14th Apr2022

ນາຍົກລັດຖະມົນຕີ ລາວ-ຫວຽດນາມ ສົນທະນາທາງໂທລະສັບ.

by somchan

ໃນວັນທີ 12 ເມສາ 2022 ນີ້, ສະຫາຍ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບໂທລະສັບອວຍພອນຈາກ ສະຫາຍ ຟ້າມມິງຈິງ ນາຍົກລັດຖະມົນຕີ ແຫ່ງ ສສ ຫວຽດນາມ ເນື່ອງໃນໂອກາດບຸນປີໃໝ່ ປະຈໍາຊາດລາວ ພ.ສ 2565.

ໂອກາດນີ້, ສະຫາຍ ນາຍົກລັດຖະມົນຕີ ຟ້າມ ມິງ ຈິງ ໄດ້ ສົ່ງຄໍາອວຍພອນປີໃໝ່ ອັນອົບອຸ່ນທີ່ສຸດມາຍັງ ສະຫາຍ ນາຍົກລັດຖະມົນຕີ ພັນຄໍາ ວິພາວັນ ພ້ອມທັງຝາກຄວາມອວຍພອນປີໃໝ່ ຈາກການນໍາຂັ້ນສູງພັກ-ລັດ ແຫ່ງ ສສ ຫວຽດນາມ ສົ່ງເຖິງການນໍາຂັ້ນສູງພັກ-ລັດ ແຫ່ງ ສປປ ລາວ. ພ້ອມທັງສະແດງຄວາມຊົມເຊີຍ ຜົນສໍາເລັດ ຂອງ ສປປ ລາວ ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຂອງພັກປະຊາຊົນປະຕິວັດລາວ ຄັ້ງທີ XI ກໍຄື ແຜນພັດທະນາເສດຖະກິດສັງຄົມ 5 ປີ ຄັ້ງທີ 9, ເຫັນວ່າ ພາຍໃຕ້ການນໍາພາ ອັນສະຫລາດສ່ອງໄສ ຂອງພັກປະຊາຊົນປະຕິວັດລາວປະຊາຊົນລາວ ອ້າຍນ້ອງຍາດໄດ້ຜົນສໍາເລັດໃໝ່ຫລາຍດ້ານ, ສ້າງປະເທດລາວ ຮຸ່ງເຮືອງສີວິໄລ, ຖານະບົດບາດຂອງ ຂອງ ສປປ ລາວ ໃນເວທີພາກພື້ນ ແລະ ສາກົນ ນັບມື້ນັບສູງເດັ່ນຂຶ້ນ.

ໃນທ່າມກາງບັນຍາດກາດ ແຫ່ງບຸນປີໃໝ່ລາວ ກໍຄືບັນຍາກາດການສະເຫລີມສອງຫລອງປີສາມັກຄີມິດຕະພາບ ລາວ-ຫວຽດນາມ 2022 ຄື ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ຄົບຮອບ 45, ນາຍົກລັດຖະມົນຕີທັງສອງປະເທດ ມີຄວາມເບີກບານມ່ວນຊື່ນ ຮ່ວມກັນຕີລາຄາສູງ ການຂະຫຍາຍຕົວຂອງການພົວພັນສອງຝ່າຍ ລາວ-ຫວຽດນາມ ຕະຫລອດໄລຍະຜ່ານມາ, ບໍ່ວ່າຈະໃນເວລາໃດ, ສະພາບການໃດ ມິດຕະພາບ ອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມື ຮອບດ້ານ ລາວ-ຫວຽດນາມ ຫວຽດນາມ-ລາວ ກໍສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.

ສອງຝ່າຍ ໄດ້ສະແດງຄວາມເພິ່ງພໍໃຈ ທີ່ເຫັນວ່າ ບົນພື້ນຖານການຕົກລົງຂອງການນໍາຂັ້ນສູງສອງຝ່າຍ ກໍຄືຜົນການພົບປະຂອງສອງນາຍົກລັດຖະມົນຕີ ໃນໂອກາດ ການຢ້ຽມຢາມ ສສ ຫວຽດນາມ ຢ່າງເປັນທາງການ ກໍຄື ການເຂົ້າຮ່ວມກອງປະຊຸມ ຄະນະກໍາມະການຮ່ວມມືທະວິພາຄີ ລາວ-ຫວຽດນາມ ຄັ້ງທີ 44 ໃນເດືອນມັງກອນ 2022 ທີ່ນະຄອນຫລວງຮ່າໂນ້ຍ, ທີ່ນາຍົກລັດຖະມົນຕີທັງສອງໄດ້ຕັດສິນໃຈຢ່າງເດັດຂາດ ໃນການຊຸກຍູ້ການພົວພັນຮ່ວມມືດ້ານເສດຖະກິດ ລະຫວ່າງສອງປະເທດ ໃຫ້ມີປະສິດທິຜົນຂຶ້ນສູ່ລະດັບສູງໃໝ່, ຂະແໜງການກ່ຽວຂ້ອງໄດ້ເອົາໃຈ ຈັດຕັ້ງປະຕິບັດຢ່າງຕັ້ງໜ້າ ສະແດງອອກຜ່ານການເຮັດວຽກຮ່ວມກັນ ທັງແບບເຊິ່ງໜ້າ ແລະ ແບບທາງໄກ ໄລຍະ 3 ເດືອນຜ່ານມາ, ສອງຝ່າຍໄດ້ເປັນເອກະພາບກັນສືບຕໍ່ ຮ່ວມກັນຈັດກິດຈະກໍາສະເຫລີມສະຫລອງ ປີສາມັກຄີ ມິດຕະພາບ ລາວ-ຫວຽດນາມ ຮ່ວມກັນ ຢ່າງເປັນຂະບວນຟົດຟື້ນ, ສືບຕໍ່ແລກປ່ຽນຄະນະຮ່ວມກັນໃນທຸລະດັບ, ສືບຕໍ່ຈັດຕັ້ງຜັນຂະຫຍາຍການຕົກລົງຂອງການນໍາຂັ້ນສູງສອງຝ່າຍ, ສືບຕໍ່ເພີ່ມທະວີການຮ່ວມມືດ້ານເສດຖະກິດ-ສັງຄົມ ການເຊື່ອມໂຍງພື້ນຖານໂຄງລ່າງ ໃຫ້ນັບມື້ນັບມີປະສິດທິຜົນຍິ່ງຂຶ້ນ ເພື່ອຜົນປະໂຫຍດຂອງປະຊາຊົນສອງຊາດ, ສືບຕໍ່ເອົາໃຈໃສ່ເພີ່ມທະວີການສຶກສາອົບຮົມມູນເຊື້ອຄວາມສາມັກຄີພິເສດລາວ-ຫວຽດນາມ ໃນຖັນແຖວພະນັກງານ ແລະ ປະຊາຊົນ ເປັນຕົ້ນ ແມ່ນຖັນແຖວຊາວໜຸ່ມ-ເຍົາວະຊົນຂອງສອງປະເທດ, ສືບຕໍ່ຮ່ວມມື ແລະ ສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.

ໃນໂອກາດນີ້, ສະຫາຍ ພັນຄໍາ ວິພາວັນ ກໍໄດ້ສະແດງຄວາມຂອບໃຈມາຍັງສະຫາຍ ຟ້າມ ມິງ ຈິງ ທີ່ໄດ້ໂທລະສັບມາອວຍພອນປີໃໝ່ປະຈຳຊາດລາວ ໃນຄັ້ງນີ້, ເຊິ່ງສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມ ແລະ ຄວາມສາມັກຄີພິເສດຂອງສອງຊາດ, ພ້ອມທັງຕາງໜ້າການນໍາຂັ້ນສູງພັກ-ລັດ ແຫ່ງ ສປປ ລາວ ຝາກຄວາມຂອບໃຈ ໄປຍັງການນໍາຂັ້ນສູງ ພັກ-ລັດ ແຫ່ງ ສສ ຫວຽດນາມ ຕໍ່ກັບຄໍາອວຍພອນປີໃໝ່ອັນອົບອຸ່ນທີ່ສຸດ. ພ້ອມນີ້ເນື່ອງໃນໂອກາດປີໃໝ່ລາວ, ສະຫາຍ ພັນຄໍາ ວິພາວັນ ກໍໄດ້ອວຍພອນໃຫ້ ສະຫາຍ ຟ້າມມິງຈິງ ພ້ອມຄອບຄົວ ກໍຄື ຝາກຄໍາອວຍພອນໄປຍັງ ການນໍາຫວຽດນາມຈົ່ງມີແຕ່ຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນໃໝ່ທີ່ຍິ່ງໃຫຍ່ກວ່າເກົ່າ, ສືບຕໍ່ນໍາພາປະເທດຫວຽດນາມ ພັດທະນາ, ຮຸ່ງເຮືອງ, ສີວິໄລ ຍິ່ງໆຂຶ້ນ ແລະ ໄດ້ເຊື້ອເຊີນ ສະຫາຍ ຟ້າມມິງຈິງ ພ້ອມດ້ວຍພັນລະຍາ ມາຢ້ຽມຢາມລາວໃນເວລາອັນຄວນອີກດ້ວຍ.

Off

Comments are closed.