06th Nov2015

ທ່ານ ລມຕ ວ່າການກະຊວງ ປກສ ຊີ້ນຳ ວຽກງານປ້ອງກັນຄວາມສະຫງົບ 3 ແຂວງ

by somchan

ໃນວັນທີ 6 ພະຈິກ 2015 ນີ້ ພົຈວ ສົມແກ້ວ ສີລາວົງ ກຳມະການສູນກາງພັັກ ລັດຖະມົນຕີວ່າກະຊວງປ້ອງກັນຄວາມສະຫງົບ ພ້ອມດ້ວຍຄະນະນຳກະຊວງ ປກສ ເຄື່ຶອນໄຫວຊີ້ນຳວຽກງານວິຊາສະເພາະ ຢູ່ກອງບັນຊາການ ປກສ ແຂວງສະຫວັນນະເຂດ ມີຫົວໜ້າ ແລະ ຮອງກອງບັນຊາການ ປກສ ແຂວງຄຳມ່ວນ ແລະ ແຂວງຈຳປາສັກ, ພ້ອມດ້ວຍພະນັກງານ-ນັກຮົບ ປກສ ແຂວງສະຫວັນນະເຂດເຂົ້າຮ່ວມ.

ພັອ ຄຳພົນ ສີຫາປັນຍາ ຫົວໜ້າກອງບັນຊາການ ປກສ ແຂວງ ສະຫວັນນະເຂດ , ທ່ານ ພັອ ແກ້ວດາວົງ ໄຊຍະແສງ ຫົວໜ້າກອງບັນຊາການ ປກສ ແຂວງຄຳມ່ວນ ແລະ ພັທ ສຸກັນໄຕ ໄຊຍະວົງ ຮອງກອງບັນຊາການ ປກສ ແຂວງຈຳປາສັກ ໄດ້ພັດປ່ຽນກັນລາຍງານສະພາບການຈັດຕັ້ງປະຕິບັດວຽກງານວິຊາເພາະໃນໄລຍະຜ່ານມາ ເປັນຕົ້ນແມ່ນການປ້ອງກັນສະກັດກັ້ນ ແລະ ແກ້ໄຂປະກົດການຫຍໍ້ພາຍໃນແຂວງຂອງຕົນ ເຊິ່ງຄະນະພັກຄະນະກອງບັນຊາການ ປກສ ແຂວງທັງສາມແຂວງໄດ້ສຸມໃສ່ໃກ້ສິດຕິດແທດ ແລະ ຊີ້ນຳພະນັກງານນັກຮົບທາງດ້ານການເມືອງ-ແນວຄິດ ຕິດພັນວຽກງານວິຊາສະເພາະຢ່າງເປັນປົກກະຕິ ພ້ອມທັງຫັນເອົາກຳລັງລົງກໍ່ສ້າງຮາກຖານການເມືອງເຮັດໃຫ້ກຳລັງ ປກສ ແຂວງມີຄວາມເຕີບໃຫຍ່ເຂັ້ມແຂວງ ຮັບປະກັນໃຫ້ສັງຄົມມີຄວາມສະຫງົບ ມີຄວາມເປັນລະບຽບຮຽບຮ້ອຍໂດຍພື້ນຖານ.

ແຕ່ເຖິງແນວໃດກໍ່ຕາມ ກຸ່ມຄົນບໍ່ດີຍັງສືບຕໍ່ເຄື່ອນໄຫວສ້າງຄວາມບໍ່ສະຫງົບຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ ໂດຍສະເພາະການໂຄສະນາໃສ່ຮ້າຍຕໍ່ການນໍາພາຂອງພັກ ປຸກລະດົມປະຊາຊົນຜູ້ຮູ້ເທົ່າບໍ່ເຖິງການເຄື່ອນໄຫວກະທຳຜິດຕໍ່ລະບຽບກົດໝາຍ ເປັນຕົ້ນແມ່ນ, ບັນຫາຂີ້ລັກ-ງັດແງະ, ປຸ້ນຈີ້ຊີງຊັບ, ບັນຫາຢາເສບຕິດ ເຊິ່ງເປັນຫາທີ່ທ້າທາຍ ທັງເປັນການກົດໜ່ວງທ່ວງດຶງການປົກຮັກສາ ແລະ ພັດທະນາປະເທດຊາດ.

ເພື່ອເປັນການກະກຽມສະເຫຼີມສະຫຼອງວັນຊາດທີ 2 ທັນວາ ຄົບຮອບ 40 ປີ ວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 60 ປີ ພ້ອມທັງເປັນການສ້າງຜົນງານຕ້ອນຮັບວັນສ້າງຕັ້ງກຳງລັງ ປກສ ຄົບຮອບ 55 ປີທີ່ຈະມາເຖິງ ດ້ວຍຄວາມເອົາໃຈໃສ່ ແລະ ເປັນຫ່ວງເປັນໄຍຂອງຄະນະພັກ-ຄະນະນຳກະຊວງ ປກສ, ພົຈວ ສົມແກ້ວສີລາວົງ ກໍາມະການສູນກາງພັກ ລັດຖະມົນຕີວ່າການກະຊວງ ປກສ ໄດ້ສະແດງຄວາມຊົມເຊີຍຕໍ່ຄວາມເອົາໃຈໃສ່ປະຕິບັດໜ້າທີ່ຂອງຄະນະພັກ-ຄະນະບັນຊາ-ພະນັກງານນັກຮົບ ປກສ ແຂວງສະຫວັນນະເຂດ, ແຂວງຄຳມ່ວນ ແລະ ແຂວງຈຳປາສັກ ເຮັດໃຫ້ບັນດາແຂວງມີຄວາມສະຫງົບປອດໄພໂດຍພື້ນຖານ ເພືື່ອເປັນການສືບຕໍ່ແກ້ໄຂບັນຫາທີ່ຍັງຄົງຄ້າງ ໃຫ້ໝົດໄປ ບໍ່ໃຫ້ມີເຫດການທີ່ບໍ່ດີເກີດຂຶ້ນໃນສັງຄົມ ເວົ້າສະເພາະແມ່ນໂອກາດສະເຫຼີມສະຫຼອງ ສອງວັນປະຫວັດສາດທີ່ຈະມາເຖິງນີ້, ທ່ານໄດ້ເນັ້ນໜັ້ນໃຫ້ຄະນະພັກ-ຄະນະນຳ ປກສ ທັງ 3 ແຂວງ ສຶກສາອົບຮົມການເມືອງ-ແນວຄິດໃຫ້ພະນັກງານນັກຮົບມີຄວາມອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ-ລັດສຸມໃສຈັດຕັ້ງປະຕິບັດ 4 ຄາດໝາຍ, 4 ບຸກທະລຸ ແລະ 4ໜ້າທີ່ໃຫຍ່ຂອງກະຊວງ ປກສ ໃຫ້ປະກົດຜົນເປັນຈິງ ພ້ອມທັງນຳເອົາແນວທາງນະໂຍບາຍຂອງພັກ ລະບຽບກົດໝາຍຊອງລັດໄປເຜີຍແຜ່ໃຫ້ພໍ່ແມ່ປະຊາຊົນຢູ່ທ້ອງຖິ່ນຮາກຖານ ໃຫຮັບຮູ້ ແລະ ເຂົ້າໃຈຢ່າງທົ່ວເຖິງ ປຸກລະດົມໃຫ້ທຸກຊັ້ນຄົນເປັນເຈົ້າການປະກອບສ່ວນຢ່າງຕັ້ງໜ້າເຂົ້າໃນວຽກງານ ປກຊ-ປກສ ເພື່ອເຮັດໃຫ້ສັງຄົມມີຄວາມສະຫງົບປອດໄພ. ນອກນັ້ນ, ເຈົ້າໜ້າທີ່ວິຊາສະເພາະທຸກພາກສ່ວນຕ້ອງຝຶກຝົນຕົນເອງໃຫ້ມີຄວາມຮູ້ຄວາມສາມາດ ເພື່ອແກ້ໄຂບັນດາໜໍແໜງທີ່ສ້າງຄວາມບໍ່ສະຫງົບ ໃຫ້ວ່ອງ, ທັນການ ຖືກຕ້ອງ ແລະ ຍຸດຕິທຳ. ທັງໝົດນັ້ນກໍ່ເພື່ອຄວາມສະຫງົບສຸກຂອງປະຊາຊົນ ຄວາມເປັນລະບຽບຮ້ອຍຂອງສັງຄົມ ແລະ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ

Off

Comments are closed.