09th Mar2022

ກອງປະຊຸມວຽກງານພັກ, ວຽກງານພະນັກງານທົ່ວກຳລັງປ້ອງກັນຄວາມສະຫງົບ ຄັ້ງທີ V.

by somda phoneor

ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມວຽກງານພັກ, ວຽກງານພະນັກງານທົ່ວກຳລັງປ້ອງກັນຄວາມສະຫງົບ ຄັ້ງທີ V ໃນວັນທີ 9 ມີນາ 2022 ນີ້ ເພື່ອສະຫຼຸບຕີລາຄາການຈັດຕັ້ງປະຕິບັດໜ້າທີ່ວຽກງານການກໍ່ສ້າງພັກ, ກໍ່ສ້າງພະນັກງານທົ່ວກຳລັງປ້ອງກັນຄວາມສະຫງົບ ໃນໄລຍະ 5 ປີ ຜ່ານມາ ແລະ ວາງທິດທາງແຜນການໃນ 5 ປີຕໍ່ໜ້າ,

ໂດຍພາຍໃຕ້ການເປັນປະທານຂອງ ພົອ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງປ້ອງກັນຄວາມສະຫງົບ, ມີບັນດາຄະນະພັກ, ຄະນະນຳຂັ້ນສູງກະຊວງ, ບັນດາກົມໃຫ່ຍ, ຫ້ອງວ່າການກະຊວງ, ປກສ ນະຄອນຫຼວງວຽງຈັນ, ບັນດາ ປກສ ແຂວງທົ່ວປະເທດ ແລະ ແຂກຖືກເຊີນເຂົ້າຮ່ວມ.

ພົນຕີ ວັນທອງ ກອງມະນີ ກຳມະການສູນກາງພັກ, ຮອງເລຂາຄະນະພັກກະຊວງ ຮອງລັດຖະມົນຕີ ຫົວໜ້າກົມໃຫ່ຍການເມືອງປ້ອງກັນຄວາມສະຫງົບ ໄດ້ກ່າວໄຂກອງປະຊຸມຄັ້ງນີ້ ເຊິ່ງທ່ານໄດ້ຍົກໃຫ້ເຫັນຄວາມໝາຍຄວາມສຳຄັນຂອງກອງປະຊຸມກໍຄືວຽກງານພັກ, ວຽກງານພະນັກງານໃນກຳລັງປ້ອງກັນຄວາມສະຫງົບ ເຊິ່ງເນື້ອໃນສຳຄັນບາງຕອນທ່ານໄດ້ກ່າວວ່າ:

ແລະ ພົນຕີ ວັນທອງ ກອງມະນີ ກໍໄດ້ຜ່ານບົດສະຫຼຸບຕີລາຄາວຽກງານກໍ່ສ້າງພັກ, ກໍ່ສ້າງພະນັກງານທົ່ວກຳລັງປ້ອງກັນຄວາມສະຫງົບ ໄລຍະ 5 ປີ ຜ່ານມາ ທ່ານໄດ້ໃຫ້ຮູ້ ໄລຍະແຕ່ປີ 2016-2020 ພາຍໃຕ້ການນໍາພາ-ຊີ້ນໍາຂອງຄະນະບໍລິຫານງານສູນງກາງພັກ ກໍຄືຄະນະພັກກະຊວງ ແລະ ຄະນະພັກ-ຄະນະບັນຊາແຕ່ລະຂັ້ນ ໄດ້ເຮັດໃຫ້ການຈັດຕັ້ງປະຕິບັດວຽກງານພັກ, ວຽກງານພະນັກງານໃນກຳລັງປ້ອງກັນຄວາມສະຫງົບໃນ 5 ປີຜ່ານມາ ໄດ້ດຳເນີນຢ່າງຕັ້ງໜ້າ ແລະ ມີຜົນສຳເລັດຫຼາຍດ້ານ ເປັນຕົ້ນວຽກງານກໍ່ສ້າງພັກທາງດ້ານການເມືອງ, ທາງດ້ານແນວຄິດ, ທາງດ້ານການຈັດຕັ້ງ, ທາງດ້ານແບບແຜນວິທີນຳພາ ແລະ ການນຳພາອົງການຈັດຕັ້ງມະຫາຊົນ, ໂດຍສືບຕໍ່ຍຶດໜັ້ນລັດທິມາກ-ເລນິນ, ແນວຄິດໄກສອນພົມຫານ ແລະ ມູນເຊື້ອອັນດີງາມຂອງພັກ, ຂອງຊາດ ແລະ ຂອງກຳລັງເປັນພື້ນຖານແນວຄິດ ແລະ ການເຄື່ອນໄຫວຕົວຈິງ, ໃນນີ້ໄດ້ນຳພາຄົ້ນຄວ້າ, ເຊື່ອມຊຶມ ແລະ ການຈັດຕັ້ງປະຕິບັດມະຕິ, ຄຳສັ່ງຕ່າງໆຂອງສູນກາງພັກວາງອອກ ເຂົ້າສູ່ວຽກງານຕົວຈິງ. ຄື: ໄດ້ເປີດບຳລຸງ ແລະ ກໍ່ສ້າງທິດສະດີການເມືອງ-ການບັນຊາໃຫ້ພະນັກງານຫຼັກແຫຼ່ງໄດ້ 11 ຊຸດ ມີ 639 ສະຫາຍ, ຈັດຕັ້ງເຜີຍແຜ່ເຊື່ອມຊືມເອກະສານຕ່າງໆໄດ້ 63 ຄັ້ງ ມີ 130 ເອກະສານ ມີຜູ້ເຂົ້າຮ່ວມ 6,300 ເທື່ອຄົນ, ສາມາດຂະຫຍາຍມະຫາຊົນກ້າວໜ້າເຂົ້າພັກໄດ້ 4,382 ສະາຍ, ຍິງ 1,031 ສະາຍ, ອອກບັດສະມາຊິກພັກສົມບູນໄດ້ 5,945 ສະຫາຍ, ສາມາດຕີລາຄາ ແລະ ຈັດແບ່ງປະເພດການກໍ່ສ້າງໝ່ວຍພັກປອດໃສ ເຂັ້ມແຂງ ໜັກແໜ້ນ ຄືປີ 2016 ມີ 130 ຫົວໜ່ວຍ ຈາກ 232  ຫົວໜ່ວຍ ກວມ 55%, ປີ 2018 ມີ 140 ຫົວໜ່ວຍ ຈາກ 240 ຫົວໜ່ວຍ ກວມ 58%, ປີ 2019 ມີ 183 ຫົວໜ່ວຍ ຈາກ 251 ຫົວໜ່ວຍ ກວມ 72 % ແລະ ປີ 2020 ມີ 186 ຫົວໜ່ວຍຈາກ 243 ຫົວໜ່ວຍ ກວມ 72%.

 

ສຳລັບວຽກງານພະນັກງານໄດ້ຈັດສົ່ງນາຍ ແລະ ພົນຕຳຫຼວດໄປບຳລຸງ ແລະ ກໍ່ສ້າງວິຊາສະເພາະຂັ້ນຕ່າງໆ 34,338 ເທື່ອຄົນ ຍິງ 5,807 ເທື່ອຄົນ ໄດ້ຄັດເລືອກຜູ້ດີເດັ່ນ ແລະ ມີຜົນງານປະກອບເຂົ້າໃນກົງຈັກການຈັດຕັ້ງຕ່າງໆ 2,095 ສະຫາຍ, ໄດ້ຮັບການຕົກລົງເລື່ອນຊັ້ນຂັ້ນພັອຫານາຍພັນ 174 ສະຫາຍ, ເລື່ອນຊັ້ນຂັ້ນຕ່າງໆອີກ 47,335 ເທື່ອຄົນ, ອານຸມັດນະໂຍບາຍຮັບອຸດໜູນບຳນານ 1,546 ສະຫາຍ, ນຳສະເໜີຂັ້ນເທີງຍ້ອງຍໍຊັ້ນຫຼຽນໄຊ, ຫຼຽນກາ 35,408 ໜ່ວຍ, ໃບຍ້ອງຍໍ່ຕ່າງໆ 41,326 ໃບ, ແກ້ໄຂປະກົດການຫຍໍ້ທໍ້ພາຍໃນກຳລັງໄດ້ 247 ເລື່ອງ, ປະຕິບັດວິໄນຕໍ່ນາຍ ແລະ ພົນຕຳຫຼວດທີ່ເຄື່ອນໄຫວກະທຳຜິດ 1,222 ຄົນ, ໃນນີ້ປະຕິບັດວິໄນອອກຈາກກຳລັງ 686 ຄົນ ແລະ ອື່ນໆ.

ຫຼັງຈາກນັ້ນ ຜູ້ເຂົ້າຮ່ວມກອງປະຊຸມ ກໍໄດ້ຮັບຟັງການປະກອບຄຳຄິດຄຳເຫັນກ່ຽວກັບການນຳພາວຽກງານພັກ, ວຽກງານພະນັກງານຈາກຜູ້ຕາງໜ້າຈາກບັນດາກົມກອງຕ່າງໆຕື່ມອີກ.

Off

Comments are closed.