20th Apr2022

ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ປະກາດປັບປຸງກົງຈັກການຈັດຕັ້ງ.

by somda phoneor

ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ ປະກາດແບ່ງຄວາມຮັບຜິດຊອບຂັ້ນບັນຊາຫ້ອງ,ກອງພັນ,ຄ້າຍຄຸມຂັງ ແລະ ກອງບັນຊາການ ປກສ ເມືອງ ທີ່ຂຶ້ນກັບກອງບັນຊາການປ້ອງກັນຄວາມສະຫງົບນະຄອນຫຼວງວຽງຈັນ,ໃນວັນທີ 19 ເມສາ 2022ນີ້, ໂດຍການເປັນປະທານຂອງ ພັອ ສຸກພະຈັນ ບຸດດາຄໍາ  ຫົວໜ້າກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ, ມີບັນດາຄະນະພັກ-ຄະນະບັນຊາ ກອງບັນຊາການ,ກອງພັນ,ຄ້າຍຄຸມຂັງ-ດັດສ້າງ,ປກສ 9 ເມືອງ,ພະແນກ,ປກສ ກຸ່ມບ້ານ ແລະ ສະຖານີ 1191 ເຂົ້າຮ່ວມ.

ພັທ ຄໍາຈັນ ສີວົງສາ ຮອງຫົວໜ້າຫ້ອງການເມືອງ ປກສ ນະຄອນຫຼວງວຽງຈັນ ໄດ້ຜ່ານຂໍ້ຕົກລົງ ຂອງກອງບັນຊາການ ປກສ ນະຄອນຫຼວງວຽງຈັນ ວ່າດ້ວຍການແບ່ງຄວາມຮັບຜິດຊອບຊີ້ນໍາພະແນກວິຊາສະເພາະ ຂອງຫົວໜ້າ,ຮອງຫົວໜ້າຫ້ອງ,ກອງພັນປ້ອງກັນເຄື່ອນທີ່,ຄ້າຍຄຸມຂັງ-ດັດສ້າງ ແລະ ກອງບັນຊາການ ປກສ 9 ເມືອງ ທີ່ຂຶ້ນກັບກອງບັນຊາການ ປກສ ນະຄອນຫຼວງວຽງຈັນ, ຜ່ານຂໍ້ຕົກລົງ ວ່າດ້ວຍການຍົກຍ້າຍ ນາຍຕໍາຫຼວດ 9 ສະຫາຍ ແລະ ໜັງສືນໍາສົ່ງ ມາປະຈໍາການຢູ່ກອງບັນຊາການ ປກສ ນະຄອນຫຼວງວຍງຈັນ ມີຈໍານວນ 4 ສະຫາຍ, ທັງນີ້ກໍ່ເພື່ອເປັນການປັບປຸງເຮັດໃຫ້ກົງຈັກການຈັດຕັ້ງຂອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນມີຄວາມໜັກແໜ້ນເຂັ້ມແຂງທາງດ້ານການເມືອງ-ແນວຄິດ,ເຂັ້ມທາງດ້ານການຈັດຕັ້ງ.

ພ້ອມນີ້ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນໄດ້ໂອ້ລົມແລະໃຫ້ທິດຊີ້ນໍາຫຼາຍວຽກງານສໍາຄັນຕ້ອງເອົາໃຈໃສ່ ຄື: ໃຫ້ບັນດາສະຫາຍທີ່ຖືກມອບໝາຍຕ້ອງເຂົ້າໃຈ ແລະ ມີຄວາມເປັນເອກະພາບຕາມການຕົກລົງ ແລະ ພ້ອມກັນປະຕິບັດຕາມຂໍ້ຕົກລົງ, ໃຫ້ມີຄວາມອຸ່ນອ່ຽນທຸ່ນທ່ຽງໃນການປະຕິບັດໜ້າທີ່,ພ້ອມນີ້ ທຸກສະຫາຍ ຕ້ອງມີຄວາມຮັບຜິດຊອບ ຕໍ່ໜ້າທີ່ການເມືອງທີ່ໄດ້ຮັບມອບໝາຍ ແລະ ຕ້ອງເຮັດສໍາເລັດໜ້າທີ່ ເລີ່ມແຕ່ຂັ້ນຕອນການຄົ້ນຄວ້າ, ວາງແຜນ, ນໍາພາຈັດຕັ້ງປະຕິບັດ,  ຕິດຕາມການກວດກາ ແລະ ປະເມີນຜົນ; ເພື່ອສ້າງກໍາລັງປ້ອງກັນຄວາມສະຫງົບ ນະຄອນຫຼວງວຽງຈັນ ໃຫ້ເປັນຕົວແບບ, ເປັນອັນພົ້ນເດັ່ນ, ບັນດາຜູ້ຊີ້ນໍາຂັ້ນບັນຊາທຸກສະຫາຍ ນັບຕັ້ງແຕ່ຂັ້ນໜ່ວຍງານຂຶ້ນໄປ ຕ້ອງເປັນເຈົ້າການຮັບຜິດຊອບຕໍ່ໜ້າທີ່ວຽກງານ ທີ່ເປັນວຽກຈຸດສຸມຂອງ ປກສ ນະຄອນຫຼວງວຽງຈັນ ແລະ ການຜັນຂະຫຍາຍມະຕິຂອງພັກມາເປັນວຽກງານລະອຽດຂອງເຫຼົ່າວິຊາສະເພາະຂອງຕົນ, ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ການແກ້ໄຂປະກົດການຫຍໍ້ທໍ້ຂອງສັງຄົມ ໃຫ້ໄດ້ຮັບຜົນດີ,ນາຍ ແລະ ພົນຕຳຫຼວດທຸກສະຫາຍຕ້ອງຮັບຮູ້ ແລະ ເຂົ້າໃຈຕໍ່ຜູ້ຊີ້ນຳແຕ່ລະຂົງເຂດວຽກງານຂອງກົມກອງຕົນ ຕາມຂໍ້ຕົກລົງສະບັບນີ້ ເພື່ອສະດວກໃນການປະສານງານ ແລະ ຂໍທິດຊີ້ນໍາໃນການແກ້ໄຂວຽກງານຕ່າງໆ ເພື່ອເຮັດໃຫ້ກໍາລັງ ປ້ອງກັນຄວາມສະຫງົບ ນະຄອນຫຼວງວຽງຈັນ ເປັນກໍາລັງທີ່ເຂັ້ມແຂງແລະເອົາໃຈໃສ່ແກ້ໄຂບັນດາຂໍ້ຄົງຄ້າງ ປະກົດການຫຍໍ້ທໍ້ຢູ່ພາຍໃນກໍາລັງຕິດພັນກັບການແກ້ໄຂ ປະກົດການຫຍໍ້ທໍ້ທີ່ເກີດຂຶ້ນໃນສັງຄົມ, ເອົາໃຈໃສ່ແກ້ໄຂສິ່ງຄົງຄ້າງໃນໄລຍະຜ່ານມາ ໂດຍສະເພາະ ຂອດບໍລິການປະຊາຊົນ ໃຫ້ມີຄວາມສະດວກວ່ອງໄວ.

Off

Comments are closed.