25th Mar2022

ຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ຈັດພິທີເປີດຊຸດເຝິກອົບຮົມວິຊາສະເພາະ.

by somchan

ຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານກອງບັນຊາການ ປກສ ແຂວງຫຼວງພະບາງໄດ້ຈັດພິທີເປີດຊຸດເຝິກອົບຮົມວິຊາສະເພາະໄລຍະສັ້ນໃຫ້ແກ່ ປກສ ກຸ່ມບ້ານ 3ເມືອງຄື: ເມືອງຊຽງເງິນ,ເມືອງນານ ແລະ ເມືອງພູຄູນ, ໃນທ້າຍອາທິດທີ່ຜ່ານມານີ້ ຢູ່ທີ່ສະໂມສອນເມືອງຊຽງເງິນ ໂດຍພາຍໃຕ້ການເປັນປະທານຂອງທ່ານ ສົມແວວເພັດ ດວງປະສິດ ກຳມະການພັກແຂວງ ເລຂາພັກເມືອງ ເຈົ້າເມືອງຊຽງເງິນ, ມີ ພັອ ລີຊວາ ໄຊຍະຊ່າງ ຮອງກົມຄຸ້ມຄອງສຳມະໂນຄົວແລະກໍ່ສ້າງຮາກຖານ, ມີທ່ານ ພັອ ທາ ລຽນປະດິດ ຮອງກອງບັນຊາການ ປກສ ແຂວງຫຼວງພະບາງ, ມີແຂກຖືກເຊີນ ແລະ ນັກສຳມະນາກອນເຂົ້າຮ່ວມ.

ພັທ ບຸນແພງ ພົມສະຫວັດ ຮອງຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ໄດ້ຜ່ານຂໍ້ຕົກລົງຂອງກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງ ປກສ ກຸ່ມບ້ານ ເຂົ້າຮ່ວມເຝິກອົບຮົມ ແລະ ຜ່ານແຜນເຝິກອົບຮົມ, ເຊິ່ງການເຝິກອົບຮົມໃນຄັ້ງນີ້ ໄດ້ກຳນົດເວລາ 5 ວັນ ແຕ່ວັນທີ່ 21 – 25  ມີນາ 2022, ໂອກາດດຽວກັນນີ້ ພັອ ລີຊວາ ໄຊຍະຊ່າງ ຮອງກົມຄຸ້ມຄອງສຳມະໂນຄົວແລະກໍ່ສ້າງຮາກຖານ ໄດ້ມີຄຳເຫັນຊີ້ນຳວຽກງານວິຊາສະເພາະຂອງ ປກສ ກຸ່ມບ້ານ ທ່ານໄດ້ເນັ້ນໃຫ້ເອົາໃຈໃສ່ຄຸ້ມຄອງຕິດຕາມການເຂົ້າອອກ ຂອງປະຊາຊົນ ແລະ ຄົນຕ່າງປະເທດທີ່ມາພັກເຊົາ, ຕິດຕາມການຂຶ້ນທະບຽນ, ລົງເກັບກຳສະຖິຕິຂອງປະຊາຊົນທີ່ເຂົ້າມາເຮັດວຽກຢູ່ພາຍໃນເມືອງ,  ເອົາໃຈໃສ່ສະກັດກັ້ນ ແລະ ແກ້ໄຂບັນຫາໄພສັງຄົມເປັນຕົ້ນແມ່ນການລັກຊັບຂອງປະຊາຊົນ ແລະ ບັນຫາຢາເສບຕິດ ເພື່ອຫຼຸດຜ່ອນການກໍ່ອາດຊະຍະກຳຂອງກຸ່ມແກ້ງຄົນບໍ່ດີ.

ແລະ ທ່ານສົມແວວເພັດ ດວງປະສິດ ກຳມະການພັກແຂວງ ເລຂາພັກເມືອງ ເຈົ້າເມືອງຊຽງເງິນ ກໍ່ໄດ້ເນັ້ນໃຫ້ແກ່ຄະນະພັກຄະນະບັນຊາເອົາໃຈໃສ່ສຶກສາອົບຮົມວຽກງານການເມືອງນຳພາແນວຄິດ ໃຫ້ນາຍແລະພົນຕຳຫຼວດທີ່ຢູ່ໃນຄວາມຮັບຜິດຊອບຂອງຕົນໃຫ້ເປັນປົກກະຕິ ແລະ ນຳພາປະຕິບັດໜ້າທີວຽກງານ ດ້ວຍຄວາມຮັບຜິດຊອບສູງ, ພ້ອມທັງລົງໃກ້ຊິດຕິດ ແທດກັບນາຍ ແລະ ພົນຕຳຫຼວດ ແລະ ປະຊາຊົນບັນດາເຜົ່າທີ່ຢູ່ເຂດຫ່າງໄກສອກຫຼີກ, ນໍາພາ ປກສ ບ້ານປະຕິບັດຕາມພາລະບົດບາດ,ສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງເພື່ອເຮັດໃຫ້ເມືອງຊຽງເງິນ,ເມືອງນານ ແລະ ເມືອງພູຄູນ ມີຄວາມສະຫງົບແລະປອດໄພ 100% .

 

 

 

 

Off

Comments are closed.