25th Mar2022

ກຸ່ມຫນອງຫນ້ຽວ ມ້າງກຸ່ມມົວສຸມຢາເສບຕິດ.

by somchan

ພັທ ຄຳຊ່ຽນ ມະນີວົງ  ຫົວໜ້າ ປກສ ກຸ່ມໜອງໜ້ຽວ ໃຫ້ຮູ້ວ່າ: ພາຍຫຼັງໄດ້ຮັບການລາຍງານຈາກອຳນາດການປົກຄອງບ້ານໜອງແຕ່ງ ເມືອງສີໂຄດຕະບອງ ນະຄອນຫຼວງວຽງຈັນ ວ່າມີກຸ່ມຄົນຈຳນວນໜຶ່ງນຳໃຊ້ຫ້ອງແຖວເປັນບ່ອນມົ້ວສຸມເສບຢາເສບຕິດ, ຈາກນັ້ນ, ວັນທີ 17 ມີນາ 2022 ປກສ ກຸ່ມ ໜອງໜ້ຽວ ໄດ້ສົມທົບກັບອຳນາດການປົກຄອງບ້ານ, ກຳລັງ ປກຊ-ປກສ ບ້ານເຂົ້າແກ້ໄຂ, ສາມາດກັກຕົວເປົ້າໝາຍໄດ້ທັງໝົດ 12 ຄົນ, ຍິງ 1 ຄົນ ພ້ອມຂອງກາງຢາບ້າ 421 ເມັດ.

ຜ່ານການກວດກາ ພົບເຫັນຢາບ້າ 338 ເມັດ, ຢູ່ກັບທ້າວ ຄໍາຮັກ ອາຍຸ 25 ປີ ອາຊີບກຳມະກອນ ຢູ່ບ້ານ ໜອງແຕ່ງເໜືອ ແລະ ພົບເຫັນອີກ 83 ເມັດຢູ່ກັບທ້າວ ຈອນ ອາຍຸ 29 ປີ ຢູ່ບ້ານໜອງແຕ່ງໃຕ້; ຜ່ານການສອບສວນ ຂອງເຈົ້າໜ້າທີ່ໃຫ້ຮູ້ວ່າ: ພວກກ່ຽວທັງສອງໄດ້ຮວ່ມກັນຄ້າຂາຍ ແລະ ເສບຢາເສບຕິດ ມາແຕ່ປີ 2019 ໂດຍຊື້ມາຈາກຊາຍຄົນໜຶ່ງບໍ່ຮູ້ທີ່ຢູ່.

ຕໍ່ກັບຄະດີດັ່ງກ່າວເຈົ້າໜ້າທີ່ໄດ້ນຳສົ່ງຕົວພວກກ່ຽວທັງ 2 ຄົນໃຫ້ກອງຄະດີ ປກສ ເມືອງສີໂຄດຕະບອງ ນະຄອນຫຼວງວຽງຈັນ ສືບຕໍ່ດຳເນີນຄະດີຕາມກົດໝາຍ.

ສ່ວນອີກ 9 ຄົນ, ຍິງ 1 ຄົນ, ເຈົ້າໜ້າທີ່ກວດຄົ້ນຕົວບໍ່ພົບຢາເສບຕິດ ຈິ່ງໄດ້ນໍາຕົວພວກກ່ຽວມາສຶກສາອົບຮົມກ່າວເຕືອນ ໃຫ້ຮັບຮູ້ເຖິງພິດໄພຜົນຮ້າຍຂອງຢາເສບຕິດ ແລະ ໃຫ້ຢຸດເຊົາ ຫຼືປັບປ່ຽນພຶດຕິກຳທີ່ບໍ່ດີ ແລະ ໄດ້ສົ່ງໄປບຳບັດປິ່ນປົວ ຢູ່ສູນປິ່ນປົວ ແລະ ຝຶກວິຊາຊີບຜູ້ຕິດຢາເສບຕິດ ສົມສະຫງ່າ 1 ຄົນ ເນື່ອງຈາກເປັນເປົ້າໝາຍເກົ່າທີ່ບໍ່ມີການປ່ຽນແປງພຶດຕິກຳ; ສວ່ນອີກ8 ຄົນ, ຍິງ 1 ຄົນ ໄດ້ເຮັດບົດບັນທຶກແລ້ວມອບໃຫ້ຜູ້ປົກຄອງ ແລະ ການຈັດຕັ້ງບ້ານສືບຕໍ່ສຶກສາອົບຮົມໃຫ້ກາຍເປັນພົນລະເມືອງດີຂອງສັງຄົມຕໍ່ໄປ.

Off

Comments are closed.