09th Mar2022

ກັກຕົວເປົ້າໝາຍຊື້-ຂາຍ ຢາເສບຕິດ ໄດ້ 02 ຄົນ ພ້ອມ ຢາບ້າ 3 ລ້ານກວ່າເມັດ ແລະ ຢາໄອສ໌ 25 ກິໂລກຼາມ.

by somda phoneor

ພັທ ບົວທອງ ບໍລິບານ  ຫົວໜ້າຫ້ອງຕໍາຫຼວດ ກອງບັນຊາການ ປກສ ແຂວງ ວຽງຈັນ, ໃຫ້ສໍາພາດຕໍ່ສື່ມວນຊົນ ປກສ ໃນວັນທີ 8 ມີນາ  2022 ນີ້ ວ່າ: ເພື່ອສຸມໃສ່ເຄື່ອນໄຫວຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເຊິ່ງເປັນບັນຫາສຳຄັນ, ຈຳເປັນ, ຮີບດ່ວນຂອງຊາດ ທີ່ໄດ້ສະສົມມາຫຼາຍປີ ໃຫ້ຫຼຸດລົງຢ່າງຈະແຈ້ງໃນກຳນົດເວລາທີ່ແນນອນ.

ດັ່ງນັ້ນ, ເຈົ້າໜ້າທີ່ທຸກພາກສ່ວນ ເວົ້າລວມ ເວົ້າສະເພາະ ແມ່ນເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ກອງບັນຊາການ ປກສ ແຂວງວຽງຈັນ ໄດ້ເອົາໃຈໃສ່ ແລະ ເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານດັ່ງກ່າວຢ່າງຕັ້ງໜ້າ ເປັນຕົ້ນ ລົງໂຄສະນາເຜີຍແຜ່ລະບຽບກົດໝາຍ ແລະ ນິຕິກໍາຕ່າງໆ, ຜົນຮ້າຍ ແລະ ໄພອັນຕະລາຍຂອງຢາເສບຕິດ ໃຫ້ພໍ່-ແມ່ປະຊາຊົນບັນດາເຜົ່າ ຮັບຮູ້-ເຂົ້າໃຈ.

ພ້ອມນີ້ ຍັງໄດ້ຂຶ້ນບັນຊີເປົ້າໝາຍຢາເສບຕິດແຕ່ລະປະເພດ, ພ້ອມທັງສຸມໃສ່ສະກັດ ແລະ ແກ້ໄຂຢ່າງເດັດຂາດ ຈົນສາມາດແກ້ໄຂໄດ້ຫຼາຍຄະດີ ໂດຍສະເພາະ ໃນວັນທີ 3  ມີນາ 2022 ຜ່ານມາ ເຈົ້າໜ້າທີ່ວິ ຊາສະເພາະ ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ກອງບັນຊາການ ປກສ ແຂວງວຽງຈັນ ສົມທົບກັບ ເຈົ້າໜ້າທີ່ຕໍາຫຼວດ ຈະລາຈອນ ປກສ ເມືອງໝື່ນ ໄດ້ຕັ້ງດ່ານຈຸດກວດກາຢູ່ເສັ້ນທາງ ບ້ານນໍ້າຮີ້ ເມືອງໝື່ນ ແຂວງວຽງຈັນ ໄດ້ພົບເຫັນເປົ້າໝາຍທີ່ຕ້ອງສົງໃສ ຈຶ່ງໄດ້ລັດກວດກາພາຫະນະ ຜ່ານການກວດຄົ້ນລົດກະບະ ຍີ້ຫໍ້ໂຕໂຍຕາ ລີໂວ ສີເທົາ , ໝາຍເລກທະບຽນ ກມ 9808 ກໍາແພງນະຄອນ ຂັບຂີ່ໂດຍ ນາງ ບຸດສະດີ  ອາຍຸ 50 ປີ  ຢູ່ບ້ານ ທ້າວແກ່ນ, ເມືອງແກ່ນທ້າວ ແຂວງໄຊຍະບູລີ ຜ່ານດ່ານກວດພົບເຫັນ ຢາບ້າ ຈໍານວນ 700 ມັດ ເທົ່າກັບ 1.400.000 ເມັດ, ເງີນກີບ 950.000 ກີບ, ເງີນບາດ 7.900 ບາດ, ສາຍແຂນສີເຫຼືອງຄ້າຍຄືຄໍາ 1 ວົງ, ໂມງ 1 ໜ່ວຍ, ໂທລະສັບ 2 ໜ່ວຍ ແລະ ລົດກະບະ ຍິ່ຫໍ້ລີໂວ ສີຂາວ ເລກທະບຽນ ກຫ 5532 ກໍາແພງນະຄອນ ຂັບຂີ່ໂດຍ ນາງ ກັນຕິລາ ຫຼື ຕຸກຕາ ອາຍຸ 46 ປີ  ຢູ່ບ້ານ ວັດໄຕນ້ອຍ ເມືອງສີໂຄດຕະບອງ ນະຄອນຫຼວງວຽງຈັນ ພົບເຫັນຢາບ້າຈໍານວນ 999 ມັດ ເທົ່າກັບ 1.998.000 ເມັດ ຢາໄອສ໊ ຈໍານວນ 25 ຫໍ່ ເທົ່າກັບ 25 ກິໂລກຼາມ, ເງິນໂດລາ 302 ໂດລາ, ຕຸ້ມຫູ ສີເຫຼືອງຄ້າຍຄືຄໍາ 1 ຄູ່, ສາຍຄໍເລດ 1 ເສັ້ນ, ເງິນກີບ 999.000 ກີບ, ເງີນບາດ 4.350 ບາດ, ໂທລະສັບໄອໂຟນ 2 ເຄື່ອງ ລວມຢາເສບຕິດທັງໝົດ 1.699 ມັດ ເທົ່າກັບ 3.398.000 ເມັດ, ຢາໄອສ໊ 25 ກິໂລກຼາມ.

ປັດຈຸບັນເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງວຽງຈັນ ກໍາລັງເລັ່ງ ສອບສວນພວກຖືກຫາທັງ 2 ຄົນ ເພື່ອຂະຫາຍຜົນຊອກຫາ ກຸ່ມແກ້ງ ຜູ້ຮ່ວມຂະບວນການມາລົງໂທດຕາມລະບຽບກົດໝາຍຢ່າງເຂັ້ມງວດ ແລະ ທ່ານຍັງຮຽກຮ້ອງມາຍັງ ພໍ່ແມ່ປະຊາຊົນບັນດາເຜົ່າທີ່ດຳລົງຊີວິດຢູ່ໃນ ສປປ ລາວ ເວົ້າລວມເວົ້າສະເພາະຢູ່ແຂວງວຽງຈັນ ຈົ່ງພ້ອມກັນຊ່ວຍເປັນຫູເປັນຕາ ຊ່ວຍເຈົ້າໜ້າທີ່ ຖ້າພົບເຫັນບຸກຄົນ, ກຸ່ມຄົນໃດ ມີການເຄື່ອນໄຫວທີ່ຜິດຕໍ່ລະບຽບກົດໝາຍ ໃຫ້ລາຍງານຕໍ່ອຳນາດການປົກຄອງບ້ານ ຫຼື ເຈົ້າໜ້າທີ່ເພື່ອຈະໄດ້ແກ້ໄຂໃຫ້ທັນກັບສະພາບການ. ພ້ອມກັນນັ້ນ ກໍ່ໃຫ້ເປັນເຈົ້າການປະກອບຢ່າງຕັ້ງໜ້າໃນຈັດຕັ້ງປະຕິບັດວ່າລະແຫ່ງຊາດວ່າດ້ວຍການແກ້ໄຂຢາເສບຕິດໂດຍໃຫ້ເປັນໜ້າທີ່, ພັນທະ ແລະ ຄວາມຮັບຜິດຂອງທຸກພາກສ່ວນໃນສັງຄົມ ເພື່ອເຮັດໃຫ້ປະເທດເທດຊາດ ກໍ່ຄື ສັງຄົມລາວມີຄວາມສະຫງົບ ມີຄວາມເປັນລະບຽບຮຽບຮ້ອຍ ແລະ ປອດໄພ.

Off

Comments are closed.