20th Apr2022

ກະຊວງການເງິນ ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ III.

by somda phoneor

ກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ III ຂອງອົງຄະນະພັກກະຊວງການເງິນ ໄດ້ຈັດຂຶ້ນໃນວັນທີ 18 ເມສາ ນີ້ ພາຍໃຕ້ການເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ, ມີຄະນະປະຈຳພັກ, ກຳມະການຄະນະພັກກະຊວງ, ບັນດາຄະນະພັກຮາກຖານ, ໜ່ວຍພັກຮາກຖານ, ຄະນະພັກ ແລະ ຄະນະນຳແຕ່ລະຂັ້ນຂອງກະຊວງການເງິນ  ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ ເພື່ອຜ່ານບົດສະຫລຸບຕີລາຄາການຈັດຕັ້ງປະຕິບັດການປັບປຸງກົງຈັກການຈັດຕັ້ງ ຂອງກະຊວງການເງິນ, ສະພາບການຈັດຕັ້ງປະຕິບັດວຽກງານພັດທະນາບຸກຄະລາກອນ ຕິດພັບກັບການແກ້ໄຂພະນັກງານເຫລືອບໍ່ພໍ  ແລະ ສະຫລຸບຕີລາຄາການຈັດຕັ້ງ ປະຕິບັດແຜນງົບປະມານແຫ່ງລັດ ປະຈໍາງວດທີ I ຂອງປີ 2022 ແລະ ທິດທາງແຜນການ ງວດ II ປີ 2022.

ພ້ອມນີ້, ກອງປະຊຸມຍັງໄດ້ຮັບຟັງການຜ່ານບົດສະຫລຸບ ຕີລາຄາສະພາບການປັບ ປຸງກົງຈັກການຈັດຕັ້ງຂອງກະຊວງການເງິນ, ຜ່ານບົດສະຫລຸບຕີລາຄາສະພາບການຈັດຕັ້ງປະຕິວັດວຽກງານພັດທະນາບຸກຄະລາກອນ ຕິດພັນກັບການແກ້ໄຂພະນັກງານເຫລືອບໍ່ພໍ ແລະ ຜູ້ເຂົ້າຮ່ວມໄດ້ພ້ອມກັນປະກອບຄຳຄິດເຫັນໃສ່ບົດສະຫລຸບດັ່ງກ່າວ ເພື່ອໃຫ້ມີຄວາມໝາຍຄົບຖ້ວນຂຶ້ນກວ່າເກົ່າ.

ສະຫາຍ ບຸນໂຈມ ອຸບົນປະເສີດໄດ້ມີຄຳເຫັນວ່າ: ເພື່ອເສີມຂະຫຍາຍ ແລະ ແກ້ໄຂບັນຫາ ຂໍ້ຄົງຄ້າງ, ສິ່ງທ້າທາຍ ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນ ງົບ ປະມານ ເພື່ອຫາວິທີໃນການປັບປຸງ ແລະ ແກ້ໄຂ ໄປຕາມທິດນຳຂອງພັກ ແລະ ລັດຖະ ບານ ກໍຄື ກະຊວງການເງິນ ຈະຕ້ອງໄດ້ປະຕິບັດຕາມແຜນດຳເນີນງານທັງວຽກພັກ-ລັດ ແລະ ບັນດາຄາດໝາຍທີ່ວາງໄວ້ ໂດຍສະເພາະວຽກງານຈຸດສຸມໃນປີ 2022 ເພື່ອໃຫ້ບັນດາສະຫາຍເອົາໃຈໃສ່ຢ່າງມີຈຸດສຸມ ແລະ ເພີ່ມທະວີບັນດາມາດຕະການຄື: ເພີ່ມທະວີການເມືອງ-ແນວຄິດໃຫ້ແກ່ຄະນະພັກຄະນະນຳ, ສະມາຊິກພັກ-ພະນັກງານຫລັກແຫລງ ແລະ ທຸກຂັ້ນ ຂອງຂະແໜງການເງິນທັງສູນກາງ ແລະ ທ້ອງຖິ່ນ ໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບໝາຍ; ຄະນະບໍລິຫານພັກກະຊວງ, ຄະນະນຳແຕ່ລະຂັ້ນ ແລະ ສະມາຊິກພັກແຕ່ລະສະຫາຍ ຕ້ອງໄດ້ສືບຕໍ່ຈັດຕັ້ງຜັນຂະຫຍາຍຄຳສັ່ງເລກທີ 01 ຂອງກົມການເມືອງສູນການພັກ, ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ຈັດຕັ້ງປະຕິບັດມະຕິ ວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິງ ແລະ ຄຳສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານແຫ່ງລັດ.

ພ້ອມກັນນີ້, ໃຫ້ເອົາໃຈໃສ່ສ້າງທ່າຫັນປ່ຽນໃໝ່ອັນແຂງແຮງ, ເລິກເຊິ່ງ ແລະ ຮອບດ້ານ, ສຸມໃສ່ປັບປຸງ ພັດທະນາ ແລະ ນຳໃຊ້ເຕັກໂນໂລຊີ, ເພື່ອຂຸດຄົ້ນ ແລະ ເສີມຂະຫຍາຍຄວາມສາມາດບົ່ມຊ້ອນ, ສຸມໃສ່ຄົ້ນຄວ້າເລິກເຊິ່ງ ຕໍ່ກັບເນື້ອໃນວາລະແຫ່ງຊາດ ໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ, ທົບທວນຄືນ ແລະ ຄົ້ນຄວ້າລະອຽດ ບັນດານິຕິກໍາ, ນະໂຍບາຍທີ່ມີໃນປັດຈຸບັນໃຫ້ສອດຄ່ອງ ເພື່ອແກ້ໄຂບັນຫາຕ່າງໆ, ເພີ່ມທະວີວຽກງານ ການບັນຊີ, ການກວດກາພາຍໃນ ຕິດພັນກັບຜົນຂອງການກວດສອບແຫ່ງລັດ ໂດຍສະເພາະ ການແກ້ໄຂຜົນການກວດສອບ ໃຫ້ທັນການ ແລະ ເປັນຮູບປະທຳ, ເອົາໃຈໃສ່ຊຸກຍູ້, ແນະນຳຫົວໜ່ວຍງົບປະມານ, ບັນດາວິສາຫະກິດ ໃຫ້ຖືບັນຊີຕາມກົດໝາຍ ແລະ ເພີ່ມທະວີວຽກງານຕິດຕາມ ກວດກາ ການນຳໃຊ້ງົບປະມານຂອງລັດຢ່າງເຂັ້ມງວດ, ສະກັດກັ້ນ ແລະ ຕ້ານການສໍ້ລາດບັງຫລວງ, ປັບປຸງລະບົບການຈັດຕັ້ງຂອງຂະແໜງການເງິນ ໂດຍສຸມໃສ່ປັບ ປຸງດ້ານກົງຈັກຂອງ 3 ຂະແໜງການສາຍຕັ້ງ ແລະ ຈັດວາງບຸກຄະລາກອນ ໃຫ້ສອດ ຄ່ອງກັບວຽກ,  ເອົາໃຈໃສ່ແກ້ໄຂ້ພະນັກງານເຫລືອບໍ່ພໍ, ປັບປຸງພາລະບົດບາດ ຂອງພະແນກການເງິນ, ນະຄອນຫລວງ, ເມືອງ, ນະຄອນ, ເທສະບານ, ໃຫ້ສຳເລັດ ໃນງວດ II ພ້ອມກັນນັ້ນກໍໃຫ້ກຳນົດຕຳແໜ່ງງານໃຫ້ສຳເລັດ.

Off

Comments are closed.