07th Mar2022

ແຂວງ ບໍລິຄໍາໄຊ ປະຖະກະຖາ ລະນຶກວັນສ້າງຕັ້ງແຂວງ ບໍລິຄໍາໄຊ ຄົບຮອບ 38 ປີ.

by Peaung Thanonkeo

ໃນຕອນວັນທີ 04 ມີນາ 2022 ນີ້ ຢູ່ທີ່ສະໂມສອນຂອງແຂວງບໍລິຄຳໄຊ  ໄດ້ຈັດພິທີປະຖະກະຖາ ລະນຶກວັນສ້າງຕັ້ງແຂວງ ບໍລິຄໍາໄຊ ຄົບຮອບ 38 ປີ ໂດຍໃຫ້ກຽດເປັນປະທານ ແລະ ເລົ່າຄືນມູນເຊື້ອ ວັນສໍາຄັນດັ່ງກ່າວໂດຍ ທ່ານ ກອງແກ້ວ ໄຊສົງຄາມ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ. ມີບັນດາສະຫາຍຄະນະບໍລິຫານງານພັກແຂວງ, ສະພາປະຊາຊົນແຂວງ, ພ້ອມດ້ວຍພະນັກງານຫຼັກແຫຼ່ງນໍາພາຄຸ້ມຄອງແຕ່ຂັ້ນໃນຂົງເຂດວຽກງານຕ່າງໆ, ກຳລັງປ້ອງກັນຊາດ-ປ້ອງກັນຄວາມສະຫງົບແຂວງ  ເຂົ້າຮ່ວມຮັບຟັງ.

ທ່ານ ກອງແກ້ວໄຊສົງຄາມ  ໄດ້ເລົ່າມູນເຊື້ອປະຫວັດສາດ, ການຕໍ່ສູ້ອັນຍືດເຍື້ອຍາວນານ ແລະ ພິລະອາດຫານຂອງປະຊາຊົນບັນດາເຜົ່າ, ວິລະກຳອັນລໍ້າເລີດ ຂອງບັນພະບູລຸດໃນອະດີດ ທີ່ໄດ້ສ້າງຜົນງານອັນໃຫຍ່ຫຼວງໃນພາລະກິດປົດປ່ອຍຊາດ ການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະແມ່ນບັນດາຜູ້ນຳປະຕິວັດ ທີ່ນຳພາເຄື່ອນໄຫວໃນທ້ອງຖິ່ນແຂວງບໍລິຄໍາໄຊ.  ເຊີ່ງແຂວງບໍລິຄໍາໄຊ ແມ່ນໄດ້ຮັບການຊີ້ນໍາ-ນໍາພາ ແລະ  ສ້າງຕັ້ງຂື້ນໂດຍ ທ່ານ ສີສົມພອນ ລໍວັນໄຊ  ນັກຮົບປະຕິວັດ ທີ່ເປັນລູກຮັກຫຼານແພງຂອງຊາວແຂວງ ບໍລິຄໍາໄຊ.  ວັນທີ 6 ມີນາ ປີ 1984 ມາຮອດປີ 2022  ແມ່ນຄົບຮອບ 38 ປີ, ເປັນວັນທີ່ມີຄວາມ ໝາຍຄວາມສຳຄັນສຳລັບສະມາຊິກພັກ, ພະນັກງານ, ທະຫານ, ຕຳຫຼວດ, ນັກຮຽນນັກສຶກສາ, ປັນຍາຊົນ, ຊັ້ນຄົນຕ່າງໆ ຕະຫຼອດຮອດປະຊາຊົນບັນດາເຜົ່າ ທີ່ດຳລົງຊີວິດຢູ່ຕາມຕົວເມືອງ ແລະ ຊົນນະບົດທົ່ງພຽງ, ພູດອຍທີ່ຫ່າງໄກສອກຫຼີກໃນທົ່ວແຂວງ ທີ່ໄດ້ປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດ ເວົ້າລວມ, ເວົ້າສະເພາະແຂວງບໍລິຄໍາໄຊ ໄດ້ພ້ອມກັນປົກປັກຮັກສາ ແລະ ພັດທະນາແຂວງໃຫ້ເຕີບໃຫຍ່ເຂັ້ມແຂງຂຶ້ນແຕ່ລະໄລຍະ ນັບແຕ່ແຂວງບໍລິຄຳໄຊ ໄດ້ຮັບການສ້າງຕັ້ງຂຶ້ນ ເປັນຕົ້ນມາ ປະຊາຊົນຊາວແຂວງ ບໍລິຄໍາໄຊ ໄດ້ພ້ອມພຽງສາມັກຄີ ກັນພາຍໃຕ້ການນຳພາຂອງອົງຄະນະພັກແຂວງແຕ່ລະສະໄໝ ປະຕິບັດສອງໜ້າທີ່ຍຸດທະສາດ ປົກປັກຮັກສາ ແລະ ສ້າງສາພັດທະນາປະເທດຊາດເວົ້າລວມ, ເວົ້າສະເພາະແຂວງ ບໍລິຄຳໄຊ ເຊິ່ງໄດ້ມີການພັດທະນາ ແລະ ເຕີບໃຫ່ຍຂະຫຍາຍຕົວແຕ່ລະບາດກ້າວ ໃນນີ້ການພັດທະນາເສດຖະກິດ ແຂວງ ບໍລິຄຳໄຊ: ໄດ້ມີຄວາມພະຍາຍາມສູງຜ່ານຜ່າທຸກຂໍ້ຫຍຸ້ງຍາກທາງດ້ານເສດຖະກິດ, ນໍາໃຊ້ທ່າແຮງພາຍໃນ ເພື່ອພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວຕໍ່ເນື່ອງ, ສຸມໃສ່ການພັດທະນາຊົນນະບົດ, ສົ່ງເສີມທຸກພາກສ່ວນ ໃຫ້ມີສ່ວນຮ່ວມໃນການພັດທະນາ ເຮັດໃຫ້ເສດຖະກິດຂະຫຍາຍຕົວ ປີ 2021  ລວມຍອດຜະລິດຕະພັນພາຍໃນ (GPP) ບັນລຸໄດ້ 6. ພັນ 670 ກວ່າຕື້ກີບ, ອັດຕາການຂະຫຍາຍຕົວ 4.77% ສະເລ່ຍຕໍ່ຫົວຄົນຕໍ່ປີໄດ້ 20 ລ້ານກວ່າກີບຫຼື ເທົ່າກັບ 2 ພັນ 200 ກວ່າໂດລາ/ຄົນ/ປີ; ໃນນີ້ ຂະແໜງກະສິກໍາ-ປ່າໄມ້: ຂະຫຍາຍຕົວ 12,8% ກວມ 34%ຂອງ GPP ຂະແໜງອຸດສາຫະກໍາ-ກໍ່ສ້າງ: ຂະຫຍາຍຕົວ 4,92% ກວມເອົາ 44%ຂອງ GPP ແລະ ຂະແໜງບໍລິການ ຫຼຸດລົງ -4,49% ກວມ 22% ຂອງ GPP ນອກຈາກນີ້ ການລະດົມທືນທົ່ວສັງຄົມ ເຂົ້າໃນການພັດທະນາ: ກອງທຶນໜຶ່ງດວງໃຈບໍລິຄໍາໄຊ ຊ່ວຍເຫຼືອສັງຄົມ ໄດ້ເປັນສ່ວນໜຶ່ງທີ່ເຂັ້ມແຂງ ໂດຍຄ່ຽງຄູກັບອົງການປົກຄອງແຂວງ ໃນການສ້າງສາພັດທະນາ ແຂວງ ບໍລິຄຳໄຊ ເຊິ່ງນຳໃຊ້ທຶນລະດົມທົ່ວສັງຄົມ ເຂົ້າໃນການພັດທະນາເປັນຕົ້ນແມ່ນ: ປະກອບສ່ວນດ້ານວັດສະດຸກໍ່ສ້າງໂຮງຮຽນ, ອຸປະກອບເຄື່ອງ ໃຊ້ເຂົ້າໃນວຽກງານຕ້ານພະຍາດໂຄວິດ-19, ຊື້ຕັ່ງໃຫ້ໂຮງໝໍແຂວງ, ປະກອບ ສ່ວນອາຫານສວາຍໃຫ້ແພດໝໍ, ຊ່ວຍເຫຼືອປຸກເຮືອນສາຍໃຈ ບໍລິຄຳໄຊ-ຮ່າຕິ່ງ, ປະກອບສ່ວນຊື້ເຄື່ອງດື່ມ ແລະ ອາຫານ ໄປມອບໃຫ້ຄົນເຈັບ ຢູ່ໂຮງໝໍທະຫານແຂວງ, ໂຮງໝໍແຂວງ ແລະ ຊຸກຍູ້ກອງປະຊຸມໃຫຍ່ແມ່ຍິງລາວທົ່ວປະເທດ, ສ້າງຂົວອູ່ຢູ່ເມືອງວຽງທອງ ແລະ ອື່ນໆ ລວມມູນຄ່າ ຫຼາຍກວ່າ 400 ລ້ານກີບ. ນອກນັ້ນ ກໍໄດ້ເປັນເຈົ້າການປຸກລະດົມທຶນ ກໍ່ສ້າງເສັ້ນທາງເຂົ້າບ້ານ ແລະ ປຸກສ້າງທີ່ຢູ່ອາໃສໃຫ້ຄອບຄົວອານາຖາ, ລະດົມທຶນຊ່ວຍຜູ້ເຄາະຮ້າຍ ແລະ ອື່ນໆ ໂດຍລວມແລ້ວເຫັນວ່າ ມາຮອດປັດຈຸບັນ ທົ່ວແຂວງ ບໍລິຄໍາໄຊ ບໍ່ວ່າຈະເປັນຕົວເມືອງ ແລະ ຊົນນະບົດ ແມ່ນໄດ້ຮັບການພັດທະນາໄປພ້ອມໆກັນ, ປະຊາຊົນ ມີຄວາມສາມັກຄີ-ປອງດອງ, ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ຮອບດ້ານ, ນໍາໃຊ້ທ່າແຮງທຸກພາກສ່ວນໃນສັງຄົມ ເຂົ້າໃສ່ການພັດທະນາ ແລະ ມີການຂະຫຍາຍຕົວຕໍ່ເນື່ອງ ແລະ ໜັກແໜ້ນ.

 

Off

Comments are closed.