09th Mar2022

ປກສ ເມືອງຫົງສາ ເອົາໃຈໃສ່ປະຕິບັດວາລະແຫ່ງຊາດ ວ່າດ້ວຍການແກ້ໄຂຢາເສບຕິດ.

by somchan

ພັທ ທອງໄຫຼ ເພັດດາວົງ ຫົວໜ້າ ກອງບັນຊາການ ປກສ ເມືອງຫົງສາ ແຂວງໄຊຍະບູລີ ໄດ້ໃຫ້ສຳພາດຕໍ່ສື່ມວນຊົນ ໃນທ້າຍອາທິດຜ່ານມານີ້ວ່າ ກອງບັນຊາການ ປກສ ເມືອງຫົງສາ ໄດ້ເປັນເຈົ້າການເອົາໃຈໃສ່ ລົງໂຄສະນາແຜ່ເຜີຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍໄດ້ນຳເອົາເອກະສານ, ນິຕິກຳ ທີ່ພົວພັນເຖິງຢາເສບຕິດ ລົງເຜີຍແຜ່ເຊື່ອມຊືມໃຫ້ພະນັກງານທະຫານຕຳຫຼວດ,ນັກຮຽນ, ນັກທຸລະກິດ, ຜູ້ປະກອບການ ແລະ ບ້ານໃນທົ່ວເມືອງ. ພ້ອມນັ້ນ, ກໍ່ໄດ້ກຳນົດພື້ນທີ່, ສະຖານທີ່ຫຼໍ່ແຫຼມທີ່ມີຄວາມສ່ຽງໃນການປູກ, ຜະລິດ, ຂົນສົ່ງ, ຄ້າຂາຍຢາເສບຕິດໃນທົ່ວເມືອງ. ໃນນີ້, ມີພື້ນທີ່ທີ່ມີຄວາມສັບສົນ ຈຳນວນ 4 ຈຸດ, ສະຖານທີ່ຫຼໍ່ແຫຼມ 2 ຈຸດ, ຂຶ້ນບັນຊີເປົ້າໝາຍເສບ ແລະ ຄ້າຂາຍ ທັງໝົດ 562 ຄົນ, ຍິງ 30 ຄົນ. ໃນນີ້, ເສບ 530 ຄົນ, ຍິງ 22 ຄົນ, ຄ້າຂາຍ 32 ຄົນ, ຍິງ 8 ຄົນ, ສາມາດແກ້ໄຂຄະດີຄ້າຂາຍຢາເສບຕິດໄດ້ 34 ລາຍ, ກັກຕົວຕ້ອງຫາ 35 ຄົນ, ຍິງ 9 ຄົນ, ຢຶດຂອງກາງຢາບ້າໄດ້ 129,382 ເມັດ, ໂດຍໄດ້ປະກອບເອກະສານ, ຂອງກາງ ແລະ ນຳຕົວຜູ້ຕ້ອງຫາສົ່ງກອງບັນຊາການ ປກສ ແຂວງ ຕໍ່ພາກສ່ວນທີ່ບໍ່ເຂັດຫຼາບກັບຄືນມາເສບໃຫມ່ຫລາຍຄັ້ງ ໄດ້ປະກອບສຳນວນຄະດີ 10 ລາຍ, ຕ້ອງຫາ 10 ຄົນ, ສົ່ງໃຫ້ໄອຍາການເຂດ 3 ດຳເນີນຕາມຂັ້ນຕອນຂອງກົດໝາຍ, ໄດ້ສຶກສາອົບຮົມຢູ່ຂັ້ນບ້ານມອບໃຫ້ຄອບຄົວ ຈຳນວນ 227 ຄົນ, ຍິງ 8 ຄົນ, ໄດ້ນຳຕົວເຂົ້າດັດສ້າງທັງໝົດ 63 ຄົນ, ຍິງ 3 ຄົນ, ເພື່ອເຮັດໃຫ້ບັນຫາຢາເສບຕິດຢູ່ພາຍໃນເມືອງຫົງສາ ຫຼຸດໜ້ອຍຖອຍລົງນັ້ນ. ພັທ ທອງໄຫຼ ເພັດດາວົງ ໄດ້ຮຽກຮ້ອງໃຫ້ການຈັດຕັ້ງທຸກພາກສ່ວນໃນສັງຄົມ, ຈົ່ງເປັນເຈົ້າການ ມີຄວາມຮັບຜິດຊອບຮ່ວມກັນ, ແນໃສ່ເຮັດໃຫ້ບັນຫາຢາເສບຕິດຫຼຸດລົງຢ່າງຕັ້ງໜ້າ ແລະ ເປັນຮູບປະທຳ.

Off

Comments are closed.