11th Mar2022

ຄະນະກຳມະການຕ້ານການຄ້າມະນຸດແຂວງອຸດົມໄຊ ສະຫຼຸບການຈັດຕັ້ງປະຕິບັດວຽກງານ ປີ 2018-2021

by Peaung Thanonkeo

ກອງປະຊຸມສະຫຼຸບຜົນການຈັດຕັ້ງປະຕິບັດວຽກງານຕ້ານການຄ້າມະນຸດປະຈໍາປີ 2018-2021 ຂອງຄະນະ ກຳມະການ ຕ້ານການຄ້າມະນຸດແຂວງອຸດົມໄຊ ໄດ້ຈັດຂື້ນໃນວັນທີ 4 ມີນາ 2022 ຢູ່ທີ່ຫ້ອງປະຊຸມຂອງຫ້ອງວ່າການປົກຄອງແຂວງ ໂດຍການເປັນປະທານຂອງທ່ານ ສົມຈິດ ປັນຍາສັກ ຮອງເຈົ້າແຂວງ, ປະທານຄະນະກໍາມະການຕ້ານການຄ້າມະນຸດຂັ້ນແຂວງ, ມີທ່ານ ພັທ ສອນວິໄລ ຕຸລາທອງ ຮອງເລຂາຄະນະພັກ ຮອງກອງບັນຊາການ ປກສ ແຂວງ, ມີຄະນະກຳມະການຕ້ານການຄ້າມະນຸດຂັ້ນແຂວງ ແລະ ຕາງໜ້າຄະນະຕ້ານການຄ້າມະນຸດ 07 ເມືອງເຂົ້າຮ່ວມ.

ໃນກອງປະຊຸມໄດ້ ສະຫຼຸບສັງລວມການຈັດຕັ້ງປະຕິບັດວຽກງານຕ້ານການຄ້າມະນຸດ ໄລຍະຜ່ານມາແຕ່(2018-2021) ແລະ ທິດທາງແຜນການ (2022 -2025) ໂດຍຍົກໃຫ້ເຫັນບັນຫາສະພາບລວມ ແລະ ການຈັດຕັ້ງປະຕິບັດວຽກງານໂດຍລວມ ແຂວງອຸດົມໄຊ ເປັນແຂວງໜຶ່ງທີ່ມີເສັ້ນທາງຜ່ານຂອງບັນດາແຂວງພາກເໜືອ ແລະ ອອກສູ່ປະເທດໃກ້ຄຽງເຊັ່ນ: ສປຈີນ ແລະ ອານາຈັກໄທ ບັນດາພື້ນຖານໂຄງລາງກໍ່ໄດ້ຮັບການພັດທະນາຢ່າງຕໍ່ເນື່ອງ ເຊີ່ງເປັນເງື່ອນໄຂອໍານວຍຄວາມສະດວກໃນຫຼາຍຊ່ອງທາງໃຫ້ແກ່ການດໍາລົງຊີວິດ, ການປະກອບອາຊີບ ພ້ອມດຽວກັນນັ້ນ ບັນຫາປະກົດການຫຍໍ້ທໍ້ຢູ່ໃນສັງຄົມກໍ່ນັບມື້ນັບເພີ່ມຂື້ນ, ເປັນຕົ້ນແມ່ນບັນຫາການຄ້າມະນຸດ, ກໍ່ແມ່ນເງື່ອນໄຂ ກໍ່ອາຊະຍາກໍາທີ່ຮ້າຍແຮງ ສົ່ງຜົນກະທົບໂດຍກົງທາງດ້ານຮ່າງກາຍ ແລະຈິດໃຈຂອງຜູ້ຖືກເຄາະຮ້າຍ, ຕໍ່ຄອບຄົວ, ຕໍ່ສັງຄົມ ແລະ ການພັດທະນາສ້າງສາປະເທດຊາດ, ບັນຫາການຄ້າມະນຸດໄດ້ເກີດຂື້ນດ້ວຍຫຼາຍຮູບແບບ, ຫຼາຍວິທີການທີ່ແຕກຕ່າງກັນ ດ້ວຍຮູບການຕົວະຍົວະຫຼອກລວງ, ດ້ວຍຮູບການໄປທ່ອງທ່ຽວ, ໄປຂາຍເຄື່ອງ, ໄປບໍລິການເສີບອາຫານ, ໄປເປັນແມ່ບ້ານ, ການໝັ້ນໝາຍແອບແຝງ ຂາດວຽກເຮັດງານທໍາ, ໄພຫວ່າງງານ ເຊື່ອຟັງຄົນງາຍ, ເຫັນແກ່ຜົນປະໂຫຍດ ແລະ ອື່ນໆ. ຕໍ່ສິ່ງຫຍໍ້ທໍ້ດັ່ງກ່າວໄດ້ແຕ່ງຕັ້ງຄະນະຮັບຜິດຊອບລົງກວດກາບັນດາຫ້າງຮ້ານທີ່ມີການບໍລິການຂາຍປະເວນີໃນທົ່ວແຂວງຈໍານວນ 10 ຄັ້ງ, ພົບເຫັນສາວຂາຍບໍລິການທາງເພດ ຈໍານວນ 112 ຄົນ ພ້ອມທັງສືກສາອົບຮົມ ແລະ ວາງມາດຕະການຕໍ່ຜູ້ລະເມີດຢ່າງເຂັ້ມງວດ,  ລະດົມໃຫ້ກັບຄືນສູ່ພູມລໍາເນົາ ກໍ່ຄືຄອບຄົວ, ໄປປະກອບອາຊີບ ຊອກວຽກເຮັດງານທໍາ ຖືກຕ້ອງຕາມລະບຽບກົດໝາຍ, ນອກນີ້ ໄດ້ລົງໂຄສະນາ ເຜີຍແຜ່ຜົນຮ້າຍຂອງການຄ້າມະນຸດໃຫ້ພໍ່ແມ່ປະຊາຊົນ ບັນດາເຜົ່າ ແລະ ນັກຮຽນ-ນັກສຶກສາ ຢູ່ແຕ່ລະສະຖາບັນການສຶກສາໄດ້ ຈໍານວນ 09 ຄັ້ງ, ມີຜູ້ເຂົ້າຮ່ວມທັງໝົດ 1.944 ຄົນ, ຍິງ 920 ຄົນ, ໃນທົ່ວແຂວງມີການລັກລອບແອບແຝງ ຂາຍບໍລິການໂສເພນີ ຈໍານວນ 140 ຮ້ານ, ໃນນີ້ຢູ່ເທດສະບານເມືອງໄຊມີ 27 ຮ້ານ, ໄດ້ຖືເອົາການຈັດຕັ້ງປະຕິບັດ ມາດຕະການທາງດ້ານກົດໝາຍຕໍ່ຜູ້ກະທໍາຜິດ ທັງເກັບກໍາຂໍ້ມູນ, ຂື້ນບັນຊີເປົ້າໝາຍ, ດໍາເນີນການກັກຕົວຜູ້ກະທໍາຜິດ ມາດໍາເນີນຄະດີຕາມລະບຽບ ກົດ   ໝາຍຢ່າງເຂັ້ມງວດ, ຜ່ານມາມີຄະດີເກີດຂື້ນທັງຫມົດ 38 ລາຍ, ຜູ້ຖືກຫາ 44 ຄົນ, ຍິງ 21 ຄົນ; ໄດ້ຮັບການແຈ້ງຄວາມ 21 ລາຍ, ຮັບຄໍາຮ້ອງຟ້ອງ 38 ສະບັບ, ຄະດີຄ້າມະນຸດ 13 ລາຍ, ຜູ້ຖືກຫາ 14 ຄົນ, ຄະດີທໍາຊໍາເລົາ 06 ລາຍ, ຜູ້ຖືກຫາ 07 ຄົນ, ຄະດີພະຍາຍາມ ທໍາຊໍາເລົາເດັກ 01 ລາຍ, ຜູ້ຖືກຫາ 01 ຄົນ, ທໍາມິດສະຈານ 11 ລາຍ, ຜູ້ຖືກຫາ 15 ຄົນ, ຄະດີທໍາຮ້າຍຮ່າງກາຍເດັກ 01 ລາຍ, ຕ້ອງຫາ 01 ຄົນ, ຄະດີລັກພາຕົວ 01 ລາຍ,ຕ້ອງຫາ 01 ຄົນ, ໄດ້ສຶກສາອົບຮົມ ແກ້ໄຂ ຂັ້ນເຈົ້າຫນ້າທີ່ 12 ລາຍ, ໃນໄລຍະ 04 ປີຜ່ານມາໄດ້ຮັບຜູ້ຖືກເຄາະຮ້າຍຈາກການຄ້າມະນຸດ ແລະ ພາກສ່ວນເຂົ້າເມືອງຜິດກົດໝາຍ ຈໍານວນ 23 ຄັ້ງ, ມີ 30 ຄົນ, ຍິງ 29 ຄົນ, ອາຍຸຕໍ່າ ກ່ວາ 18 ປີ, ມີຈໍານວນ 15 ຄົນ, ຈາກນັ້ນຄະນະກຳມາການແຕ່ລະພາກສ່ວນກໍ່ໄດ້ຜັດປ່ຽນປະກອບຄຳຄິດຄຳເຫັນດ້ວຍຫຼາຍເນື້ອໃນຢ່າງກົງໄປກົງມາເພື່ອແນໃສ່ ປັບປຸງ ແກ້ໄຂວຽກງານໃຫ້ໄດ້ຮັບປະສິດທິຜົນສູງ, ພ້ອມດຽວກັນກໍ່ໄດ້ ມອບໃບຍ້ອງຍໍຜົນງານປະເພດຕ່າງໆ ແລະ ມອບຫຼຽນກາແຮງງານໃຫ້ຄະນະກຳມະການຕ້ານການຄ້າມະນຸດແຕ່ລະພະແນກການໃນທົ່ວແຂວງຕື່ມອີກ ເປັນກຽດມອບໂດຍທ່ານ ທ່ານ ສົມຈິດ ປັນຍາສັກ ປະທານຄະນະກໍາມະການຕ້ານການຄ້າມະນຸດຂັ້ນແຂວງ.

ໂອກາດນີ້ທ່ານກໍ່ໄດ້ສະແດງຄວາມຍ້ອງຍໍຊົມເຊີຍຜົນງານທີ່ຄະນະກຳມະການຕ້ານການຄ້າມະນຸດຂັ້ນແຂວງ ແລະ ເມືອງທີ່ໄດ້ພ້ອມກັນສຸມໃສ່ເຄື່ອນໄຫວເຮັດໜ້າທີ່ວຽກງານ ຈົນປະສົບຜົນສໍາເລັດ ຫຼາຍດ້ານທີ່ຕັ້ງໜ້າ ແລະ ເນັ້ນໜັກໃຫ້ຄະນະຮັບຜິດຊອບແຕ່ລະພາກສ່ວນສືບຕໍ່ ເອົາໃຈໃສ່ລົງເລິກ ການປະສານງານຢ່າງກົມກຽວ,ຖືເອົາການ ໂຄສະນາປູກຈິດສໍານຶກໃຫ້ພໍ່ແມ່ປະຊາຊົນຢູ່ທ້ອງຖິ່ນໃຫ້ຮັບຮູ້ຜົນຮ້າຍຂອງການຄ້າມະນຸດ, ເຊື່ອມຊຶມກໍາແໜ້ນຕໍ່ແນວທາງຂອງພັກ ລະບຽບກົດໝາຍຂອງລັດຢ່າງເລິກເຊີ່ງ, ເອົາໃຈໃສ່ ພົວພັນຮ່ວມມືເຂົ້າໃນການຈັດຕັ້ງປະຕິບັດວຽກງານຕ້ານການຄ້າມະນຸດ ແຂວງອຸດົມໄຊ ໃຫ້ໜັກແໜ້ນ ເຂັ້ມແຂງ ແລະ ມີຄວາມສະຫງົບ ປອດໄພຢ່າງຕໍ່ເນື່ອງ.

Off

Comments are closed.