30th Mar2022

ມອບ-ຮັບດ່ານປະເພນີປ່າຈາ ແລະ ດ່ານແມງກົວຜົງ ຂຶ້ນກັບ ປກສ ເມືອງຍອດອູ

by somda phoneor

ພິທີມອບ-ຮັບດ່ານປະເພນີ ດ່ານປ່າຈາ ແລະ ດ່ານແມງກົວຜົງ ລະຫວ່າງ ກອງບັນຊາການ ປກສ ແຂວງ ກັບ ກອງບັນຊາການ ປກສ ເມືອງຍອດອູ ແຂວງຜົ້ງສາລີ ຈັດຂຶ້ນໃນໃນທ້າຍອາທິດຜ່ານມານີ້ ເປັນກຽດເຂົ້າຮ່ວມມີ ທ່ານ ສົມຫວັງ ສຸມວິໄລ ເຈົ້າເມືອງຍອດອູ ແລະ ພັທ ບົວເງິນ ສີທິວົງ ຮອງຫົວໜ້າກອງບັນຊາການ ປກສ ແຂວງ ຜົ້ງສາລີ, ມີບັນດາທ່ານຕາງໜ້າຈາກພະແນກການທີີ່ກ່ຽວຂ້ອງ ແລະ ຄະນະພັກ-ຄະນະບັນຊາ ຕະຫຼອດຮອດພາກສ່ວນກ່ຽວຂ້ອງ ເຂົ້າຮ່ວມ.

ໃນພິທີ, ພັທ ບຸນສຸກ ອິນທະພັນແສງ ຮອງຫົວໜ້າຫ້ອງການເມືອງ ປກສ ແຂວງ ໄດ້ຜ່ານຂໍ້ຕົກລົງຂອງ ກອງບັນຊາການ ປກສ ແຂວງ ວ່າດ້ວຍການໂອນດ່ານປະເພນີ ຂຶ້ນກັບ ປກສ ເມືອງຍອດອູ ແລະ ຜ່ານຂໍ້ຕົກລົງວ່າດ້ວຍການມອບ-ໂອນນາຍ ແລະ ພົນຕໍາຫຼວດ ປະຈໍາດ່ານປະເພນີໃຫ້ ປກສ ເມືອງຍອດອູ, ຜ່ານມະຕິຕົກລົງຂອງ ອົງຄະນະພັກ ກອງບັນຊາການ ປກສ ແຂວງ ວ່າດ້ວຍການໂອນບັນດາໜ່ວຍພັກດ່ານ ຕມ ທີ່ຂຶ້ນກັບ ຄະນະພັກຮາກຖານຫ້ອງສັນຕິບານ ໄປຂຶ້ນກັບ ຄະນະພັກກອງບັນຊາການ ປກສ ເມືອງ ແລະ ຂໍ້ຕົກລົງຂອງ ຄະນະຮາກຖານຊາວໜຸ່ມ ປກສ ແຂວງ ວ່າດ້ວຍການມອບໂອນໜ່ວຍຊາວໜຸ່ມດ່ານປ່າຈາ ແລະ ດ່ານແມງກົວຜົງ ຂຶ້ນກັບ ຄະນະຮາກຖານຊາວໜຸ່ມ ປກສ ເມືອງຍອດອູ.

ໃນໂອກາດນີ້, ພັຕ ເພັດທະວົງ ເມົ້າສົມພູ ຮອງຫົວໜ້າຫ້ອງສັນຕິບານ ປກສ ແຂວງ ໄດ້ຂຶ້ນຜ່ານບົດບັນທຶກມອບ-ຮັບດ່ານປະເພນີ (ດ່ານປ່າຈາ ແລະ ດ່ານແມງກົວຜົງ) ລະຫວ່າງ ກອງບັນຊາການ ປກສ ແຂວງ ກັບ ກອງບັນຊາການ ປກສ ເມືອງຍອດອູ. ຈາກນັ້ນ, ໄດ້ມີການເຊັນບົດບັນທຶກມອບ-ຮັບຢ່າງເປັນທາງການ ເຊິ່ງຕາງໜ້າກອງບັນຊາການ ປກສ ແຂວງ ໂດຍ ພັທ ບົວເງິນ ສີທິວົງ ຮອງຫົວໜ້າກອງບັນຊາການ ປກສ ແຂວງ ແລະ ຕາງໜ້າກອງບັນຊາການ ປກສ ເມືອງ ໂດຍ ພັທ ລີ ປັນແກ້ວ ຫົວໜ້າກອງບັນຊາການ ປກສ ເມືອງຍອດອູ, ໂດຍມີ ທ່ານ ສົມຫວັງ ສຸມວິໄລ ເຈົ້າເມືອງຍອດອູ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຄີພິຍານ.

Off

Comments are closed.