ກອງພັນປ້ອງກັນເຄື່ອນທີ່ໄວ ແລະ ທະຫານ ນະຄອນຫຼວງວຽງຈັນ ເຂັ້ມງວດກວດກາອອກລາດຕະເວນ.

ວັນທີ 14 ເມສາ 2022, ກອງພັນປ້ອງກັນເຄື່ອນທີ່ໄວ ກອງບັນ​ຊາ​ການ ປກສ ນະ​ຄອນຫຼວງວຽງ​ຈັນ ສົມທົບ​ກັບ ກອງບັນຊາການທະຫານ ນະ​ຄອນຫຼວງວຽງ​ຈັນ, ເຄື່ອນ​ໄຫວກວດ​ກາລາດຕະເວນ ປະຈໍາການຄອຍເຫດ ເພື່ອແກ້ໄຂສະພາບຄວາມບໍ່ສະຫງົບ ແລະ ຄວາມບໍ່​ເປັນ​ລະ​ບຽບ​ຮຽບ​ຮ້ອຍ ໃນ​ສັງ​ຄົມ ໃຫ້ທ່ວງທັນເວລາ ແນໃສ່ຮັບປະກັນຮັກສາຄວາມສະຫງົບໃນໄລຍະສະເຫຼີມສະຫຼອງບຸນປີໃໝ່ລາວ ພສ 2565 ໃນ​ຂອບ​ເຂດນະຄອນຫຼວງວຽງຈັນ ໃຫ້ມີຄວາມເບີກບານມ່ວນຊື່ນ ແລະ ປະຕິບັດຖືກຕ້ອງຕາມຄຳສັ່ງ ແລະ ມາດຕະການປ້ອງກັນ ຄວບ​ຄຸມ ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ຢ່າງ​ເຂັ້ມ​ງວດ.

ພັທ ພອນທິບ ພັນທະວົງ ຫົວໜ້າກອງພັນປ້ອງກັນເຄື່ອນທີ່ໄວ ກອງບັນ​ຊາ​ການ ປກສ ນະ​ຄອນຫຼວງວຽງ​ຈັນ ໃຫ້ຮູ້ວ່າ: ການຈັດຕັ້ງປະຕິບັດແຜນ​ການອອກ​ເຄື່ອນ​ໄຫວກວດກາລາດຕະເວນ ​ຄັ້ງ​ນີ້ ແມ່ນອີງຕາມຄໍາສັ່ງ ວ່າດ້ວຍການຮັກສາຄວາມເປັນລະບຽບຮຽບຮ້ອຍ ໃນໄລຍະສະເຫຼີມສະຫຼອງປີໃໝ່ລາວ ຂອງເຈົ້າຄອງນະ​ຄອນຫຼວງວຽງ​ຈັນ ວາງອອກ ແລະ ອີງຕາມແຜນວຽກ, ແຈ້ງການ ເພີ່ມທະວີຮັກສາຄວາມສະຫງົບ ຄວາມເປັນລະບຽບຮຽບຮ້ອຍ ຂອງກອງພັນ​ປ້ອງ​ກັນເຄືອນທີ່ ແລະ ກຳລັງທະຫານ ນະຄອນຫລວງ​ວຽງ​ຈັນ; ຈື່ງໄດ້ນໍາກໍາລັງອອກກວດກາລາດຕະເວນສະພາບສັງຄົມໂດຍລວມ ເຫັນວ່າ ການສະເຫຼີມສະຫຼອງບຸນປີໃໝ່ລາວ ໃນ​ຂອບ​ເຂດນະຄອນຫຼວງວຽງຈັນ ແມ່ນ​ມີ​ຄວາມ​ສະ​ຫງົບ ແລະ ເປັນ​ລະ​ບຽບ​ຮຽບ​ຮ້ອຍ​ດີ.