31st Mar2022

ກົມຄົ້ນຄວ້າວິທະຍາສາດ ແລະ ປະຫວັດສາດຈັດຕັ້ງປາຖະກະຖາ ວັນສ້າງຕັ້ງກຳລັງ ປກສ ຄົບຮອບ 61 ປີ.

by somchan

ໃນວັນທີ 30 ມີນາ 2022 ນີ້ ກົມຄົ້ນຄວ້າວິທະຍາສາດ ແລະ ປະຫວັດສາດ ໄດ້ຈັດຕັ້ງປາຖະກະຖາ ວັນສ້າງຕັ້ງກຳລັງ ປກສ ຄົບຮອບ 61 ປີ, ເຂົ້າຮ່ວມ ແລະ ປາຖະກະຖາໂດຍ ພັອ ບັນເທົາ ພົມພິສານ ຮອງຫົວໜ້າກົມກົມຄົ້ນຄວ້າວິທະຍາສາດ ແລະ ປະຫວັດສາດ ມີ ພະນັກງານຫຼັກແຫຼ່ງ ພະນັກງານນັກຮົບພາຍໃນກົມຄົ້ນຄວ້າວິທະຍາສາດ ແລະ ປະຫວັດສາດເຂົ້າຮ່ວມຮັບຟັງ.

ເພື່ອເສີມຂະຫຍາຍທາດແທ້ ແລະ ມູນເຊື້ອພິລະອາດຫານຂອງກໍາລັງ ປກສ ໃຫ້ພະນັກງານ-ນັກຮົບຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບຄວາມໝາຍຄວາມສຳຄັນ ຂອງວັນສ້າງຕັ້ງກຳລັງ ປ້ອງກັນຄວາມສະຫງົບປະຊາຊົນ ຊຶ່ງເປັນວັນທີ່ມີຄວາມໝາຍ ຄວາມສຳຄັນທີ່ສຸດ ສຳລັບສະມາຊິກພັກ, ພະນັກງານ-ນັກຮົບໃນກຳລັງປ້ອງກັນຄວາມສະຫງົບ ປະຊາຊົນເປັນກຳລັງ ທີ່ໄວ້ເນື້ອເຊື່ອໃຈຂອງພັກ, ເປັນກຳລັງທີ່ຮັບປະກັນ ຄວາມສະຫງົບໃນຊາດ, ​ສະກັດກັ້ນອາຊະຍະກຳ, ຮັກສາຄວາມເປັນ ລະບຽບຮຽບຮ້ອຍ ຂອງສັງຄົມ. ຕະຫລອດໄລຍະແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວ ຂອງກຳລັງປ້ອງກັນຄວາມສະຫງົບ ແມ່ນໄດ້ມີຜົນງານ ພົ້ນເດັ່ນຫລາຍດ້ານ ເຊິ່ງໄດ້ປະກອບສ່ວນສຳຄັນເຂົ້າ ໃນພາລະກິດຕໍ່ສູ້ກູ້ຊາດ, ກໍຄືໄລຍະປົກປັກຮັກສາ ແລະ ພັດທະນາປະເທດຊາດ ໃນໄລຍະໃໝ່ຕາມທິດສັງຄົມນິຍົມ.

ກຳລັງປ້ອງກັນຄວາມສະຫງົບ ປະຊາຊົນລາວ ແມ່ນກຳລັງປະກອບອາວຸດ ປະຕິວັດຂອງພັກ, ໂດຍແມ່ນພັກປະຊາຊົນ ປະຕິວັດລາວ ເປັນຜູ້ສ້າງຕັ້ງ, ນຳພາເດັດ ຂາດໂດຍກົງ ແລະ ຮອບດ້ານ; ເປັນກຳລັງ ທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ຍາມໃດກໍ່ຮັບໃຊ້ປະຊາຊົນ ຢ່າງບໍ່ມີຂອບເຂດ ແລະ ເງື່ອນໄຂ; ທັງເປັນ ກຳລັງປະກອບອາວຸດ ປະຕິວັດທີ່ມີລະບຽບວິໄນເຂັ້ມງວດ, ເວລາໃດ ແລະ ໃນສະຖານະການໃດກໍເດັດດ່ຽວ, ເດັດຂາດຕໍ່ສັດຕູ.

ກຳລັງ ປກສ ສືບທອດມູນເຊື້ອ ອັນພິລະອາດຫານບໍ່ຍອມຈຳນົນ. ນັບແຕ່ມື້ກຳເນີດເກີດຂຶ້ນມາທັງສູ້ຮົບ, ທັງປັບປຸງກໍ່ສ້າງຕົນເອງໂດຍໄດ້ຮັບ ການອົບຮົມສັ່ງສອນຈາກພັກ ປະຊາຊົນ ປະຕິວັດລາວ ແລະ ການອູ້ມຊູລ້ຽງດູ ຊ່ວຍເຫລືອຂອງປະຊາຊົນລາວບັນດາເຜົ່າ. ກຳລັງປ້ອງກັນຄວາມສະຫງົບ ສາມາດເສີມຂະຫຍາຍມູນເຊື້ອຕໍ່ສູ້ພິລະອາດຫານຂອງຊາດຂຶ້ນສູ່ລະດັບໃໝ່ ແລະ ຄຸນນະພາບໃໝ່, ສ້າງໄດ້ມູນເຊື້ອ ອັນສະຫງ່າງາມຫລາຍປະການ.

 

Off

Comments are closed.