຮັກ ປກສ ແຂວງ, ມີບັນດາຄູຝຶກຈາກອົງການກາແດງແຂວງ, ຄະນະພະແນກ ພ້ອມດ້ວຍພະນັກງານ-ນັກຮົບ, ເຈົ້າໜ້າທີ່ຕໍາຫຼວດຈາລະຈອນ ແລະ ຄ້າຍຄຸມຂັງ-ດັດສ້າງ ປກສ ແຂວງ ເຂົ້າຮ່ວມ.

ທ່ານ ນາງ ວັນເພັງ ໄຊສົງຄາມ ໄດ້ກ່າວວ່າ: ການຝຶກອົບຮົມວຽກງານປະຖົມພະຍາຍາບານ ໃຫ້ກັບກໍາລັງຕໍາຫຼວດຈາລະຈອນ ແລະ ເຈົ້າໜ້າທີ່ຕໍາຫຼວດຄ້າຍຄຸມຂັງ-ດັດສ້າງ ປກສ ແຂວງ ບໍລິຄໍາໄຊໃນຄັ້ງນີ້ກໍ່ເພື່ອເຮັດໃຫ້ເຈົ້າໜ້າຕໍາຫຼວດພາກສ່ວນດັ່ງກ່າວໄດ້ມີຄວາມຮູ້ຂັ້ນພື້ນຖານໃນການ ປະຖົມພະຍາບານຊ່ວຍເຫຼືອຜູ້ໄດ້ຮັບບາດເຈັບຈາກການເກີດອຸບັດຕິເຫດໃນກໍລະນີຕ່າງໆໄດ້ຢ່າງຖືກຕ້ອງ, ປອດໄພ ແລະ ມີປະສິດທິພາບກ່ອນນໍາສົ່ງຄົນເຈັບໄປໂຮງໝໍໄດ້ທັນເວລາ, ທ່ານໄດ້ເໜັ້ນໜັກໃຫ້ບັນດາຄູຝຶກພ້ອມດ້ວຍນັກຝຶກອົບຮົມທຸກຄົນຈົ່ງຕັ້ງໃຈຖ່າຍທອດຄວາມຮູ້ ແລະ ເອົາໃຈໃສ່ຄົ້ນຄ້ວາຮໍ່າຮຽນເອົາທິດສະດີ ແລະ ການທົດລອງປະຕິບັດຕົວຈິງໃນການຊ່ວຍປະຖົມພະຍາບານຂັ້ນຕົ້ນ ທີ່ໄດ້ຝຶກອົບຮົມໃນຄັ້ງນີ້ເພື່ອນໍາໄປປະຕິບັດຊ່ວຍເຫຼືອຄົນເຈັບທີ່ຕົນໄດ້ປະສົບພົບພໍ້ໃຫ້ໄດ້ຮັບຜົນສູງ, ຈາກນັ້ນບັນດາຄູຝຶກທີ່ມາຈາກອົງການກາແດງແຂວງ ກໍ່ໄດ້ຜັດປ່ຽນກັນຂື້ນອະທິບາຍ ແລະ ບັນລະຍາຍໃຫ້ຄວາມຮູ້ທາງດ້ານທິດສະດີ ແລະ ນໍາພາລົງມືທົດລອງປະຕິບັດຕົວຈິງເຊັ່ນ: ກາຍຍະວິພາກສາດ ແລະ ສະລິລະວິທະຍາ, ຫຼັກການປະຖົມພະຍາບານ, ການປະເມີນຄວາມປອດໄພ ກ່ອນເຂົ້າໄປຊ່ວຍຄົນເຈັບ, ການປະເມີນອາກາດຜູ້ບາດເຈັບ, ພາວະໝົດສະຕິຂາດຄວາມຮູ້ສຶກ, ອາການແຄ້ນອາຫານ, ການປະຕິບັດການຊ່ວຍເຫຼືອຂັ້ນພື້ນຖານ, ການປະເມີນອາການບາດເຈັບ, ການຈັດທ່ານອນໃນທ່າພັກຟື້ນ, ການຊ່ວຍຫາຍໃຈທຽມ ( CPR )ໃຫ້ກັບຄົນເຈັບທີ່ໝົດສະຕິທີ່ເປັນຜູ້ໃຫ່ຍ ແລະ ເດັກນ້ອຍ, ການຫ້າມເລືອດໃນເບື້ອງຕົ້ນ, ການກຽມຊຸດປະຖົມພະຍາບານ, ການລ້າງບາດແຜ, ການນໍາໃຊ້ຜ້າບັ້ງ, ຜ້າ , ການຊ່ວຍຜູ້ບາດເຈັບທີ່ມີອາການກະດູກຫັກ ແລະ ການດາມກະດູກທີ່ຫັກຊົ່ວຄາວ, ການເຄື່ອນຍ້າຍຄົນເຈັບ ແລະ ອື່ນໆ ໂດຍໃຫ້ບັນດານັກຝຶກອົບຮົມຜັດປ່ຽນກັນປະຕິບັດຕົວຈິງໃນການປະຖົມພະຍາບານຂັ້ນຕອນຕ່າງໆ, ພ້ອມກັນນັ້ນຍັງໄດ້ມີການປະກອບຄໍາຄິດຄໍາເຫັນແລກປ່ຽນປະສົບການ ແລະ ຖອດຖອນບົດຮຽນ, ແກ້ຂໍ້ຂ້ອງໃຈຕ່າງໆເຊິ່ງກັນ ແລະ ກັນເພື່ອພ້ອມກັນນໍາໄປຈັດຕັ້ງປະຕິບັດປະຖົມພະຍາບານຊ່ວຍເຫຼືອຄົນເຈັບໃຫ້ປອດໄພອີກດ້ວຍ.

 

Off

Comments are closed.