18th Apr2022

ສຸມໃສ່ 6 ວຽກງານ ເພື່ອສ້າງບ້ານໂພນທັນໃຫ້ກາຍເປັນບ້ານປອດຢາເສບຕິດ.

by somchan

ອາທິດທີ່ຜ່ານມາ ປກສ ກຸ່ມສີສັງວອນ ເມືອງໄຊເສດຖາ ນະຄອນຫຼວງວຽງຈັນ, ໄດ້ເຜີຍແຜ່ ຜັນຂະຫຍາຍ ວາລະແຫ່ງຊາດ ກ່ຽວກັບການແກ້ໄຂບັນຢາເສບຕິດ, ສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຢູ່ບ້ານໂພນທັນ ເມືອງໄຊເສດຖາ ໂດຍການເປັນປະທານຂອງ ພັທ ສີເພັດ ພິມມະສອນ ຫົວໜ້າກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ, ມີ ພັທ ອ່ອນແກ້ວ ເສລີທໍາ ຫົວໜ້າ ປກສ ກຸ່ມສີສັງວອນ, ພະນັກງານລົງກໍ່ສ້າງຮາກຖານການເມືອງ, ຜູ້ຕາງໜ້າ ພະແນກສະກັດກັ້ນ ແລະ ຕ້ານຢາເສບຕິດ ປກສ ນະຄອນຫຼວງວຽງຈັນ, ອໍານາດການປົກຄອງບ້ານ 7 ບ້ານ, ແຂກຖືກເຊີນ ແລະ ປະຊາຊົນ ເຂົ້າຮ່ວມ.


ພັທ ອ່ອນແກ້ວ ເສລີທໍາ ຫົວໜ້າ ປກສ ກຸ່ມສີສັງວອນ ໄດ້ຜ່ານແຜນເຄື່ອນໄຫວວຽກງານ ຈັດຕັ້ງປະຕິບັດ ວາລະແຫ່ງຊາດ ແກ້ໄຂບັນຢາເສບຕິດ, ສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ຂອງບ້ານໂພນທັນ ປະຈໍາປີ 2022 ໃຫ້ຮູ້ວ່າ: ປກສ ກຸ່ມສີສັງວອນ ຈະສຸມໄດ້ໃສ່ 6 ວຽກງານ ເພື່ອສ້າງບ້ານໂພນທັນໃຫ້ກາຍເປັນບ້ານປອດຢາເສບຕິດ ຄື: ສຸມໃສ່ປັບປຸງບຳລຸງສິດໜ້າທີ່ ແລະ ແບບແຜນວິທີເຮັດວຽກ ໃຫ້ແກ່ກຳລັງ ປກສ ບ້ານ, ນຳພາ ປກສ ເກັບກຳສະພາບການ ແລະ ບັນທຶກຂໍ້ມູນລະອຽດ, ສ້າງຕັ້ງເງິນກອງທຶນສະຫວັດດີການ, ນຳພາຄຸ້ມຄອງລາຍຮັບ – ລາຍຈ່າຍ ໃຫ້ເປັນລະບົບ, ເກັບກຳສະຖິຕິພົນລະເມືອງ ຄົນບໍ່ໄດ້ຂຶ້ນສຳມະໂນຄົວ, ຄົນຫຼຸດ, ຄົນເພີ່ມ, ຄົນມາພັກເຊົາຊົ່ວຄາວ ເພື່ອຂຶ້ນແຜນສົມທົບກັບ ກອງບັນຊາການ ປກສ ເມືອງ ແກ້ໄຂການຂຶ້ນທະບຽນສໍາມະໂນຄົວ ໃຫ້ຖືກຕ້ອງ, ຈັດສັນຄວາມບໍ່ເປັນລະບຽບຮຽບຮ້ອຍ ເກັບກຳຂຶ້ນບັນຊີເປົ້າໝາຍ ກຳນົດຈຸດສ່ຽງຂອງການກໍ່ອາຊະຍະກຳ ແລະ ເປົ້າໝາຍບຸກຄົນເຊັ່ນ: ປຸ້ນຊັບ, ຊິງຊັບ, ລັກຊັບ, ອາລະວາດຄອບຄົວ, ຄ້າໂສເພນີ. ພ້ອມທັງ ຈັດແບ່ງປະເພດ ເພື່ອສົມທົບກັບພາກສ່ວນທີ່ກ່ຽວຂ້ອງ ສຶກສາອົບຮົມ, ແກ້ໄຂຕາມຂັ້ນຕອນຂອງກົດໝາຍ; ສຸມໃສ່ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ສົມທົບອຳນາດການປົກຄອງບ້ານ ເຮັດວຽກງານໂຄສະນາທາງໂທລະໂຄງປະຈຳບ້ານມື້ໜຶ່ງບໍ່ໃຫ້ຫຼຸດ 2 ຄັ້ງ ຄື: ພາກເຊົ້າ, ພາກແລງ ໂດຍນຳເອົາເອກະສານ ຫຼື ຄິບສຽງການໂຄສະນາຜົນຮ້າຍຂອງຢາເສບຕິດມາໂຄສະນາ ເປັນປົກກະຕິເພື່ອໃຫ້ ປະຊາຊົນໄດ້ຮັບຟັງຢ່າງທົ່ວເຖິງ, ສືບຄົ້ນຫາເປົ້າໝາຍທີ່ເຄີຍກະທຳຜິດມາກ່ອນ ແລະ ເປົ້າໝາຍກໍາລັງເຄື່ອນ ໄຫວກະທໍາຜິດ ເພື່ອສ້າງເປັນລາຍຄະດີສະເພາະສົມທົບກັບກອງບັນຊາການ ປກສ ເມືອງແກ້ໄຂ; ເກັບກຳຂຶ້ນບັນຊີ ທີ່ຕັ້ງສຳນັກງານອົງການຈັດຕັ້ງສາກົນທີ່ຂຶ້ນກັບລັດຖະບານ ເກັບກຳສະຖິຕິຄົນຕ່າງປະເທດທີ່ເຂົ້າມາເຄື່ອນໄຫວປະກອບອາຊີບ, ມາລີ້ຊອນ, ຄ້າຂາຍດຳເນີນທຸລະກິດ, ມາພັກເຊົາແຕ່ງງານກັບຄົນລາວ; ເຕົ້າໂຮມສະມາຊິກພາຍໃນບ້ານເຊື່ອມຊຶມເອກະສານຕ່າງໆ, ລົງເຮັດບົດບັນທຶກສັນຍາປ້ອງກັນຄວາມສະຫງົບ ກັບແຕ່ລະຄອບຄົວໜ່ວຍ 10 ຫຼັງຄາ ແລະ ສ້າງຂໍ້ແຂ່ງຂັນລະຫວ່າງ ຄອບຄົວກັບຄອບຄົວ, ລະຫວ່າງໜ່ວຍກັບໜ່ວຍ, ເພື່ອສ້າງຄອບຄົວ ແລະ ບ້ານປ້ອງກັນຄວາມສະຫງົບສຸກດີໃຫ້ໄດ້ຕາມ 5 ມາດຖານ ການສ້າງຄອບຄົວ ແລະ 6 ເງື່ອນໄຂ ການສ້າງບ້ານ ປ້ອງກັນຄວາມສະຫງົບສຸກດີ; ສຸມໃສ່ໂຄສະນາໃຫ້ ປະຊາຊົນເຂົ້າໃຈຕໍ່ຜົນຮ້າຍຂອງຢາເສບຕິດ ຕໍ່ຜູ້ເສບ, ຜູ້ຜະລິດ, ຜູ້ຄ້າຂາຍ, ຂົນສົ່ງ, ມີໄວ້ໃນຄອບຄອງ ເພື່ອໃຫ້ເຂົາເຈົ້າຕື່ນຕົວເປັນເຈົ້າການ ເຂົ້າຮ່ວມໃນວຽກງານປ້ອງກັນສະກັດກັ້ນ ແກ້ໄຂບັນຫາຢາເສບຕິດ ເອົາໃຈໃສ່ເບິ່ງແຍງລູກຫຼານຂອງຕົນເອງໃຫ້ ຫ່າງໄກຈາກຢາເສບຕິດ.

ໂອກາດນີ້,  ພັທ ສີເພັດ ພິມມະສອນ ໄດ້ເນັ້ນໜັກໃຫ້ຄະນະຮັບຜິດຊອບຊີ້ນໍາລວມ ຈົ່ງເອົາໃຈໃສ່ປະຕິບັດໜ້າທີ່ໄດ້ຮັບມອບໝາຍໃຫ້ສໍາເລັດ ເພື່ອສ້າງບ້ານໂພນທັນ ໃຫ້ກາຍເປັນບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີ, ເອົາໃຈໃສ່ ຕ້ານ ແລະ ສະກັດກັ້ນ ປະກົດການຫຍໍ້ທໍ້ຕ່າງໆໃຫ້ຫຼຸດໜ້ອຍຖອຍລົງ ເປັນຕົ້ນ ແມ່ນບັນຫາຢາເສບຕິດ ທີ່ເປັນໜໍ່ແໜ່ງກໍ່ໃຫ້ ເກີດປະກົດການຫຍໍ້ທໍ້ທາງທາງດ້ານສັງຄົມ. ພ້ອມທັງ ຮຽກຮ້ອງໃຫ້ປະຊາຊົນ ໃຫ້ຄວາມຮ່ວມມືກັບເຈົ້າໜ້າທີ່ ເພື່ອສ້າງບ້ານໃຫ້ເປັນບ້ານແບບຢ່າງ ໃນການຈັດຕັ້ງປະຕິບັດວາລະແຫ່ງຊາດ ການແກ້ໄຂບັນຫາຢາເສບຕິດໃຫ້ໄດ້ຕາມຄາດໝາຍ.

Off

Comments are closed.