11th Nov2015

ລັດຖະມົນຕີວ່າການກະຊວງ ປກສ ຕ້ອນຮັບການເຂົ້າຢຽມຂ່ຳນັບຂອງຄະນະ ກອງບັນຊາການຕຳຫຼວດແຂວງຢູນານ ສປຈີນ.

by somchan

ພົນຈັດຕະວາ ສົມແກ້ວ ສີລາວົງ ລັດຖະມົນຕີ ວ່າການກະຊວງປ້ອງກັນຄວາມສະຫງົບ ໄດ້ຕ້ອນຮັບການເຂົ້າຢຽມຂ່ຳນັບຂອງທ່ານ ຈ່າງ ຖ່າຍ ຢວນ ຮອງເຈົ້າແຂວງ ຫົວໜ້າກອງບັນຊາການຕຳຫຼວດແຂວງຢູນານ ສາທາລະນະລັດ ປະຊາຊົນຈີນ ພ້ອມດ້ວຍຄະນະ ໃນວັນທີ 8 ພະຈິກ 2015 ນີ້ທີ່ຫ້ອງຮັບແຂກກະຊວງປ້ອງກັນຄວາມສະຫງົບ. ໃນໂອກາດທີ່ເຂົ້າຮ່ວມກອງປະຊຸມວຽກງານປ້ອງກັນຄວາມສະຫງົບ ຮ່ວມກັບກອງບັນຊາການແຂວງ 5 ແຂວງພາກເໜືອຂອງລາວ ໃນລະຫວ່າງວັນທີ 9-10 ພະຈິກ 2015 ນີ້. ໃນໂອກາດທີ່ຄະນະດັ່ງກ່າວມາພົບປະ ແລະ ຢຽມຂ່ຳນັບໃນຄັ້ງນີ້ ພົຈວ ສົມແກ້ວ ສີລາວົງ ລັດຖະມົນຕີວ່າການກະຊວງປ້ອງກັນຄວາມສະຫງົບ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄ່າສູງຕໍ່ການພົບປະເຂົ້າຢຽມຂ່ຳນັບໃນຄັ້ງນີ້ ເຊິ່ງເປັນບາດກ້າວສຳຄັນໃນການເສີມຂະຫຍາຍການພົວພັນຮ່ວມມືຄວາມສາມັກຄີຮັກທີ່ມີມາແຕ່ດົນນານຂອງສອງກັນກຳລັງກໍ່ຄືກຳລັງປ້ອງກັນຄວາມສະຫງົບລາວ ແລະ ກຳລັງຕຳຫຼວດ ສປຈີນ ພ້ອມນີ້, ລັດຖະມົນຕີວ່າການກະຊວງປ້ອງກັນຄວາມສະຫງົບລາວກໍ່ໄດ້ສະແດງຄວາມຂອບໃຈຕໍ່ພັກ-ລັດຖະບານຈີນ ແລະ ກະຊວງຕຳຫຼວດສັນຕິບານ ສປຈີນ ທີ່ໄດ້ໃຫ້ການຊ່ວຍເຫຼືອໃນໄລຍະຜ່ານມາໃຫ້ແກ່ກະຊວງປ້ອງກັນຄວາມສະຫງົບລາວ.

ພ້ອມດຽວກັນນີ້ຄະນະຜູ້ແທນທັງສອງຝ່າຍກໍ່ໄດ້ພົບປະໂອ້ລົມກັນຫຼາຍບັນຫາໂດຍສະເພາະການສືບຕໍ່ພົວພັນຮ່ວມມືກັນໃນການຮັກສາຄວາມສະຫງົບ ຄວາມເປັນລະບຽບຮ້ອຍຮຽບຕາມຊາຍແດນລະຫວ່າງສອງປະເທດລາວຈີນ ໃຫ້ມີຄວາມສະຫງົບເປັນລະບຽບຮຽບຮ້ອຍເປັນຕົ້ນການສະກັດກັ້ນອາຊະຍາກຳຂ້າມຊາດ, ການຄ້າມະນຸດ, ການຄ້າ-ຂາຍຢາເສບຕິດ, ການໂຈລະກຳທາງອິນເດີເນັດ ການລັກລອບເຂົ້າເມືອງບໍ່ຖືກຕ້ອງຕາມລະບຽບກົດໝາຍຂອງສອງປະເທດສືບຕໍ່ພົວພັນຮ່ວມມືຊ່ວຍເຫຼືອເຊິ່ງກັນແລະກັນໃນວຽກງານວິຊາສະເພາະ ແລະ ວຽກງານຕ່າງໆ ໂອກາດດຽວກັນນີ້ ທ່ານ ຈ່າງ ຖາຍ ຢວນ ຮອງເຈົ້າແຂວງ, ຫົວໜ້າກອງບັນຊາການຕຳຫຼວດແຂວງຢູນານ ສປຈີນ ໄດ້ສະແດງຄວາມຂອບໃຈຕໍ່ລັດຖະມົນຕີວ່າການກະຊວງປ້ອງກັນຄວາມສະຫງົບລາວ ທີ່ໄດ້ໃຫ້ການຕ້ອນຮັບອັນອົບອຸ່ນດ້ວຍຄວາມສາມັກຄີຮັກແພງ ແລະ ຈະສືບຕໍ່ນຳເອົາເນື້ອການພົບປະໃນຄັ້ງນີ້ນຳໄປຈັດຕັ້ງປະຕິບັດຮ່ວມມືກັບກອງບັນຊາການແຂວງພາກເໜືອນຂອງລາວໃຫ້ມີໝາກຜົນ ແລະ ແໜ້ນແຟ້ນຍິ່ງໆຂຶ້ນ.

Off

Comments are closed.