10th Mar2022

ກະຊວງ ປກສ ປາຖາກະຖາວັນສ້າງຕັ້ງພັກ ຄົບຮອບ 67 ປີ.

by somda phoneor

ໃນວັນທີ 10 ມີນາ 2022 ກະຊວງ ປ້ອງກັນຄວາມສະຫງົບ ໄດ້ຈັດພິທິປາຖາກະຖາວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ ( 22 ມີນາ 1955-2022 ), ໃຫ້ກຽດປາຖາກະຖາ ຂອງ ສະຫາຍ ພົຕ ວັນທອງ ກອງມະນີ ກໍາມະການສູນກາງພັກ ຮອງເລຂາຄະນະພັກກະຊວງ ຮອງລັດຖະມົນຕີ ກະຊວງ, ຫົວໜ້າກົມໃຫຍ່ການເມືອງ ກະຊວງ ປກສ ໂດຍມີ ຄະນະພັກກະຊວງ, ຄະນະບັນຊາ, ພະນັກງານຫຼັກແຫ່ງອອ້ມຂ້າງກະຊວງ ເຂົ້າຮ່ວມ.

ສະຫາຍ ພົຕ ວັນທອງ ກອງມະນີ ໄດ້ກ່າວວ່າ: ພັກປະຊາຊົນປະຕິວັດລາວ ໄດ້ສ້າງຕັ້້ງຂຶ້ນໃນວັນທີ 22 ມີນາ 1955 ທີ່ເດີນຕາມລັດທິມາກ-ເລນິນ ເປັນຕົວແທນຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານທີ່ແທ້ຈິງ, ພັກຖືເອົາການຮັບໃຊ້ຊາດ, ຮັບໃຊ້ປະຊາຊົນ ເປັນທິດພື້ນຖານໃນການເຄື່ອນໄຫວຂອງຕົນປະທານໄກສອນ ພົມວິຫານ ໄດ້ຢືນຢັນ ແຕ່ຫົວທີ ວ່າ “ ພັກເຮົາໄດ້ກໍາເນີດຂຶ້ນ ໂດຍການສົມທົບລະຫວ່າງ ລັດທິມາກ-ເລນິນ ກັບລັດທິຮັກຊາດອັນແທ້ຈິງ ແລະ ລັດທິສາກົນກໍາມະກອນອັນຜ່ອງໃສ”.

ຕະຫຼອດໄລຍະການສ້າງຕັ້ງ, ຕໍ່ສູ້, ເຕີບໃຫຍ່ຂະຫຍາຍຕົວ ແລະ ນໍາພາການປະຕິວັດ 67 ປີ ຜ່ານມາ ພັກເຮົາຍາມໃດກໍ່ຮັກສາໄດ້ຄຸນທາດການເມືອງ, ທາດແທ້ປະຕິວັດວິທະຍາສາດ; ຍຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ, ເປົ້າໝາຍສັນຕິພາບ, ເອກະລາດ, ເອກະພາບ ວັດທະນາຖາວອນ ຕາມເສັ້ນທາງເຮັດໃຫ້ປະຊາຊົນຮັ່ງມີຜາສຸກ, ປະຊາຊົນມັ່ງຄັ່ງເຂັ້ມແຂງ, ສັງຄົມມີຄວາມສາມັກຄີປອງດອງ, ມີປະຊາທິປະໄຕຍຸຕິທໍາ ແລະ ສິວິໄລ; ປັບປຸງຕົວເອງຕາມທິດປອດໃສ, ເຂັ້ມແຂງ ຕະຫຼອດເວລາ. ພາຍໃຕ້ການນໍາພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ ທົ່ວກອງທັບ ທົ່ວປວງຊົນລາວທັງຊາດສາມາດຍາດໄດ້ໄຊຊະນະນີ້ໄປສູ່ໄຊຊະນະໃໝ່ ສ້າງໜ້າປະຫວັດສາດອັນສະຫວ່າງສະໄຫວ ໃນເງື່ອນໄຂປ່ຽນແປງໃໝ່ພັກເຮົາໄດ້ສືບຕໍ່ນໍາພາປະເທດຊາດຜ່ານຜ່າຄວາມທຸກຍາກ ແລະ ສິ່ງທົດສອບຕ່າງໆສາມາດຍາດໄດ້ຜົນງານອັນໃຫຍ່ຫຼວງ ມີຄວາມໝາຍປະຫວັດສາດ ປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາປະເທດຊາດທີ່ມີຜົນສໍາເລັດເປັນກ້າວໆ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ຖືກທິດດ້ວຍການຍູ້ແຮງການຫັນເປັນອຸດສະຫະກໍາເປັນທັນສະໄໝ ແລະອື່ນໆ.

ຜົນງານໄຊຊະນະທີ່ຍາດມາໄດ້ນັ້ນ ນອກຈາກການຊີ້ນໍາ-ນໍາພາສະຫຼາດສ່ອງໃສຂອງພັກແລ້ວແມ່ນມາຈາກຄວາມພະຍາຍາມສູ້ຊົນ, ບາກບັ່ນຂອງທົ່ວກອງທັບ, ປວງຊົນລາວທັງຊາດ ໃນນັ້ນ ມີການປະກອບສ່ວນດ້ວຍການເສຍສະຫຼະເລືອດເນື້ອເຫື່ອແຮງ, ສະຕິປັນຍາອັນສໍາຄັນຂອງຖັນແຖວພະນັກງານ, ສະມະຊິກພັກ, ນັກຮົບ ແລະ ຕະຫຼອດຮອດປະຊາຊົນບັນດາເຜົ່າຕ່າງ ມີຄວາມເອກອ້າງທະນົງໃຈຕໍ່ທາດແທ້ອັນດີງາມ, ມູນເຊື້ອວິລະຊົນ ແລະ ປະຫວັດອັນສະຫວ່າງສະໄຫວຂອງພັກເຮົາ ຊຶ່ງເປັນພັກສຶບທອດມາຈາກພັກຄອມມູນິດອິນດູຈີນ ແລະ ເປັນຕົວແທນຂອງຊົນຊັ້ນກໍາມະກອນລາວ.

Off

Comments are closed.