10th Mar2022

ຄະນະບໍລິຫານງານຊາວຫນຸ່ມ ກົມໃຫ່ຍຕຳຫລວດ ກະຊວງ ປກສ ສະຫລຸບການເຄື່ອນໄຫວວຽກງານ ປະຈຳປີ 2021 ແລະ ວາງທິດທາງແຜນການ ປີ 2022.

by somda phoneor

ຄະນະບໍລິຫານງານຊາວຫໜຸ່ມ ກົມໃຫ່ຍຕຳຫລວດ ກະຊວງ ປກສຈັດກອງປະຊຸມ ສະຫຼຸບການເຄື່ອນໄຫວວຽກງານ ປະຈຳປີ 2021 ແລະ ວາງທິດທາງແຜນການ ປີ 2022 ໃນວັນທີ 10ມີນາ 2022, ໂດຍການເປັນປະທານຂອງ ພັທ ແສງທອງ ສຸພາພົງ ເລຂາຄະນະບໍລິຫານງານຊາວຫນຸ່ມ ກົມໃຫ່ຍຕຳຫລວດ ໃຫ້ກຽດເຂົ້າຮ່ວມຂອງ ພົຈວ ນີລະວົງ ເຈືອງຕະວະລາດ ຮອງຫົວໜ້າກົມໃຫ່ຍຕໍາຫຼວດ,ມີບັນດາຄະນະໜ່ວຍຊາວໜຸ່ມ, ສະມາຊິກຊາວຫນຸ່ມ 17 ກົມກອງອ້ອມຂ້າງກົມໃຫ່ຍຕຳຫລວດເຂົ້າຮ່ວມ.

ພັທ ຄຳສະຫວັນ ສຸທຳມະວົງ ຮອງເລຂາຄະນະບໍລິຫານງານຊາມໜຸ່ມກົມໃຫ່ຍຕໍາຫຼວດໄດ້ຜ່ານບົດສະຫຼຸບຕີລາຄາໃນການຈັດຕັ້ງປະຕິບັດໜ້າທີ່ວຽກງານ ທ່ານໄດ້ຍົກໃຫ້ເຫັນດ້ານດີຜົນງານທີ່ເຮັດໄດ້ໃນ 1 ປີຜ່ານມາເປັນຕົ້ນ:ວຽກງານສຶກສາອົບຮົມການເມືອງແນວຄິດ,ຕິດພັນກັບວຽກງານວິຊາສະເພາະ ໃນນີ້ຄະນະຊາວໜຸ່ມແຕ່ລະຂັ້ນໄດ້ເອົາໃຈໃສ່ໃນການສຶກສາອົບຮົມການ ເມືອງນໍາພາແນວຄິດໃຫ້ແກ່ສະມາຊິກຊາວໜຸ່ມຢູ່ໃນຄວາມຮັບຜິດຊອບຂອງຕົນດ້ວຍຫຼາຍເນື້ອໃນ, ຫຼາຍວິທີການເຮັດໃຫ້ສະມາຊິກຊາວໜຸ່ມ ສ່ວນຫຼາຍມີຄວາມຮັບຮູ້ ເຊື່ອມຊຶມ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຄຳສັ່ງຂອງຂັ້ນເທິງ, ມີແນວຄິດອຸ່ນ ອ່ຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ, ມີສະຕິຕໍ່ການຈັດຕັ້ງ, ເອົາໃຈໃສ່ປະຕິບັດລະບຽບວິໄນຂອງກົມກອງ, ມີ ຄວາມສາມັກຄີເປັນເອກະພາບພາຍໃນ, ມີຄວາມຫ້າວຫັນໃນການປະຕິບັດໜ້າທີ່ວຽກງານການຈັດຕັ້ງມອບໝາຍໃຫ້, ພ້ອມກັນນັ້ນ ສະມາຊິກຊາວໜຸ່ມໄດ້ສຸມໃສ່ເກັບກຳຂ່າວ, ຂໍ້ມູນອາຊະຍາກໍາປະເພດຕ່າງໆທີ່ເກີດຂຶ້ນ ພ້ອມທັງຂຶ້ນບັນຊີ ເປົ້າໝາຍປະເພດ I, II, III, ລົງສືບຄົ້ນຫາເປົ້າໝາຍກະທໍາຜິດທາງອາຍາ ໄດ້ 284 ເປົ້າໝາຍ, ກໍ່ສ້າງ-ນຳໃຊ້ຕາໜ່າງ ພື້ນຖານລັບໄດ້ 1.100 ຄົນ, ນອກນັ້ນ ຍັງໄດ້ປະສານສົມທົບກັບກອງບັນຊາການ ປກສ ແຂວງ-ນະຄອນຫຼວງວຽງຈັນ ໃນການກວດກາ, ຕິດຕາມ, ແກ້ໄຂເປົ້າໝາຍຄະດີຕ່າງໆ ໄດ້ 75 ລາຍ, ກັກຕົວຜູ້ຖືກຫາໄດ້ 221 ຄົນ, ແລະ ສາມາດ ຍຶດ ເຄື່ອງຂອງກາງປະເພດພາຫານະ, ວັດຖຸ, ເງີນ, ຄໍາ ແລະ ອາວຸດເສິກ ໄດ້ຫຼາຍລາຍການໄດ້ເຂົ້າຮ່ວມວຽກງານສືບສວນ-ສອບສວນ ແລະ ດຳເນີນຄະດີຄ້າງມາ ແລະ ຄະດີເກີດຂຶ້ນ ໃໝ່ ໃນ ຂອບທົ່ວປະເທດ ຈໍານວນ 5.686 ລາຍ, ໃນນີ້ມີຄະດີເກີດຂຶ້ນ ໃໝ່ 2.148 ລາຍ, ສາມາດດຳເນີນຄະດີສຳເລັດ 865 ລາຍ, ຜູ້ຖືກຫາ 975 ຄົນ, ຍິງ 25 ຄົນ; ນອກນັ້ນຍັງໄດ້ເອົາໃຈໃສ່ຄຸ້ມຄອງ, ປ້ອງກັນເວນຍາມ ຄ້າຍຄຸມຂັງຊົ່ວຄາວ-ນາ ຂ່າ ຕະຫຼອດ 24 ຊົ່ວໂມງ ແລະ ອື່ນໆຢ່າງເຂັ້ມງວດ, ໄດ້ສຸມໃສ່ແກ້ໄຂອາຊະຍາກໍາທາງດ້ານເສດຖະກິດ ຄົ້ນຄ້ວາຄຳຮ້ອງຟ້ອງທີ່ຄ້າງມາ ແລະ ຄຳຮ້ອງເຂົ້າໃໝ່ ໃນ ຂອບເຂດທົ່ວປະເທດ ຈຳນວນ 1.269 ເລື່ອງ, ສາມາດຄົ້ນຄ້ວາແກ້ໄຂຄຳຮ້ອງຟ້ອງ ສຳເລັດໄດ້ 612 ເລື່ອງ ແລະ ດຳເນີນ ຄະດີເສດຖະກິດ ທີ່ຄ້າງມາ ແລະ ຄະດີເກີດຂຶ້ນໃໝ່ ຈຳນວນ 453 ລາຍ, ຜູ້ຖືກຫາ 358 ຄົນ, ຍິງ 151 ຄົນ, ຕ່າງປະເທດ 11 ຄົນ, ສຸມໃສ່ແກ້ໄຂບັນຫາຢາເສບຕິດ ທົ່ວປະເທດສາມາດມ້າງຄະດີຢາເສບຕິດໄດ້ 3.730 ລາຍ, ກັກຜູ້ຖືກຫາ 5.217 ຄົນ ແລະ ສາມາດດຳເນີນຄະດີສຳເລັດໄດ້ 3.370 ລາຍ. ສາມາດຍຶດຂອງກາງຢາເສບຕິດປະເພດຕ່າງໆໄດ້: ເຮໂຣ ອິນ 467,79 ກິໂລກຼາມ, ຢາບ້າ 14.300,81 ກິໂລກຼາມ, ຢາຝິ່ນ 18,92 ກິໂລກຼາມ, ຄັນຊາ 5.846,69 ກິໂລກຼາມ, ຢາ ໄອ໋ສ 2.991,02 ກິໂລກຼາມ, ນໍ້າຢາເຄມີ 10 ກິໂລກຼາມ, ເຄຕາມິນ 4,11 ກິໂລກຼາມ, ຢາອີ 0,08 ກິໂລກຼາມ, ແປ້ງຝຸ່ນ ເພື່ອນຳມາປະສົມຜະລິດຢາເສບຕິດ 19.480,07 ກິໂລກຼາມ, ສຸມໃສ່ແກ້ໄຂການກະທຳຜິດຕໍ່ສິ່ງແວດລ້ອມ ສາມາດຍຶດຂອງກາງໄດ້ຫຼາຍລາຍການຄື: ງາຊ້າງ 01 ຄູ່ ມີນໍ້າ ໜັກ 1.700 ກຼາມ, ງາຊ້າງຕັດ 01 ກິ່ງ ນໍ້າໜັກ 440 ກຼາມ, ແຫວນເຮັດດ້ວຍງາຊ້າງ 01 ວົງ, ປະລັກແຂນງາຊ້າງນໍ້າໜັກ 60 ກຼາມ, ແຂ້ວເສືອ ນໍ້າໜັກ 20 ກຼາມ, ໝີຄວາຍ 02 ໂຕ, ເຫງັນໝີ 02 ໂຕ ແລະ ມ້າງເປົ້າໝາຍ ນໍາເຂົ້າຢາສູບບໍ່ຖືກ ຕ້ອງ (ບໍ່ໄດ້ເສຍພາສີ) 01 ລາຍ, ຜູ້ຖືກຫາ 05 ຄົນ, ຍິງ 01 ຄົນ, ພ້ອມຢຶດຂອງກາງຢາສູບໄດ້ 424 ແກັດ ເທົ່າກັບ 42.400 ຕຸດ, ເປີດພິທີທໍາລາຍອາຫານທະເລແຊ່ແຂງ ແລະ ອາຫານສົດທີ່ລັກລອບນຳເຂົ້າບໍ່ຖືກຕ້ອງຈາກຕ່າງປະເທດຈຳ ນວນ 642 ກິໂລກຼາມ, ສຸມໃສ່ແກ້ໄຂຄະດີຄ້າມະນຸດ ຄະດີການກະທຳຜິດທີ່ລະເມີດເຖິງສິດທິຂອງແມ່ຍິງ ແລະ ເດັກນ້ອຍ ທີ່ຄ້າງມາ ແລະ ຄະດີເກີດຂຶ້ນໃໝ່ ທົ່ວປະ ເທດທັງໝົດ 250 ລາຍ, ມີຜູ້ຖືກເຄາະຮ້າຍ 269 ຄົນ. ສາມາດແກ້ໄຂ ຫຼື ດຳເນີນ ສຳເລັດທັງໝົດ 199 ລາຍ, ຜູ້ຖືກຫາ 280 ຄົນ, ຍິງ 83 ຄົນ, ມີຜູ້ຖືກເຄາະຮ້າຍ 193 ຄົນ, ຍິງ 176 ຄົນ, ອາຍຸຕໍ່າກ່ວາ 18 ປີ 119 ຄົນ, ຍິງ 116 ຄົນ, ຜູ້ຖືກຫາຄົນຕ່າງປະເທດ 11 ຄົນ, ຍິງ 07 ຄົນ, ໃນນີ້ມີຄະດີທີ່ເປັນການຄ້າມະນຸດ 39 ເລື່ອງ, ຜູ້ຕ້ອງຫາ 77 ຄົນ, ຍິງ 51 ຄົນ, ຕ່າງປະເທດ 17 ຄົນ, ຍິງ 09 ຄົນ, ມີຜູ້ຖຶກເຄາະຮ້າຍທັງໝົດ 110 ຄົນ, ຍິງ 92 ຄົນ, ອາຍຸຕໍ່າກ່ວາ 15 ປີ ມີ 75 ຄົນ, ຍິງ 62 ຄົນ, ສຸມໃສ່ແກ້ໄຂການວຽກງານຈະລາຈອນ ລົງໂຄສະນາຢູ່ຕາມເສັ້ນ ທາງ, ກຸ່ມບ້ານ, ສຳນັກງານ-ອົງການຕ່າງໆ ທົ່ວປະເທດທັງໝົດ 3.979 ຄັ້ງ, ໂຄສະນາຜ່ານສື່ມວນຊົນທາງວິທະຍຸ, ໂທລະພາບ 997 ຄັ້ງ, ລົງກວດກາການສັນຈອນ ຕາມເສັ້ນທາງຫຼວງ ເພື່ອຈັບຄວາມໄວ, ກວດກາທາດເຫຼົ້າ, ຂົນສົ່ງສິນຄ້າ, ຜູ້ໂດຍສານເກີນກຳນົດ 3.905 ຄັ້ງ, ມີຜູ້ລ່ວງລະເມີດ 33.745 ຄົນ, ສຶກສາອົບຮົມ 25.001 ຄົນ ແລະ ອື່ນໆ.

Off

Comments are closed.