27th Nov2015

ປະກາດເລື່ອນຊັ້ນຂັ້ນນາຍພົນໃຫ້ການນຳ ຂັ້ນສູງຂອງກຳລັງປ້ອງກັນຄວາມສະຫງົບ

by somchan

ກະຊວງປ້ອງກັນຄວາມສະຫງົບຈັດພິທີປະກາດ ເລື່ອນຊັ້ນຂັ້ນນາຍພົນໃຫ້ພະນັກງານນຳພາ- ບັນຊາຂັ້ນສູງຂອງກຳລັງປ້ອງກັນຄວາມສະຫງົບ ໃນວັນທີ 27 ພະຈິກ 2015ນີ້ ໂດຍເປັນກຽດເຂົ້າຮ່ວມຂອງ ພົນຈັດຕະວາ ສົມແກ້ວ ສີລາວົງ ກຳມະການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບ ມີຄະນະພັກ-ຄະນະນຳກະຊວງ, ກົມໃຫຍ່ ຄະນະກົມກອງອ້ອມຂ້າງກະຊວງ ປກສ ເຂົ້າຮ່ວມ.

DSC_7876-(cut)

ພົຈວ ອາລູ ວາລີຊື້ ຫົວໜ້າກົມໃຫຍ່ການເມືອງ ປກສ ໄດ້ຜ່ານດຳລັດຂອງປະທານປະເທດແຫ່ງ ສປປລາວ ວ່າດ້ວຍການອະນຸມັດເລື່ອນຊັ້ນຈາກພັນເອກຂຶ້ນເປັນພົນຈັດຕະວາ ໃຫ້ພະນັກງານນຳພາ-ບັນຊາຂັ້ນສູງຂອງກຳລັງປ້ອງກັນຄວາມສະຫງົບ, ເຊິ່ງໄດ້ຮັບການເລື່ອນຊັ້ນໃນຄັ້ງນີ້ມີ ພົຈວ ດຣ ວັນເຮືອງ ນັນທະຈັກ ຫົວໜ້າກົມຄົ້ນຄ້ວາວິທະຍາສາດ-ປະຫວັດສາດ, ພົຈວ ຄຳສາຍ ຈັນທະວົງ ຫົວໜ້າຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ແລະ ພົຈວ ສົມຈັນ ແກ້ວຈັນດາ ຫົວໜ້າກອງບັນຊາການ ປກສ ແຂວງຫຼວງພະບາງ ພ້ອມທັງປະກາດເລື່ອນຊັ້ນໃຫ້ນາຍຕຳຫຼວດຂັ້ນນາຍພັນຈຳນວນ 218 ສະຫາຍ.

ພົຈວ ສົມແກ້ວ ສີລາວົງ ກຳມະການສູນກາງພັກ ລັດຖະມົນຕີວ່າການກະຊວງປ້ອງກັນຄວາມສະຫງົບກ່າວວ່າ: ການເລື່ອນຊັ້ນຂັ້ນນາຍພົນໃຫ້ພະນັກງານນຳພາ-ບັນຊາຂັັ້ນສູງຂອງກຳລັງປ້ອງກັນຄວາມສະຫງົບໃນເທື່ອນີ້ ເປັນການປະຕິບັດນະໂຍບາຍຂອງພັກ-ລັດຕໍ່ກຳລັງປ້ອງກັນຄວາມສະຫງົບຕາມລັດຖະທຳມະນູນແຫ່ງຊາດ ແລະ ກົດໝາຍຂອງກຳລັງປ້ອງກັນຄວາມສະຫງົບກ່ຽວກັບການແບ່ງຂັ້ນຄຸ້ມຄອງບັນຊາ, ການຍ້ອງຍໍຜູ້ທີ່ມີຄຸນງາມຄວາມດີ ຈາກການປະກອບສ່ວນປົກປັກຮັກສາພັດທະນາປະເທດຊາດ ກໍຄືປ້ອງກັນຄວາມສະຫງົບຮັກສາຄວາມເປັນລະບຽບຮຽບຮ້ອຍໃນສັງຄົມ ແລະຄົບມາດຖານເງື່ອນໄຂເລື່ອນຊັ້ນຕາມລະບຽບການ; ພ້ອມທັງສະແດງເຖິງຄວາມໄວ້ເນື້ອເຊືອໃຈຂອງພັກ-ລັດຄວາມເຕີບໃຫຍ່ຂະຫຍາຍຕົວ ແລະ ກ້າວໜ້າຂອງກຳລັງປ້ອງກັນຄວາມສະຫງົບ.

ໂອກາດນີ້ ພົຈວ ສົມແກ້ວ ສີລາວົງ ຍັງໄດ້ຮຽກຮ້ອງໃຫ້ພະນັກງານນຳພາ-ບັນຊາຂອງກຳລັງປ້ອງກັນຄວາມສະຫງົບທີ່ໄດ້ຮັບນະໂຍບາຍເລື່ອນຊັ້ນ ແລະຜູ້ອື່ນໆເອົາໃຈໃສ່ຊີ້ນຳ-ນຳພາພັດທະນາກຳລັງປ້ອງກັນຄວາມສະຫງົບໃຫ້ນັບມື້ເຕີບໃຫຍ່ເຂັ້ມແຂງຮອບດ້ານ, ສຳເລັດໜ້າທີ່ການເມືອງທີ່ໄດ້ຮັບມອບໝາຍ, ສົມຄູ່ກັບຄວາມໄວ້ເນື້ອເຊື້ອໃຈຂອງພັກ-ລັດແລະປະຊາຊົນ ໂດຍສະເພາະການປ້ອງກັນການສະເຫຼີມສະຫຼອງວັນຊາດທີ 2 ທັນວາຄົບຮອບ 40ປີ ທີ່ຈະມີຂຶ້ນໃນມໍ່ໆນີ້ ຕະຫຼອດຮອດກອງປະຊຸມໃຫຍ່ຄັ້ງທີ 10 ຂອງພັກ ແລະກອງປະຊຸມ ວັນສຳຄັນຕ່າງໆໃຫ້ມີຄວາມສະຫງົບປອດໄພ100%

 

Off

Comments are closed.