12th Apr2022

ສະເຫຼີມສະຫຼອງບຸນປີໃຫມ່ລາວ ໃຫ້ມີບັນຍາກາດມ່ວນຊື່ນ ແລະ ສະຫງົບ-ປອດໄພ.

by somda phoneor

ການສະເຫຼີມສະຫຼອງບຸນປີໃຫມ່ລາວ ແມ່ນປາງບຸນໃຫຍ່ຂອງງານບຸນປະເພນີ ຕາມຮີດ 12 ທີ່ຊາວລາວ ໄດ້ມີການສືບທອດປະຕິບັດກັນມາແຕ່ບູຮານນະການໃນທຸກໆປີ; ສຳລັບການສະເຫຼີມສະຫຼອງບຸນປີໃຫມ່ລາວໃນປີນີ້ແມ່ນຈະເລີ່ມແຕ່ມື້ຂຶ້ນ 13 ຄໍ່າ ຫາ ມື້ຂຶ້ນ 15 ຄໍ່າ ເດືອນ 5 ຂອງປີປະຕິທິນ ທາງສຸລິຍະຄະຕິ ຄືການສະເຫຼີມສະຫຼອງສົ່ງທ້າຍປີ ພຸດທະສັງກາດ 2564 ແລະ ຕ້ອນຮັບປີໃຫມ່ ພຸດທະສັງກາດ 2565; ເຊິ່ງກົງກັບລະຫວ່າງ ວັນພະຫັດ ທີ 14 ຫາ ວັນເສົາ ທີ 16 ເມສາ  ຄິດຕະສັງກາດ 2022; ເພື່ອປົກປັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາທີ່ເປັນເອກະລັກ ແລະ ຮີດຄອງປະເພນີອັນດີງາມຂອງຊາດ ໃຫ້ຄົງຢູ່ກັບຊາດລາວ ແລະ ຄົນລາວ. ເຊິ່ງການສະເຫຼີມສະຫຼອງບຸນປີໃຫມ່ລາວ ໃນປີຜ່ານມາແມ່ນໄດ້ຮັບອະນຸຍາດໃຫ້ຈັດສະເພາະແຕ່ຢູ່ພາຍໃນຄອບຄົວເທົ່ານັ້ນ; ສ່ວນກິດຈະກຳອື່ນໆ ທີ່ຈະມີຄົນເຕົ້າໂຮມກັນເປັນຈຳນວນຫຼາຍແມ່ນບໍ່ໄດ້ຮັບອະນຸຍາດໃຫ້ຈັດເດັດຂາດ ເພື່ອປະຕິບັດມາຕະການປ້ອງກັນ, ສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19; ເຊິ່ງກ່ອນອື່ນກໍຕ້ອງສະແດງຄວາມຂອບໃຈມາຍັງທຸກຄົນໃນສັງຄົມທີ່ມີຄວາມຕື່ນຕົວ; ໃຫ້ຄວາມຮ່ວມມືໃນການຈັດຕັ້ງປະຕິບັດຕາມຄຳສັ່ງ ແລະ ມາດຕະການຕ່າງໆ ໂດຍສະເພາະແມ່ນອຳນາດການປົກຄອງແຕ່ລະບ້ານ ທີ່ສາມາດສຶກສາອົບຮົມ, ໄດ້ເປັນເຈົ້າການຄຸ້ມຄອງລູກຫຼານ ແລະ ປະຊາຊົນຢູ່ພາຍໃນບ້ານຂອງຕົນເອງໄດ້ເປັນຢ່າງດີ; ສິ່ງສໍາຄັນນັ້ນ ກໍຄືສາມາດຮັບປະກັນເຮັດໃຫ້ສັງຄົມມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.

ສຳລັບ ການສະເຫຼີມສະຫຼອງບຸນປີໃຫມ່ລາວ ໃນປີນີ້ ເນື່ອງຈາກວ່າ ພະຍາດ COVID-19 ຍັງສືບຕໍ່ມີການແຜ່ລະບາດ. ສະນັ້ນ, ການຈັດງານສົ່ງທ້າຍປີເກົ່າ  ແລະ ຕ້ອນຮັບປີໃຫມ່ລາວ ຢູ່ຂອບເຂດທົ່ວປະເທດ ຕ້ອງຖືເອົາການປ້ອງກັນ, ຄວບຄຸມ ແລະ ແກ້ໄຂການ ລະບາດຂອງພະຍາດ COVID-19 ເປັນສໍາຄັນ, ແຕ່ກໍ່ໃຫ້ມີບັນຍາກາດເບີກບານມ່ວນຊື່ນ, ມີຄວາມສາມັກຄີ, ມີໄມຕີຈິດມິດຕະພາບຕໍ່ກັນ ຮັກສາໄດ້ວັດທະນະທໍາ, ຮີດຄອງປະເພນີ, ຂະນົບທໍານຽມອັນດີງາມຂອງຊາດ, ຮັບປະກັນໄດ້ຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍ ຢູ່ໃນສັງຄົມ. ເຊັ່ນ: ໃຫ້ສົ່ງເສີມວັດທະນະທໍາຮີດຄອງປະເພນີອັນດີງາມຂອງຊາດລາວ ຄື: ການພົບປະສັງສັນ ແລະ ບາສີສູ່ຂວັນພາຍໃນຄອບຄົວ, ການຫົດນໍ້າອວຍພອນໄຊໃຫ້ຜູ້ອາວຸໂສ, ເຊິ່ງກັນ ແລະ ກັນ, ການເຂົ້າວັດຫົດສົງພຣະພຸດທະຮູບ, ຕົບພະທາດຊາຍ ແລະ ກິດຈະກໍາປິ່ນອ້ອມອື່ນໆ, ແຕ່ບໍ່ໃຫ້ຈັດງານຄອນເສີດ ແລະ ງານຕະຫຼາດນັດໃຫຍ່ໂຕ. ຢ່າງໃດກໍຕາມ ສັງຄົມລາວບໍ່ວ່າຈະເປັນງານໃດໆກໍມີການພົບປະສັງສັນການດື່ມສິ່ງມຶນເມົາ ແຕ່ທຸກຄົນຈົ່ງຫຼິ້ນກິນຢ່າງມີສະຕິ ຢ່າໂລດໂຜນເກີນໄປ, ຫຼິ້ນໃຫ້ມີຄວາມພໍເຫມາະພໍດີ ແລະ ຮັບປະກັນຄວາມສະຫງົບປອດໄພ ຄວາມເປັນລະບຽບຮຽບຮ້ອຍໃນສັງຄົມ.

ຜ່ານມາ ການສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່ລາວ ໃນຂອບເຂດທົ່ວປະເທດ ຍັງມີຫຼາຍດ້ານ ທີ່ຍັງບໍ່ທັນສອດຄອງກັບກັບກົດໝາຍ ແລະ ຮີດຄອງປະເພນີອັນດີງາມຂອງລາວ ເປັນຕົ້ນແມ່ນ ດື່ມສິ່ງມຶນເມົາແລ້ວຂັບຂີ່ລົດ, ຫຼິ້ນສິ່ງເປີເປື້ອນ ແລະ ລາມົກອະນາຈານເຊັ່ນ: ນໍ້າສີ, ນໍ້າເປື້ອນ ນໍ້າຄັນ ແກວ່ງຖົງນໍ້າ ແກວ່ງນໍ້າກ້ອນໃສ່ກັນ, ນຸ່ງເຄື່ອງໂປ້ເປືອຍເຂົ້າວັດ ແລະ ສະຖານທີ່ຊຸມຊົນ, ບາງຈຸດມີການກາງເຕັ້ນ, ຕັ້ງໂຕະ, ຕັ່ງ ແລະ ອື່ນໆ ຕັນທາງການສັນຈອນຕາມເສັ້ນທາງແລ້ວລັດລົດຫົດນໍ້າຢູ່ເສັ້ນທາງ, ເປີດສຽງດົນຕີເນືອງນັນລົບກວນຜູ້ອື່ນ ແລະ ກາຍກຳນົດເວລາ; ນອກນີ້, ຍັງມີບາງປະກົດການຫຍໍ້ທໍ້ທີ່ເກີດຂຶ້ນ ເຊິ່ງພວກຄົນບໍດີ ມັກສວຍໂອກາດໄລຍະນີ້ເຄື່ອນໄຫວກໍ່ເຫດ ເປັນຕົ້ນແມ່ນ: ບັນຫາຄາດຕະກໍາ, ດຶງສາຍຄໍ, ງັດແງລັກຊັບຢູ່ຕາມເຮືອນປະຊາຊົນ, ຫອ້ງເຊົ່າ, ເຮືອນພັກ, ໂຮງແຮມ, ການປຸ້ນຈີ້ຊິງຊັບ, ການເກີດອຸປະຕິເຫດຢູ່ຕາມເສັ້ນທາງຕ່າງໆ. ເຊິ່ງສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ. ດັ່ງນັ້ນ ບໍ່ວ່າຈະເປັນການໄປ-ມາ ຫຼື ຢູ່ເຮືອນຊານບ້ານຊ່ອງ ກໍ່ຕອ້ງມີສະຕິລະວັງຕົວໃນການຮັກສາຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮອ້ຍ,

ຄື: ທຸກພາກສ່ວນ ທຸກຊັ້ນຄົນ ຕອ້ງມີສະຕິເປັນເຈົ້າການມຽ້ນມັດປົກປັກຮັກສາວັດຖຸສັບສິນຢູ່ໃນສຳນັກງານອົງການ, ຮ້ານຄ້າ, ເຮືອນ, ຊັບສິນທີ່ຕິດໂຕ ແລະ ອື່ນໆ ນອກຈາກນັ້ນການນໍາໃຊ້ຟືນໄຟແຕ່ງຢູ່ຄົວກິນ ຫຼື ໄຕ້ທູບທຽນບູຊາ ຢູ່ຕາມເຮືອນຊານບ້ານຊອ່ງ, ຕ້ອງມີຄວາມຮັບປະກັນ, ມີການກວດກາຕິດຕາມ ແລະ ດັບມອດຄັກແນ່ເພື່ອປອ້ງກັນການເກີດອັກຄີໄພ, ພອ້ມດຽວກັນນີ້ການນຳໃຊ້ລົດໃຊ້ຖະໜົນເດີນທາງໄປມາຕາມເສັ້ນທາງຕ່າງໆ ຕອ້ງໄດ້ປະຕິບັດກົດລະບຽບຈະລາຈອນ ແລະ ຫຼັກການຂັບຂີ່ປອດໄພຢ່ງເຂັ້ມງວດ, ບໍ່ຄວນຂັບຂີ່ລົດໃນເວລາມືນເມົາ, ຂັບລົດເປັນພຶ່ງເປັນແພ ກີດຂວາງການສັນຈອນ, ນອກນີ້ ການນຸ່ງຖືເອ້ຢອ້ງຕອ້ງມີຄວາມເປັນລະບຽບຮຽບຮອ້ຍຈົບງາມ ຖືກຕອ້ງຊອດຄອ່ງກັບວັດທະນາທຳຮີດຄອງປະເພນີອັນດີງາມຂອງຊາດ. ໂດຍສະເພາະແມ່ນຕ້ອງໄດ້ເອົາໃຈໃສ່ປະຕິບັດຄຳແນະນຳ ແລະ ຂໍ້ຫ້າມຕ່າງໆ ທີ່ການຈັດຕັ້ງວາງອອກ ເຊັ່ນ: ແຕ່ລະຄົນ, ຄອບຄົວ, ສຳນັກງານ, ອົງການ, ໂຮງຈັກ, ໂຮງງານ, ໂຮງຮຽນ, ໂຮງຫມໍ, ເລົ້າສາງ, ກົມກອງທະຫານ, ກົມກອງຕໍາຫຼວດ, ການຈັດຕັ້ງສາກົນ ແລະ ການຈັດຕັ້ງການຈັດຕັ້ງສັງຄົມ ໃຫ້ມີສະຕິເຄົາລົບປະຕິບັດຕາມລັດຖະທໍາມະນູນ, ກົດຫມາຍຢ່າງເຂັ້ມງວດ;  ຍົກສູງສະຕິລະວັງຕົວ, ປົກປັກຮັກສາຊັບສົມບັດຂອງຕົນ; ເອົາໃຈໃສ່ເຮັດຫນ້າທີ່ປ້ອງກັນເວນຍາມສໍານັກງານ, ກຸ່ມບ້ານ ແລະ ບ້ານ ເພື່ອຮັບປະກັນຄວາມສະຫງົບປອດໄພ ພາຍໃນເຂດຄວບຄຸມຂອງຕົນ; ເປັນເຈົ້າການມີສະຕິເຄົາລົບ ແລະ ປະຕິບັດບັນດາຂໍ້ຫ້າມຕ່າງໆຢ່າງເຂັ້ມງວດ ເຊັ່ນ:  ຫ້າມບໍ່ໃຫ້ຊື້-ຂາຍສິນຄ້າ ແລະ ອຸປະກອນທີ່ກໍ່ໃຫ້ເກີດສຽງແຕກ, ສຽງດັ່ງທຸກປະເພດ, ບໍ່ໃຫ້ນໍາໃຊ້ທາດລະເບີດ, ທາດແຕກ, ທາດເບື່ອ, ເຄມີ ແລະ ວັດຖຸອອກລິດຕໍ່ສຸຂະພາບຈິດ ທີ່ເປັນຜົນລົບຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ; ຫ້າມບໍ່ໃຫ້ນຸ່ງເຄື່ອງສັ້ນ-ເຂີນ ທີ່ບໍ່ຖືກຕ້ອງຕາມຮີດຄອງປະເພນີ, ຫ້າມໃຊ້ພາຫະນະບັນຈຸຖັງນ້ໍາ, ຄຸນ້ໍາ ຫຼື ທໍ່ນ້ໍາສີດໃສ່ຜູ້ຄົນທີ່ຂັບຂີ່ລົດສັນຈອນໄປ-ມາຕາມເສັ້ນທາງ; ຫ້າມລວມຕົວກັນເປັນກຸ່ມ ແລ້ວເຕັ້ນຟ້ອນຕາມຖະຫນົນ ຢາງເຕັດຂາດ.

ນອກນີ້ ກໍຕ້ອງໄດ້ມີສະຕິປ້ອງກັນ, ສະກັດກັ້ນບັນຫາອັກຄີໄພ ເນື່ອງຈາກວ່າ ຜ່ານມາໄດ້ມີອັກຄີໄພເກີດຂື້ນຢູ່ບັນດາສນັກງານ-ອົງການ, ທີ່ພັກອາໄສ, ໂຮງຈັກ, ໂຮງງານ, ຫົວຫນ່ວຍການຜະລິດ, ພື້ນຖານເສດຖະກິດ ວັດທະນະທໍາ ສັງຄົມ, ຕະຫຼາດ, ປ່າໄມ້ ແລະ ບ່ອນຊຸມຊົນ ສ້າງຜົນເສຍຫາຍແກ່ຊີວິດ, ຊັບສິນຂອງລັດ-ລວມຫມູ່, ເອກະຊົນ ແລະ ຂອງບຸກຄົນເປັນຈໍານວນຫຼວງຫຼາຍ; ສາເຫດໄຟໄຫມ້ສ່ວນຫຼາຍ ແມ່ນຍ້ອນການເລີນເລີ້, ຂາດສະຕິ, ຂາດຄວາມຮັບຜິດຊອບ, ຄວາມຮູ້ເທົ່າບໍ່ເຖິງການ ແລະ ການກວດກາບໍ່ຮອບຄອບເປັນຕົ້ນແມ່ນການນໍາໃຊ້ໄຟເຂົ້າໃນການຜະລິດ, ການດໍາເນີນທຸລະກິດ, ການດໍາລົງຊີວິດປະຈໍາວັນ, ການຈູດຂີ້ເຫຍື້ອ, ຈູດປ່າ, ຈູດໄຮ່, ໄຕ້ທູບທຽນບູຊາ ແລະ ອື່ນໆ; ດັ່ງນັ້ນ ການນໍາໃຊ້ໄຟຟ້າເຂົ້າໃນການຜະລິດ, ດໍາລົງຊີວິດປະຈໍາວັນ ຫຼື ວຽກງານອື່ນໆ ຕ້ອງປະຕິບັດຕາມຂໍ້ກໍານົດ ຫຼັກການຂອງບໍລິສັດໄຟຟ້າວາງອອກຢ່າງເຂັ້ມງວດ; ເອົາໃຈໃສ່ກວດກາລະບົບໄຟຟ້າ, ອຸປະກອນ ເຄື່ອງໃຊ້ໄຟຟ້າ ຕ່າງໆ ໃຫ້ຢູ່ໃນສະພາບສົມບູນ, ຖ້າເຫັນວ່າເກົ່າແກ່ເປ່ເພບໍ່ຮັບປະກັນ ຕ້ອງປ່ຽນໃຫມ່; ທຸກຄັ້ງທີ່ໃຊ້ອຸປະກອນເຄື່ອງໃຊ້ໄຟຟ້າສໍາເລັດແລ້ວ ຕ້ອງປີດສະວິກ ແລະ ຖອດປັກສຽບອອກພ້ອມ; ຈັດມ້ຽນວັດຖຸສິ່ງຂອງເຄື່ອງໃຊ້ຕ່າງໆ ໃຫ້ຫ່າງຈາກ ເຕົາດັງໄຟແຕ່ງກີນ, ເຕົາແກັສ ຫຼື ອຸປະກອນທີ່ມີຄວາມຮ້ອນອື່ນໆ;  ການໄຕ້ທູບທຽນບູຊາຕ້ອງຮັບປະກັນຄວາມປອດໄພ, ທຸກຄັ້ງທີ່ມີການໄຕ້ທູບທຽນບູຊາ ເມື່ອສໍາເລັດຕ້ອງມອດພ້ອມ ແລະ ອື່ນໆ.

ນອກນີ້ ທຸກຄົນຈົ່ງມີສະຕິ, ຈົ່ງຢ່າສວຍໃຊ້ ໃນຍາມຫຍຸ້ງຍາກນີ້ ໃຫ້ເປັນໂອກາດຂອງບຸກຄົນ, ກຸ່ມຄົນ ເພື່ອຫາຜົນປະໂຫຍດໃສ່ຕົນເອງ, ສ້າງຄວາມເດືອດຮ້ອນໃຫ້ປະຊາຊົນ ແລະ ສັງຄົມ. ໃຫ້ທຸກຄົນ ມີສະຕິ, ຢ່າເຊື່ອຂ່າວລວງ, ຂ່າວລື, ຂ່າວອະກຸສົນ, ຂ່າວປັ່ນປວ່ນຕ່າງໆ. ພວກເຮົາຕ້ອງໄດ້ສາມັກຄີກັນ, ທົ່ວທັງຊາດ ເປັນຈິດໜຶ່ງໃຈດຽວກັນ, ຄົນລາວເຮົາບໍ່ຖິ້ມກັນ, ໃນໄລຍະນີ້ ຂໍໃຫ້ອົດທົນ ລ້າງມືເລື້ອຍໆ, ໃສ່ຜ້າປິດປາກ, ປິດດັງ, ຢູ່ຫ່າງກັນ ຫຼື ຮັກສາໄລຍະຫ່າງໃນສັງຄົມ,  ພ້ອມພຽງກັນຕໍ່ສູ້ ຕ້ານກັບ Covid-19 ແລະ ຜ່ານພົ້ນມັນໄປດ້ວຍກັນ.

 

Off

Comments are closed.