24th Mar2022

ທາບທາມສ້າງແຜນກໍານົດພະນັກງານນໍາພາ-ບັນຊາ ຂັ້ນກະຊວງຄຸ້ມຄອງ ໃນ 02 ຫ້ອງທີ່ຂຶ້ນກັບ ປກສ ແຂວງສະຫວັນນະເຂດ.

by somchan

ກອງປະຊຸມ ທາບທາມສ້າງແຜນກຳນົດພະນັກງານນຳພາ-ບັນຊາ ຂັ້ນກົມໃຫ່ຍການເມືອງປ້ອງກັນຄວາມສະຫງົບຄຸ້ມຄອງໃນ 02 ຫ້ອງຄື:ຫ້ອງຕຳຫຼວດ ແລະຫ້ອງສັນຕິບານ ທີ່ຂຶ້ນກັບ ປກສ ແຂວງສະຫວັນນະເຂດ ພິທີໄດ້ຈັດຂື້ນໃນວັນທີ 22-23 ມີນາ ນີ້ ໃຫ້ກຽດເຂົ້າຮ່ວມ  ມີ ພັອ ບູນເລີດ ຄະທຸມພົມ ຮອງຫົວໜ້າກອງບັນຊາການ ປກສ ແຂວງ ທັງເປັນຜູ້ຊີ້ນຳ ຫ້ອງຕຳຫຼວດ, ພັທ ກອງມີ ມຽງມະນີ ຮອງກອງບັນຊາການ ທັງເປັນຫົວໜ້າຫ້ອງສັນຕິບານ ປກສ ແຂວງ, ມີຄະນະພັກ-ຄະນະບັນຊາຫ້ອງຕຳຫຼວດ,ຫ້ອງສັນຕິບານ ພ້ອມດ້ວຍ ພະນັກງານຫຼັກແຫຼ່ງ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ພັທ ແກ້ວວິໃຈ ສີສົມພອນ ຮອງຫ້ອງການເມືອງ ປກສ ແຂວງ ໄດ້ຜ່ານມາດຖານເງື່ອນໄຂທີ່ພະນັກງານທີ່ຈະສຶບທອດປ່ຽນແທນ ໃນຕຳແໜ່ງນັບຕັ້ງແຕ່ຂັ້ນໜ່ວຍງານ ແລະ ຂັ້ນພະແນກໃຫ້ຖືກຕາມເປົ້າໝາຍເຊິ່ງມາດຖານລວມຂອງພະນັກງານນຳພາບັນຊາ ຕ້ອງມີທັດສະນະຫຼັກໝັ້ນການເມືອງໜັກແໜ້ນ,ຊີວະປະຫວັດຈະແຈ້ງ, ຕັ້ງຕໍ່ບໍລິສຸດຕໍ່ພັກ,ຕໍ່ປະເທດຊາດ ແລະ ອຸດົມການປະຕິວັດ, ຮູ້ຈັກຈຳແນກມິດ-ສັດຕູຢ່າງຈະແຈ້ງ, ມີຄວາມເປັນແບບຢ່າງໃນການຝຶກຜົນຫຼໍ່ຫຼອມຕົນເອງ, ສາມາດເຕົ້າໂຮມຄວາມສາມັກຄີ,ຜ່ານຜ່າອຸປະສັກ ແລະ ບໍ່ຫວັ່ນໄຫວຄອນຄຽນຕໍ່ສະພາບທີ່ຜັນແປຢູ່ພາຍໃນ ແລະ ສາກົນ,ມີຄຸນສົມບັດ ສິນທຳປະຕິວັດ, ແບບແຜນດຳລົງຊີວິດທີ່ປອດໃສ, ມີມາດຖານຄວາມຮູ້ຄວາມສາມາດທີ່ແນ່ນອນ,ມີແບບແຜນວິທີເຮັດວຽກຢ່າງລະອຽດ, ມີສຸຂະພາບແຂງແຮງດີ ສາມາດແບກຫາບໜ້າທີ່ວຽກງານທີ່ໄດ້ຮັບມອບໝາຍ.

ຈາກນັ້ນ ທ່ານປະທານກອງປະຊຸມ ຍັງໄດ້ຊີ້ນຳຕື່ມອີກວ່າ:ການທາບທາມ ສ້າງແຜນກໍານົດພະນັກງານນຳພາ-ບັນຊາ ໃນກຳລັງປ້ອງກັນຄວາມສະຫງົບ ເພື່ອເປັນເຈົ້າການໃນການກຳນົດເປົ້າໝາຍພະນັກງານທີ່ຈະບຳລຸງ,ກໍ່ສ້າງ, ບັນຈຸຈັດວາງເຂົ້າໃນຕຳແໜ່ງງານຕ່າງໆ, ເປັນຕົ້ນແມ່ນຕຳແໜ່ງນຳພາ-ບັນຊາ ແຕ່ລະຂັ້ນ ຢູ່ບັນດາເຫຼົ່າວິຊາສະເພາະ ມີລັກສະນະສືບທອດ-ຕໍ່ເນື່ອງ, ທັງຮັບປະກັນໃຫ້ໄດ້ພະນັກງານທີ່ມີຄວາມໜັກແໜ້ນທາງດ້ານຄຸນທາດການເມືອງ, ມີຄວາມຮູ້ຄວາມສາມາດໃນລະດັບອັນແນ່ນອນ ເປັນການກະກຽມເປົ້າໝາຍບຸກຄະລາກອນທີ່ມີລັກສະນະເປີດກວ້າງ.

Off

Comments are closed.