24th Mar2022

ສຸມໃສ່ສ້າງບ້ານນາສ້ຽວ ໃຫ້ກາຍເປັນບ້ານ ປອດຢາເສບຕິດ.

by somchan

ໃນວັນທີ 21 ມີນາ 2022, ກອງບັນຊາການ ປກສ ເມືອງນາຊາຍທອງ ຈັດກອງປະຊຸມ ເຜີແຜ່ຂໍ້ຕົກລົງວ່າດ້ວຍການແຕ່ງຕັ້ງພະນັກງານລົງກໍ່ສ້າງຮາກຖານການເມືອງ ເພື່ອສືບຕໍ່ຜັນຂະຫຍາຍວຽກງານກໍ່ສ້າງຮາກຖານການເມືອງ ເພື່ອຈັດຕັ້ງປະຕິບັດວາລະແຫ່ງຊາດ, ວ່າດ້ວຍການແກ້ໄຂບັນຫາຢາເສບຕິດ, ປະເມີນຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານນາສ້ຽວ ໂດຍການເປັນປະທານຂອງ ພັທ ກົງ ຄະນະລັງສຸກ ຫົວໜ້າກອງບັນຊາການ ປກສ ເມືອງນາຊາຍທອງ,

ເຂົ້າຮ່ວມມີ ທ່ານ ບຸນຊູ ພະວິເສດ ຮອງເລຂາພັກເມືອງ ເມືອງນາຊາຍທອງ, ພັທ ເສີມໃສ ປີຍະວົງ ຫົວໜ້າຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານການເມືອງ ປກສ ນະຄອນຫຼວງວຽງຈັນ , ມີບັນດາພະນັກງານກໍ່ສ້າງຮາກຖານການເມືອງ, ການຈັດຕັ້ງບ້ານ ແລະ ປະຊາຊົນພາຍໃນບ້ານ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມ ພັທ ບຸນສົງມູນຕີ ຮອງຫົວໜ້າກອງບັນຊາການ ປກສ ເມືອງນາຊາຍທອງ ໄດ້ຂຶ້ນຜ່ານຂໍ້ຕົກລົງ ວ່າດ້ວຍການແຕ່ງຕັ້ງພະນັກງານລົງຈັດຕັ້ງປະຕິບັດວາລະແຫ່ງຊາດ ສະກັດກັ້ນບັນຫາຢາເສບຕິດ ສ້າງ ແລະ ປະເມີນຄອບຄົວ, ບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີ ຢູ່ 65 ໜ່ວຍ 10 ຫຼັງຄາເຮືອນ ຂອງບ້ານນາສ້ຽວ.

ໂອກາດດຽວກັນ ທ່ານ ບຸນຊູ ພະວິເສດ ຮອງເລຂາພັກເມືອງ ເມືອງນາຊາຍທອງ ໄດ້ເນັ້ນໃຫ້ ພະນັກງານກໍ່ສ້າງຮາກຖານການເມືອງ ເອົາໃຈໃສ່ເກັບກຳສະຖິຕິການພັກເຊົາຂອງພົນລະເມືອງ ແກ້ໄຂການຈົດທະບຽນຂຶ້ນສຳມະໂນຄົວຢ່າງຖືກຕ້ອງຕາມລະບຽບກົດໝາຍ ຕິດພັນກັບວາລະແຫ່ງຊາດ ແລະ  ຕິດພັນກັບການສ້າງ, ປະເມີນຄອບຄົວ ແລະ ບ້ານປ້ອງກັນຄວາມສະຫງົບດີໃຫ້ໄດ້ 100%.

Off

Comments are closed.